ဇင်ကိုထွန်း – တလုပ်မြို့လူငယ် မသေဆုံးမီ စစ်ကောင်စီတပ်က နှိပ်စက်ခဲ့

May 14th, 2021  •  Author: Zin Ko Htun (Myingyan)  •  1 minute read
Featured image

ဒဏ်ရာဗလပွနှင့် တက္ကသိုလ်ကျောင်းသား ကိုဇင်ကိုထွန်း၏ ရုပ်အလောင်း အိမ်ပြန်ရောက်လာရာ လက်မောင်း ဗကသအလံ ဆေးမင်ကြောင်ရုပ်လည်း မီးရှို့ဖျက်ဆီးခံထားရသည်ကို တွေ့ရသည်

မေ ၁၂ ရက်နေ့က မြင်းခြံ၊ တလုပ်မြို့ကျေးရွာတွင် တက္ကသိုလ်ကျောင်းသား ကိုဇင်ကိုထွန်း အဖမ်းခံရပြီး နောက်တစ်နေ့တွင် ဒဏ်ရာများစွာနှင့် သူ၏ ရုပ်အလောင်းကိုသာ မိသားစုက ပြန်ရခဲ့သည်။

မြင်းခြံနည်းပညာတက္ကသိုလ် ပထမနှစ်ကျောင်းသား ၂၃ နှစ်အရွယ် ကိုဇင်ကိုထွန်း၏ ညာဘက်လက်မောင်းတွင် ထိုးထားသည့် ဗမာနိုင်ငံလုံးဆိုင်ရာကျောင်းသားသမဂ္ဂများအဖွဲ့ချုပ် အလံနေရာ၌ သံပူဖြင့် ကပ်ထားသည်ဟု ယူဆရသော ဒဏ်ရာကို မိသားစုနှင့် မိတ်ဆွေများ တွေ့လိုက်ရသည်။

တိုက်ပွဲအတွင်း ဘယ်ဘက်တံတောင်ဆစ်တွင် ရရှိခဲ့သည့် သေနတ်ဒဏ်ရာအပြင် မည်သည့်အတွက်ကြောင့်ရရှိသည်ဟု အတည်မပြုနိုင်သော ဘယ်ဘက်ရင်အုံဖောက်ထွက်ဒဏ်ရာပါ ရှိနေသည်ဟု ကိုဇင်ကိုထွန်း၏ မိသားစုနှင့် သူငယ်ချင်းများက ယူဆထားကြသည်။

“ဒဏ်ရာနဲ့ အဖမ်းခံရပြီး စစ်ကြောရေးမှာ သေဆုံးသွားတယ်လို့ပဲ ကျနော်ကတော့ ယူဆတယ်။ ကျန်တာ ဘာမှမသိရဘူး”ဟု မိသားစုဝင်တစ်ဦးက Myanmar Now ကို ပြောသည်။

ညောင်တိုရွာသား ကိုဇင်ကိုထွန်းမှာ မေ ၁၂ရက်တွင် မြင်းခြံမြို့နှင့် ခုနှစ်မိုင်ခန့်အကွာ၊ ဧရာဝတီမြစ်အရှေ့ဘက်ကမ်းရှိ တလုပ်မြို့ကျေးရွာမှ ဒေသခံ ခုခံရေးသမားများကို သွားရောက်ကူညီရင်း ဖမ်းဆီးခံခဲ့ရခြင်းဖြစ်သည်။

အနီရောင်ဖြင့် ဝိုင်းပြထားသူမှာ စစ်ကြောရေးမှာ ကျဆုံးခဲ့တဲ့ မောင်(ဇင်ကိုထွန်း) ဖြစ်ပါတယ်။

သို့သော် ယင်းနေ့ညပိုင်း စစ်တပ်ပိုင် မြဝတီရုပ်မြင်သံကြားက တလုပ်မြို့တိုက်ပွဲအတွင်း ဖမ်းဆီးခံရသူ ၆ဦးအကြောင်း သတင်းထုတ်ပြန်ရာတွင် သုံးထားသည့် ဓာတ်ပုံ၌ ကိုဇင်ကိုထွန်း မပါဝင်ကတည်းက အသက်သေဆုံးသွားနိုင်ခြေရှိသည်ဟု ယူဆမိခဲ့ကြောင်း ၎င်း၏ မိသားစုဝင်က ပြောသည်။

နောက်တစ်ရက် နံနက် ၉နာရီခွဲခန့်တွင် မြင်းခြံအမှတ် ၂ ရဲစခန်းက ကိုဇင်ကိုထွန်းသေဆုံးကြောင်း၊ မြင်းခြံပြည်သူ့ဆေးရုံကြီးတွင် ရုပ်အလောင်း သွားရောက်ထုတ်ယူရန် ကြားလူတစ်ဦးမှတစ်ဆင့် အသိပေးမှုခဲ့ကြောင်း အဆိုပါမိသားစုဝင်ထံမှ သိရသည်။

“မြင်းခြံဆေးရုံမှာ အလောင်းတစ်ခုရှိတယ်။ ပိုင်ရှင်မဲ့သလိုဖြစ်နေတယ်ပေါ့။ ဆေးရုံရောက်တော့ ညီလေးရဲ့ သင်္ကေတတွေတွေ့တော့ အတည်ပြုပြီးတော့ ထုတ်ခဲ့တာပေါ့”ဟု ၎င်းက ပြောသည်။

ကိုဇင်ကိုထွန်း၏ ဈာပနကို ယနေ့ (မေ ၁၄) နံနက်ပိုင်းက ဇာတိမြေ ညောင်တိုရွာသုဿန်တွင် ကျင်းပပြုလုပ်ခဲ့သည်။

ကိုဇင်ကိုထွန်းသည် မြင်းခြံနည်းပညာကောလိပ်ကျောင်းသားများသမဂ္ဂ အဖွဲ့ဝင်တစ်ဦးလည်းဖြစ်သည်။

တက္ကသိုလ်ကျောင်းသား အဖမ်းခံရပြီး ဒဏ်ရာများစွာနှင့် သေဆုံးသွားသည့်အကြောင်း စစ်ကောင်စီပြန်ကြားရေးဌာနကို မေးမြန်းရန် ကြိုးစားသော်လည်း ဆက်သွယ်၍ မရသေးပေ။

English version


Original post: Myanmar Now

Send this to a friend