စစ်အာဏာသိမ်းမှု ၅ နှစ်ပြည့် ထုတ်ပြန်ကြေညာချက်

ယနေ့သည် စစ်တပ်က ပြည်သူ့အာဏာကို မတရားသိမ်းပိုက်ခဲ့သည့် (၅) နှစ်မြောက် နှစ်ပတ်လည်နေ့ ဖြစ်ပါသည်။ ဤငါးနှစ်တာကာလအတွင်း ပြည်သူလူထုသည် သတ်ဖြတ်မှု၊ မီးရှို့ဖျက်ဆီးမှု၊ အတင်းအကျပ် ရွှေ့ပြောင်းခိုင်းစေမှုနှင့် ဖမ်းဆီးနှိပ်စက်မှုပေါင်းစုံကို နေ့စဉ်နှင့်အမျှ ခါးသီးစွာ ခံစားခဲ့ကြရပါသည်။ ဤကျူးလွန်မှုများသည် ရည်ရွယ်ချက်ရှိရှိ စနစ်တကျနှင့် ကျယ်ကျယ်ပြန့်ပြန့် ကျူးလွန်နေသော စစ်ရာဇဝတ်မှုများနှင့် လူသားမျိုးနွယ်စုအပေါ် ကျူးလွန်သည့် ရာဇဝတ်မှု (Crimes against Humanity) များဖြစ်ကြောင်း ထင်ရှားနေပါသည်။

သို့ရာတွင် ပြည်သူလူထုသည် အခက်အခဲပေါင်းစုံကြားမှ တော်လှန်ရေးစိတ်ဓာတ်ကို မယိမ်းယိုင်ဘဲ ဆက်လက်တိုက်ပွဲဝင်နေကြဆဲ ဖြစ်ပါသည်။ ပြည်သူလူထုနှင့် တော်လှန်ရေးအင်အားစုများ၏ မဆုတ်မနစ်သော ခုခံတွန်းလှန်မှုကြောင့် အကြမ်းဖက်စစ်ကောင်စီသည် စစ်ရေးနှင့် အုပ်ချုပ်ရေး နယ်ပယ်နှစ်ခုစလုံးတွင် အဘက်ဘက်မှ ဆုတ်ယုတ်ပျက်စီးမှုကို ဆက်တိုက်ကြုံတွေ့နေရပါသည်။ စစ်ကောင်စီသည် ၎င်းတို့၏ စစ်ရေးအရှုံးများကို ဖုံးကွယ်ရန် အရပ်သားပြည်သူများကို ရည်ရွယ်ချက်ရှိရှိ ပစ်မှတ်ထားကာ လေကြောင်းမှ တိုက်ခိုက်ခြင်း၊ ရွာလုံးကျွတ် မီးရှို့ခြင်းနှင့် ဖက်ဆစ်အတွေးအခေါ်ဖြင့် အမျိုးသမီး၊ ကလေးသူငယ်နှင့် သက်ကြီးရွယ်အိုများကိုပါမကျန် ရက်စက်စွာ သတ်ဖြတ်ခြင်းများကို ဆက်လက်လုပ်ဆောင်လျက်ရှိပါသည်။

ထို့ပြင် စစ်ကောင်စီသည် ယိုင်နဲ့လာသော စစ်အင်အားကို ဖြည့်ဆည်းရန် မတရားသော စစ်မှုထမ်းဥပဒေဖြင့် လူငယ်များကို အတင်းအကျပ် ဖမ်းဆီးစုဆောင်းနေပြီး၊ အသက်အရွယ်နှင့် လိင်အမျိုးအစား မခွဲခြားဘဲ စစ်မှုထမ်းခိုင်းစေခြင်းဖြင့် မျိုးဆက်သစ်များ၏ အနာဂတ်ကို ဖျက်ဆီးနေပါသည်။ ပြည်ပသို့ ထွက်ခွာ၍ ပညာသင်ကြားခြင်းနှင့် အလုပ်လုပ်ကိုင်ခြင်းများကိုပါ ကန့်သတ်ပိတ်ပင်ကာ လူငယ်များ၏ အခွင့်အရေးကို ခြေနင်းချေဖျက်နေပါသည်။ စီးပွားရေးပြိုလဲမှု၊ ငွေကြေးတန်ဖိုး ကျဆင်းမှုနှင့် ကုန်ဈေးနှုန်း မြင့်တက်မှုဒဏ်များကိုလည်း ပြည်သူလူထုကသာ ခါးစည်းခံစားနေရပါသည်။

စစ်တပ်သည် ၎င်းတို့၏ အာဏာကို နိုင်ငံရေးအရ တရားဝင်မှုရရှိစေရန် “အတုအယောင် ရွေးကောက်ပွဲ” ကို ပြုလုပ်ပြီးတရားဝင်မှုရရန် ကြိုးပမ်းနေပါသည်။ ၂၀၀၈ ဖွဲ့စည်းပုံအခြေခံဥပဒေအောက်ရှိ ရွေးကောက်ပွဲသည် စစ်အာဏာရှင်စနစ်ကို သက်ဆိုးရှည်စေရန်သာ ဖြစ်ပြီး ပြည်သူ့ဆန္ဒကို ကိုယ်စားမပြုနိုင်သည့်အတွက် စစ်တပ်က ပြုလုပ်သည့် မည်သည့်ရွေးကောက်ပွဲကိုမဆို ကျွန်ုပ်တို့ အရပ်ဘက်အဖွဲ့အစည်းများက ပြတ်ပြတ်သားသား ကန့်ကွက်ရှုတ်ချပါသည်။

အကြမ်းဖက်မှုအတွက် တာဝန်ရှိသူများ အပြစ်ပေးခြင်းမှ ကင်းလွတ်နေမှုကို ကျွန်ုပ်တို့ အဆုံးသတ်လိုပါသည်။ ထို့ကြောင့် နိုင်ငံတကာရာဇဝတ်မှုတရားရုံး (ICC)၊ မြန်မာနိုင်ငံဆိုင်ရာ လွတ်လပ်သော စုံစမ်းစစ်ဆေးမှု ယန္တရား (IIMM) အပါအဝင် နိုင်ငံတကာတရားစီရင်ရေး ယန္တရားများမှတစ်ဆင့် တရားမျှတမှု ဖော်ဆောင်ရေး ကြိုးပမ်းမှုများကို ကျွန်ုပ်တို့ အပြည့်အဝ ထောက်ခံပါသည်။ နိုင်ငံတကာအသိုင်းအဝိုင်းအနေဖြင့် စစ်ကောင်စီအပေါ် ထိရောက်သော အရေးယူမှုများ တိုးမြှင့်လုပ်ဆောင်ရန်နှင့် ပြည်သူလူထုဘက်မှ ခိုင်ခိုင်မာမာ ရပ်တည်ပေးရန် တောင်းဆိုပါသည်။

အထူးသဖြင့် စစ်အုပ်စု၏ လက်နက်သဖွယ် အသုံးချနေသော လိင်အခြေပြု အကြမ်းဖက်မှုများနှင့် အဓမ္မပြုကျင့်မှုများကို ပြင်းထန်စွာ ရှုတ်ချပါသည်။ အမျိုးသမီးများ၊ LGBTQI+ အသိုင်းအဝိုင်း၊ တိုင်းရင်းသားလူနည်းစုများနှင့် မသန်စွမ်းသူများအပေါ် ကျူးလွန်မှုများအတွက် တရားမျှတမှု ဖော်ဆောင်ရေး၊ ပြန်လည်ကုစားရေးနှင့် ပြန်လည်ထူထောင်ရေး လုပ်ငန်းစဉ်များသည် ပြည်သူ့တော်လှန်ရေး၏ အဓိကဗဟိုချက် ဖြစ်ရပါမည်။

ကျွန်ုပ်တို့ ပြည်သူအခြေပြုအရပ်ဖက် အဖွဲ့အစည်းများသည် ပြည်သူ့အာဏာကို ပြည်သူ့လက်ဝယ်သို့ ပြန်လည်ရောက်ရှိရေးနှင့် စစ်အာဏာရှင်စနစ် အမြစ်ပြတ် တိုက်ဖျက်ရေးအတွက် ပြည်သူနှင့်အတူ အဆုံးအထိ တိုက်ပွဲဝင်သွားမည် ဖြစ်ပါသည်။ တော်လှန်ရေးအင်အားစုများအကြား ညီညွတ်မှုနှင့် တန်းတူညီမျှ ပါဝင်မှုသည် အောင်ပွဲအတွက် သော့ချက်ပင် ဖြစ်ပါသည်။

အတုအယောင် ရွေးကောက်ပွဲကို အလုံးစုံ ဆန့်ကျင်ကြ။

စစ်အာဏာရှင်စနစ် ကျဆုံးပါစေ။

ပြည်သူ့ဒီမိုကရေစီတော်လှန်ရေး အောင်မြင်ပါစေ။

pdf ဒေါင်းလုတ်ရယူရန် မြန်မာဘာသာ | အင်္ဂလိပ်ဘာသာ

မူရင်းပို့စ်