ညှဉ်းပန်းနှိပ်စက်သတ်ဖြတ်ခံရသည့် ကိုချမ်းမင်းနောင်

By ဧရာဝတီ

ရန်ကုန်တိုင်း၊ ကျောက်တန်းမြို့နယ်တွင် ကျောက်တန်းပြည်သူ့ကာကွယ်ရေးတပ်ဖွဲ့ (KPDF) အဖွဲ့ဝင်တဦး ဖမ်းဆီးပြီး ညှဉ်းပန်းနှိပ်စက် သတ်ဖြတ်ခဲ့ကြောင်း KPDF အဖွဲ့က ဆိုသည်။

KPDF လက်အောက်ခံ ချေဂွေဗားရား (ကျောက်တန်း) ပြောက်ကျားအဖွဲ့မှ ကိုချမ်းမင်းနောင်ကို စစ်ကောင်စီ လက်အောက် ခံ ကျောက်တန်းမြို့နယ်၊ စံချိန်မီရပ်ကွက်အုပ်ချုပ်ရေးမှူး၏ တပည့်များက ဖမ်းဆီးပြီးနောက် နှိပ်စက်သတ်ဖြတ်ခဲ့ခြင်း ဖြစ် ကြောင်း KPDF အဖွဲ့၏ ပြောရေးဆိုခွင့်ရှိသူ ကိုဒီပါက ဧရာဝတီသို့ ပြောသည်။

ကိုချမ်းမင်းနောင်သည် ပြီးခဲ့သည့် ဧပြီ ၂ ရက်က ကျောက်တန်းမြို့နယ်၊ စံချိန်မီရပ်ကွက်အုပ်ချုပ်ရေးမှူး ဦးစိုးမိုးဆိုသူအား သွားရောက်လုပ်ကြံစဉ် ဖမ်ဆီးခံလိုက်ရခြင်း ဖြစ်ကြောင်း ၎င်းက ဆိုသည်။

ကိုဒီပါက “ဧပြီ ၂ ရက်က အဖမ်းခံလိုက်ရတာ။ ဒလန်အုပ်ကြီးနဲ့တပည့်က စံချိန်မီရပ်ကွက် ၆ လမ်းကို အဖွဲ့လိုက်လာတဲ့အချိန် ကိုချမ်းမင်းနောင်တို့အဖွဲ့က ဝင်ရောက်ရှင်းလင်းတဲ့အချိန်မှာ သေနတ် ချို့ယွင်းမှု ဖြစ်သွားတာပေါ့။ အဲဒီအချိန်မှာ စည်ပင်ဝန်ထမ်း ဂျိမ်းစ်ဘွန်းလို့ ခေါ်တယ်၊ သူနဲ့ အခြားတယောက် စုံစမ်းဆဲကဝင်လုံးပြီး ခဲနဲ့ထုပြီး ဖမ်းတယ်။ အုပ်ချုပ်ရေးမှူးရဲ့ လူမိုက် အဖွဲ့တွေက နောက်ကနေ ရောက်လာပြီးတော့ ဓားနဲ့ထိုးတယ်” ဟု ပြောသည်။

ကိုချမ်းမင်းနောင်တို့အဖွဲ့၏ ပစ်ခတ်မှုကြောင့် စစ်ကောင်စီသတင်းပေး စံချိန်မီရပ်ကွက်အုပ်ချုပ်ရေးမှူးနှင့် တပည့်ဖြစ်သူတို့ သေဆုံးသွားခဲ့ကြောင်း သိရသည်။
ဖမ်းဆီးခံရသည့် ကိုချမ်းမင်းနောင်ကို ကြိုးဖြင့်ချည်ကာ ကားဖြင့် ကျောက်တန်းမြို့နယ်၊ အနောက်ပိုင်းရပ်ကွက်၊ ရွှေမှော်ဝန်းခန်းမသို့ တရွတ်တိုက် ဆွဲခေါ်သွားကြောင်း ကျောက်တန်းမြို့ခံ သတင်းရင်းမြစ်များ ၏ ပြောကြားချက်ကို အခြေခံ၍ ကိုဒီပါက ပြောသည်။

“ခန်းမရောက်တော့လည်း နားရွက်တွေကို ဓားနဲ့လှီးတယ်။ ကျောကုန်းတွေကို ဓားနဲ့မွှန်းတယ်။ ဓားနဲ့ထိုးတယ်။ လက်ခုံပေါ် မှာ ဓားနဲ့စိုက်ထိုးထားတဲ့အရာတွေကို တွေ့ရတယ်။ ခြေထောက်တွေ၊ လက်တွေ ရိုက်ချိုးပြီး မိုးရေထဲကိုထုတ်ပြီး ပစ်ထား တာတို့၊ နောက် ငယ်ပါကို တုတ်နဲ့ရိုက်၊ ခြေထောက်နဲ့ကန်ပြီး စစ်ကြောမေးမြန်းတာတို့၊ ဆံပင်ကို ပလာယာနဲ့ညှပ်ပြီး ဆွဲ နုတ်တာတွေ လုပ်တယ်လို့ ကျနော်တို့ ကြားရတယ်” ဟု KPDF အဖွဲ့၏ ပြောရေးဆိုခွင့်ရှိသူ ကိုဒီပါက ပြောသည်။

KPDF ထံ ပေးပို့လာသည့် ဓာတ်ပုံများတွင်လည်း လက်ထိပ်ခတ်ထားသည့် ကိုချမ်းမင်းနောင်၏ လက်ခုံ၌ ဓားဖြင့်ထိုးထား သည့်ဒဏ်ရာ၊ မျက်နှာဖူးယောင်ညိုမဲဒဏ်ရာများနှင့် ရင်ဘတ်အားဓားဖြင့်ထိုးခွဲထားသည့် ဒဏ်ရာများကို တွေ့ရသည်။

ညှဉ်းပန်းနှိပ်စက်သတ်ဖြတ်ခံရသည့် ကိုချမ်းမင်းနောင်