စစ်ကိုင်းက ဓာတ်ပုံဆရာသေဆုံးမှု စုံစမ်းစစ်ဆေးဖို့ ကုလကို RSF တောင်းဆို
ဓာတ်ပုံဆရာ ကိုအေးကျော်
By BBC Burmese
စစ်ကိုင်းမြို့က စစ်အာဏာသိမ်းဆန့်ကျင်ရေးဆန္ဒပြပွဲတွေကို မှတ်တမ်းတင်ခဲ့သူဓာတ်ပုံဆရာ ကိုအေးကျော်ကို စစ်ကောင်စီတပ်ဖွဲ့ဝင်တွေက လာရောက်ဖမ်းဆီးသွားခဲ့ပြီးနောက် နာရီပိုင်းအတွင်းသေဆုံးခဲ့မှုကို စုံစမ်းစစ်ဆေးဖို့ ကုလသမဂ္ဂအထူးကိုယ်စားလှယ်တွေကို နယ်စည်းမခြားသတင်းထောက်များအဖွဲ့(RSF)က တောင်းဆိုလာပါတယ်။
အသက် ၄၈ နှစ်အရွယ် ကိုအေးကျော်ဟာ ပြီးခဲ့တဲ့ ဇူလိုင်လ ၃၀ ရက် မနက် ၂ နာရီဝန်းကျင်မှာ စစ်ကိုင်းမြို့က သူ့နေအိမ်မှာ စစ်ကား ၆ စီးနဲ့လာတဲ့ စစ်ကောင်စီ တပ်ဖွဲ့ဝင်တွေရဲ့ ဖမ်းဆီးတာခံခဲ့ရပါတယ်။
ဖမ်းဆီးခံရပြီး နာရီပိုင်းအကြာ အဲဒီနေ့ နေ့လယ်ပိုင်းမှာတော့ စစ်ကိုင်းဆေးရုံ ရင်ခွဲရုံရောက်နေတဲ့ ကိုအေးကျော်ရဲ့ အလောင်းကို လာထုတ်ဖို့ မြို့နယ်အုပ်ချုပ်ရေးပိုင်းကနေ မိသားစုဝင်တစ်ဦးထံ အကြောင်းကြားခဲ့တာလည်းဖြစ်ပါတယ်။
လက်ရှိမှာ သီတင်း ၂ ပတ်ကျော်ကြာတဲ့အထိ ကိုအေးကျော်သေဆုံးရတဲ့အကြောင်းရင်း ပျောက်ဆုံးနေတာကြောင့် ဒီဖြစ်ရပ်ကို စုံစမ်းဖော်ထုတ်ဖို့ ကုလအထူးကိုယ်စားလှယ်တွေကို တောင်းဆိုရတာလို့RSF ရဲ့ အာရှ-ပစိဖိတ်ရေးရာ အရာရှိက ပြောပါတယ်။
Original Post: BBC Burmese
