ကင်းရွာတွင် စစ်တပ်မီးရှို့ခဲ့သည့် နေအိမ်အတွင်းမှ အလောင်းနှစ်လောင်းတွေ့
11 April 2022
U Kyaw Soe and Ko Yarzar Min (Madara Township)
မန္တလေးတိုင်း၊ မတ္တရာမြို့နယ်၊ ကင်းကျေးရွာတွင် စစ်တပ်က မီးရှို့သွားသည့် နေအိမ်တစ်လုံးကို ဧပြီ ၉ ရက်က တွေ့ရစဉ်။ ဓာတ်ပုံ- ပေးပို့
စစ်တပ် မီးရှို့သွားသည့် နေအိမ်များအနက် တစ်လုံးအတွင်း အပုပ်နံ့ထွက်နေ၍ ရှာဖွေရာ မီးကျွမ်းထားသည့် အသက် ၅၀၊ ၂၉နှစ်အရွယ် ရွာသားနှစ်ဦး၏ အလောင်းကို ဒေသခံတို့ တွေ့ကြသည်။
By Myanmar Now
မန္တလေးတိုင်း၊ မတ္တရာမြို့နယ်၊ ကင်းကျေးရွာတွင် လွန်ခဲ့သည့် သုံးရက်က စစ်တပ် မီးရှို့သွားသည့် နေအိမ်များအနက် တစ်လုံးအတွင်း အမျိုးသားနှစ်ဦး၏ ရုပ်အလောင်း ယနေ့ (ဧပြီ ၁၁) ရှာတွေ့သည်ဟု ဒေသခံအချို့ထံမှ သိရသည်။
ဧပြီ ၇ ရက်တွင် စစ်သားများ ၎င်းတို့ရွာသို့ ရောက်လာစဉ် ဖမ်းဆီးစစ်ဆေးခံရသည့် လူ ၂၀ ခန့်အတွင်း ယနေ့ (ဧပြီ ၁၁) ရုပ်အလောင်းပြန်ရှာတွေ့သည့် အသက် ၅၀ အရွယ် ဦးကျော်စိုး၊ အသက် ၂၉ နှစ်အရွယ် ကိုရာဇာမင်းတို့ ပါဝင်သည်ဟု ရွာသားတစ်ဦးက အတည်ပြုသည်။
ထိုစစ်ကြောင်းက ဧပြီ ၈ ရက် ညပိုင်းတွင်း ကင်းရွာမှ နေအိမ်ငါးလုံးကို မီးရှို့ကာ ပြန်ထွက်သွားပြီးနောက် အထက်ပါနှစ်ဦး ပျောက်ဆုံးနေသဖြင့် ဖမ်းဆီးခံလိုက်ရပြီဟု ဒေသခံတို့က ကနဦးတွင် ယူဆထားခဲ့ကြောင်း ၎င်းက ဆက်ပြောသည်။
သို့သော် မီးရှို့ခံရသည့် နေအိမ်တစ်လုံးအတွင်းမှ အပုပ်နံ့များထွက်နေ၍ ယနေ့ (ဧပြီ ၁၁) ရှာဖွေကြည့်ရာမှ မီးကျွမ်းနေသည့် ထိုသူနှစ်ဦး၏ ရုပ်အလောင်းကို တွေ့ခဲ့ရခြင်းဖြစ်သည်ဟု အထက်ပါ ရွာခံထံမှ သိရသည်။
“မီးရှို့ခံရတဲ့ အိမ်တွေရဲ့ပိုင်ရှင်တွေက ရွာပြန်မလာနိုင်ကြဘူး။ မီးလောင်ပြင်က ဒီအတိုင်းထားထားတာ။ ဒီနေ့မနက်ကျတော့ အနံတွေအရမ်းထွက်လာတော့ အနီးကလူတွေ ဝိုင်းရှာကြမှတွေ့တာ” ဟု ၎င်းက ပြောသည်။
“စစ်တပ်ရွာက ပြန်ထွက်သွားတော့ ဓားစာခံအနေနဲ့ တွေ့ရာလူဖမ်းထားတဲ့ အယောက် ၂၀ လောက်က လွတ်လာပေမဲ့ ဒီနှစ်ယောက်ပါမလာတော့ ခေါ်သွားခံရတယ်ပဲ ထင်ထားကြတာ”
ကင်းရွာတွင် ဧပြီလဆန်းပိုင်း စစ်တပ်က လက်နက်တပ်ဆင်ပေးထားသည့် ပျူစောထီးအဖွဲ့ ဒေသခေါင်းဆောင်တစ်ဦးဟု သတင်းကြီးသည့် ဘုန်းကြီးတစ်ပါး အသတ်ခံရမှုကို စစ်တပ်က လာရောက်စစ်ဆေးရာမှ နေအိမ်မီးရှို့၊ လူနှစ်ဦး သေဆုံးခဲ့ရခြင်းဖြစ်သည်။
ထိုဘုန်းကြီးသတ်ခံရသည့်နေ့ (ဧပြီ ၃)တွင် ကျေးရွာဘုန်းကြီးသင်ပညာရေးကျောင်း တာဝန်ခံဆရာတော် ဦးပညာဝံသကို စစ်တပ်က ဖမ်းသွားပြီးနောက် ၂၄ နာရီအတွင်း ပျံလွန်တော်မူခဲ့ရသည်။
အဆိုပါ ဖြစ်စဉ်များအပြီး တစ်ပတ်အတွင်း စစ်ကောင်စီတပ်က ကင်းရွာကို နောက်တစ်ကြိမ် ထပ်မံစီးနင်း ခြင်းဖြစ်သည်။
စစ်တပ် ရွာ၌ ရှိစဉ် ဖမ်းဆီးခံရသည်ဆိုသော ဒေသခံ ၂၀ ထက်မနည်း၏ အခြေအနေနှင့် သေဆုံးသူနှစ်ဦး၏ ဖြစ်စဉ်များကို သီးခြားအတည်မပြုနိုင်သေးသလို စစ်ကောင်စီထံ မေး၍ မရသေးပါ။
စစ်တပ်က အာဏာသိမ်းပြီး တစ်နှစ်ကျော်အတွင်း စစ်ကောင်စီလက်ချက်ဖြင့် မတ္တရာမြို့နယ်အတွင်း သေဆုံးသူ ၂၀ ထက်မနည်းရှိကြောင်း၊ ကင်းရွာမှ ရဟန်းတစ်ပါးနှင့် လူ ၄ ဦးအထိ ပါဝင်ကြောင်း အထက်ပါ ဒေသခံက ဆိုသည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း၏ ဧပြီ ၈ ထုတ်ပြန်ချက်အရ စစ်ကောင်စီတပ်လက်ချက်ကြောင့် အရပ်သား ၁၇၃၅ ဦးထက်မနည်း သေဆုံးပြီးဖြစ်ကြောင်း သိရသည်။
စစ်ဗိုလ်ချုပ်များကမူ သေဆုံးမှုအနည်းငယ်သာ ရှိသည်ဟု ပြောခဲ့ဖူးသည်။
Original post: Myanmar Now
Announcements
04 April 2025
Myanmar: Human Rights Council condemns the junta, responds to the earthquake, and calls to end sale and supply of arms and jet fuel
13 March 2025
Job Vacancy: Administrative and Finance Assistant
28 February 2025
Open letter: Removal of the membership of the dis-accredited Myanmar National Human Rights Commission from the Southeast Asia National Human Rights Institution Forum
25 February 2025
သတင်းထုတ်ပြန်ကြေညာချက် – တရားမျှတမှုဆီရှေးရှုလျက် အာဂျင်တီးနားတရားရုံး၏ ဖမ်းဝရမ်းထုတ်ပြန်မှုကို ကြိုဆိုထောက်ခံ
25 February 2025
Press Statement: Argentine Court’s arrest warrants are welcome progress towards justice
Progressive Voice is a participatory rights-based policy research and advocacy organization rooted in civil society, that maintains strong networks and relationships with grassroots organizations and community-based organizations throughout Myanmar. It acts as a bridge to the international community and international policymakers by amplifying voices from the ground, and advocating for a rights-based policy narrative.