စစ်ကောင်စီနဲ့ ပူးပေါင်းဆောင်ရွက်တာတွေ ရပ်တန့်ဖို့ ကုလကို အရပ်ဖက်အဖွဲ့တွေ တောင်းဆို
10 ဒီဇင်ဘာ 2021
မြန်မာအာဏာသိမ်းစစ်တပ်ကို တရား၀င်အစိုးရအဖြစ် သဘောသက်ရောက်စေတဲ့ ပူးပေါင်းဆောင်ရွက်မှုအားလုံးကို ရပ်တန့်ဖို့ ကုလသမဂ္ဂအဖွဲ့အစည်းတွေ၊ ရန်ပုံငွေနဲ့ အစီအစဥ်တွေအားလုံးကို ကမ္ဘာတ၀န်းမှာရှိတဲ့ အရပ်ဖက်လူ့အဖွဲ့အစည်းပေါင်း ၂၅၅ ဖွဲ့က တောင်းဆိုလိုက်ပါတယ်။
စစ်ကောင်စီဟာ မြန်မာပြည်သူတွေ အတိဒုက္ခရောက်အောင် ဆက်လက်လုပ်ဆောင်နေပြီး လူ့အခွင့်အရေးကပ်ဆိုက်မှုနဲ့ လူသားချင်းစာနာထောက်ထားမှုဆိုင်ရာ အကျပ်အတည်းကိုလည်း ပိုမိုဆိုးရွားစေတာကြောင့် စစ်ကောင်စီနဲ့ MOU နားလည်မှု စာချွန်လွှာ ထိုးတာ၊ အစည်းအ၀ေးတွေမှာ စစ်ကောင်စီ ကိုယ်စားလှယ်တွေကို ဖိတ်ကြားတာတွေလည်း မလုပ်ကြဖို့ တိုက်တွန်းထားပါတယ်။
ကုလသမဂ္ဂအဖွဲ့အစည်းတွေဟာ ဒီလို လုပ်ရပ်တွေလုပ်ဆောင်ပြီး စစ်ကောင်စီကို တရား၀င်အစိုးရဖြစ်အောင် ပံ့ပိုးပေးနေသလို စစ်တပ်ရဲ့ ၀ါဒဖြန့်မှုတွေကို မီးလောင်ရာလေပင့်လုပ်ဆောင်ဖို့ နေရာပေးနေတယ်လို့လည်း ဆိုပါတယ်။
ကုလသမဂ္ဂမှာ စစ်ကောင်စီက တင်သွင်းတဲ့ ကိုယ်စားလှယ်ကို ပယ်ချဖို့အတွက် လုံခြုံရေးကောင်စီရဲ့ မကြာသေးခင်က ဆုံးဖြတ်ချက်ဟာ အာဏာသိမ်းစစ်တပ်ဟာ မြန်မာနိုင်ငံ ကိုယ်စားပြုခွင့်မရဘူးဆိုတဲ့ အတည်ပြုချက် ဖြစ်တယ်လို့လည်း ထောက်ပြထားပါတယ်။
ဒါပေမဲ့ ကုလသမဂ္ဂဖွံဖြိုးရေးအစီအစဥ် UNDP က ပူးပေါင်းကျင်းပတဲ့ အွန်လိုင်းအစည်းအ၀ေးမှာ စစ်ကောင်စီ နိုင်ငံခြားရေး၀န်ကြီး တက်ရောက်ခဲ့တာ၊ တခြား ကုလသမဂ္ဂအဖွဲ့အစည်းတွေရဲ့ ထိပ်သီးဆွေးနွေးပွဲတွေ၊ တွေ့ဆုံပွဲတွေနဲ့ တခြားပွဲအခမ်းအနားတွေမှာလည်း စစ်ကောင်စီဘက်က တက်ရောက်တာကို အံ့အားသင့်ဖွယ်တွေ့ရှိရတယ်လို့လည်း ပြောပါတယ်။
ကုလသမဂ္ဂအနေနဲ့ မြန်မာပြည်သူတွေနဲ့အတူ ရပ်တည်ရမှာ ဖြစ်ပြီး အထွေထွေညီလာခံရဲ့ သဘောတူမူကြမ်းနဲ့အညီ ဒီမိုကရေစီနဲ့ ပြည်သူတွေရဲ့ သဘောဆန္ဒကို ထောက်ခံအားပေးကြောင်း ထင်ထင်ရှားရှား ပြသရမယ်လို့လည်း ဆိုပါတယ်။
အရပ်သားတွေနဲ့ ငြိမ်းချမ်းစွာဆန္ဒပြတဲ့ပြည်သူတွေအပေါ် အာဏာသိမ်းစစ်တပ်ရဲ့ အကြမ်းဖက်မှုတွေကို အဆုံးသတ်ဖို့နဲ့ နိုင်ငံရေးအကျဥ်းသားတွေအားလုံး ချက်ချင်းပြန်လွှတ်ပေးဖို့ကိုလည်း ကုလသမဂ္ဂက တောင်းဆိုပေးဖို့ တိုက်တွန်းထားပါတယ်။
စစ်ကောင်စီဟာ လူသားချင်းစာနာထောက်ထားမှုဆိုင်ရာ အကျပ်အတည်းကို ဖြေရှင်းဖို့ မိတ်ဖက်အဖွဲ့အစည်းမဟုတ်ပဲ ဒီပြဿနာ အရင်းခံဖြစ်တယ်လို့လည်း ထောက်ပြထားပါတယ်။
