ဒေသခံ ၃ ဦးသတ်ဖြတ်ခံရသည့် စစ်ကိုင်းတိုင်း၊ ဒီပဲယင်းမြို့နယ် အနောက်ခြမ်း ဆုံကုန်းကျေးရွာတွင် မီးရှို့ဖျက်ဆီးခံရသည့် မော်တော်ယာဉ်တစ်စီးကို ဒီဇင်ဘာ ၂၂ ရက်က တွေ့ရစဉ်။ ဓာတ်ပုံ − ပေးပို့  

စစ်တပ်က လေးရက်ကြာ တပ်စွဲပြီးနောက် ၎င်းတို့ အသုံးပြုခဲ့သည့် ရဟတ်ယာဉ်ကွင်းအနီး နှိပ်စက်၊ သတ်ဖြတ်ခံရသူ ၃ဦး၏ ရုပ်အလောင်းများကို ဒေသခံတို့ ရှာတွေ့ခဲ့သည်။

By Myanmar Now

**သတင်းအတွင်း စိတ်မချမ်းမြေ့ဖွယ်ဓာတ်ပုံများပါဝင်ကြောင်း ကြိုတင်အသိပေးအပ်ပါသည်**

စစ်ကောင်စီတပ်ဖွဲ့ဝင်များ ၄ ရက်ကြာ စခန်းချခဲ့သည့် စစ်ကိုင်းတိုင်း၊ ဒီပဲယင်းမြို့နယ် အနောက်ခြမ်း နှောဒေသ၊ ဆုံကုန်းကျေးရွာအနီးတွင် သတ်ဖြတ်ပြီး ကျင်းတစ်ခုထဲတွင် မြှုပ်နှံခံရသည့် ဒေသခံ ၃ ဦး၏ ရုပ်အလောင်းများကို ယမန်နေ့ (ဒီဇင်ဘာ ၂၁) တွင် ဒေသခံတို့ ရှာတွေ့ခဲ့သည်။

ဒီဇင်ဘာ ၁၇ မှ စ၍ ဆုံကုန်းရွာ၌ တပ်စွဲခဲ့သည့် စစ်သား ၂၀၀ ခန့်  ပြန်လည် ထွက်ခွာပြီး နောက်တစ်ရက်တွင် ဆုံကုန်းရွာနှင့် တစ်မိုင်ကျော်ကွာဝေးသည့် စစ်ရဟတ်ယာဉ် အဆင်း အတက် ပြုလုပ်သည့် နေရာ အနီး ဖိနပ်ခြေရာများတွေ့သဖြင့် အနီးရှိ မြေပုံကို တူးဖော်ကြည့်ရာ ထိုသို့တွေ့ရခြင်း ဖြစ်ကြောင်း ကိုယ်တိုင် ရှာဖွေခဲ့သူ တစ်ဦးက ပြောသည်။

၅၅ နှစ် အရွယ်ဦးမြတ်သင်း၊ အသက် ၄၀ အရွယ် ဦးမျိုးနိုင်နှင့် ၁၂ နှစ်အရွယ် မောင်အောင်ဌေးတို့ ရုပ်အလောင်းများ ဖြစ်သည်ဟု ၎င်းက ပြောသည်။

“သေနတ်ဒဏ်ရာတွေ ဘယ်ဘက် နို့အုံအောက်မှာ။  ၃ ယောက်စလုံးပဲတွေတယ်။ မျက်ခွက်တွေထိုးထားတဲ့ ဒဏ်ရာ ဒဏ်ချက်တွေ၊ ဗိုက်တွေကန်ထားတဲ့ ဒဏ်ရာ ဒဏ်ရာချက်တွေ တွေ့ရတယ်။ ဖြစ်သလိုပဲ သုံးယောက်စလုံးကို ထပ်ပြီး တစ်ကျင်းထဲ မြုပ်ထားတာပါ”ဟု ဒေသခံက ပြောသည်။

သတ်ဖြတ်ခံရသူများမှာ ထိုစစ်ကြောင်းက ဖမ်းသွားသည့် ဒေသခံ ၁၀ ဦးစာရင်းတွင် ပါဝင်ပြီး ကျန် ၇ ဦး ပြန်လည်လွတ်မြောက်လာသည်ဟု နှောဒေသ ပြည်သူ့ကာကွယ်ရေးအဖွဲ့ (PDF) ခေါင်းဆောင် ဗိုလ်တစ္ဆေ ကလည်း ပြောသည်။

“သူတို့ ရိုက်နှက်ထားတဲ့ ဒဏ်ရာတွေတွေ့တယ်။ သေနတ်နဲ့ ပစ်ထားတဲ့ ဒဏ်ရာတွေတွေ့တယ်။ ပြီးတော့ အဲဒီ နားမှာ ကျည်ခွံ ၇ ခွံနဲ့ မပေါက်သေးတဲ့ ကျည်တစ်တောင့်လည်း တွေ့တယ်” ဟု PDF ခေါင်းဆောင်က ပြောသည်။

“အသက် ၁၂ နှစ်အရွယ် ကိုအောင်ဌေးကတော့ သူက စိတ်သိပ်မနှံ့တော့  လျှောက်ပြောတာပေါ့။ စစ်ကြောင်းတွေလာတော့ တွေ့တယ် ဘာညာတွေပြောတော့ စစ်သားတွေက အဟုတ်မှတ်ပုံရတယ်၊ အဟုတ် မှတ်ပြီး လျှောက်မေးတော့ လိုက်ပြတဲ့နေရာတွေက တလွဲတွေ။ အဲဒါနဲ့ သတ်လိုက်ပုံရပါတယ်”

သတင်းရင်းမြစ်တချို့ကလည်း မောင်ဌေးအောင်သည် အသက် ၁၆ နှစ်ဟု ပြောကြသည်။

ဖမ်းဆီးခံရသူ ၁၀ ဦးမှာ စစ်တပ်က ဝင်ရောက်စီးနင်းချိန်တွင် ရှောင်တိမ်းရန် နောက်ကျနေသူများနှင့် နေအိမ်သို့ ပြန်ကာ စားနပ်ရိက္ခာသွားရောက်ယူငင်သူများဖြစ်သည်ဟု အထက်ပါ သတင်းရင်းမြစ်များက ဆိုသည်။

လွတ်မြောက်လာသူများနှင့် အဆက်အသွယ်မရသေးသလို ထိုဖြစ်စဉ်နှင့် ပတ်သက်၍ အသေးစိတ် မသိရသေးပေ။

ဆုံကုန်းရွာ၌ စစ်ရဟတ်ယာဉ် ဆင်းတက်မှုများ လုပ်နေသည့် ဒီဇင်ဘာ ၂၀၊ မွန်းလွဲ ၃ နာရီခန့် တွင် ထိုနေရာမှ သေနတ်သံများထွက်ပေါ်လာသည်ကို ပုန်းခိုရာနေရာမှ ကြားခဲ့ရကြောင်း အထက်ပါ ဒေသခံက ပြောသည်။

“သေနတ်သံကြားတဲ့နေရာကို  ဆက်စပ်ပြီးတော့ သွားရှာလိုက်တာပေါ့” ဟု ထိုသူက ဆိုသည်။

စစ်ကိုင်းတိုင်း၊ ဒီပဲယင်းမြို့နယ် အနောက်ခြမ်း နှောဒေသ၊ ဆုံကုန်းကျေးရွာအနီးတွင် သတ်ဖြတ်ခံထားရသူများကို မြေကျင်းတစ်ခုအတွင်း ဒီဇင်ဘာ ၂၁ရက်က ရှာဖွေတွေ့ရှိစဉ်။ ဓာတ်ပုံ − ပေးပို့