ရန်ကုန်၊ နိုဝင်ဘာ ၁၁

ကုလသမဂ္ဂလုံခြုံရေးကောင်စီက နိုဝင်ဘာလ ၈ ရက်နေ့တွင် မြန်မာ့အရေး အစည်းအဝေးခေါ်ယူပြီးနောက် အလွန်စိုးရိမ်ပါသည်ဆိုသော ထုတ်ပြန်ကိုပဲ ထပ်မံ ထုတ်ပြန်ရာ ယင်းထုတ်ပြန်ချက်ကို အလွန်စိတ်ပျက်မိကြောင်း မြန်မာ့ အရပ်ဘက်အဖွဲ့အစည်းများက ထုတ်ပြန်ပြောဆိုလိုက်သည်။

ကုလသမဂ္ဂလုံခြုံရေးကောင်စီက မြန်မာနိုင်ငံတွင် စစ်တပ်က အကြမ်းဖက် မှုများ ရပ်တန့်ရန်၊ အာဆီယံဘုံသဘောတူညီချက်အကောင်အထည်ဖော်ရန်၊ အာဆီယံသံတမန်၏ ညှိနှိုင်းဆောင်ရွက်မှု လမ်းကြောင်းကို ထောက်ခံကြောင်း ထုတ်ပြန်ခဲ့သည်။

ကုလသမဂ္ဂ လုံခြုံရေးကောင်စီက အရေးယူဆောင်ရွက်မှု ထပ်မံ ပျက်ကွက်ခြင်းကြောင့် မြန်မာနိုင်ငံ အရပ်ဘက်အဖွဲ့အစည်းများမှ ကိုယ်စားလှယ်များက “အလွန် စိတ်ပျက်”မိကြောင်း၊ ယနေ့တွင် ကုလသမဂ္ဂလုံခြုံရေးကောင်စီက မြန်မာနိုင်ငံတစ်ဝှမ်းတွင် မကြာသေးမီက အကြမ်းဖက်မှုများ ဖြစ်ပွားပြီးနောက် “အလွန်စိုးရိမ်ပူပန်မှု” ကို ထပ်မံဖော်ပြသည့် သတင်းကြေညာချက်ကို ထပ်မံထုတ်ပြန်ခဲ့ကြောင်း၊ အဆိုပါထုတ်ပြန်ချက်တွင် မြန်မာစစ်တပ်အနေဖြင့် အကြမ်းဖက်မှုများကို ချက်ခြင်းရပ်တန့်ရန် တောင်းဆိုထားသည်။

ချင်းပြည်နယ်တွင် မြန်မာစစ်အစိုးရက တိုက်ခိုက်မှုများ အရှိန်မြင့်လာသဖြင့် အိမ်ခြေ ၂၀၀ ကျော်နှင့် ဘုရားကျောင်း ၂ ခု မီးလောင်မှု ဖြစ်ပွားခဲ့သဖြင့် ဒေသတွင်းနှင့် နိုင်ငံတကာ အရပ်ဘက် လူမှုအဖွဲ့အစည်း ၅၂၁ ဖွဲ့က ကုလသမဂ္ဂ လုံခြုံရေးကောင်စီကို အရေးပေါ် အစည်းအဝေး ခေါ်ယူရန် နိုဝင်ဘာ ၄ ရက်က တောင်းဆိုခဲ့ခြင်းဖြစ်သည်။

မြန်မာစစ်တပ်က ပြည်သူများအပေါ် အကြမ်းဖက်တိုက်ခိုက်နေမှုများကို ရပ်တန့်ရန် နိုင်ငံတကာ အရေးယူဆောင် ရွက်မှုများ ခိုင်မာအောင် ဆောင်ရွက်ရန် လုံခြုံရေးကောင်စီကို တောင်းဆိုခဲ့ပြီး စစ်ကောင်စီကို ကမ္ဘာလုံးဆိုင်ရာ လက်နက်ရောင်းချမှု တားမြစ်ချက်တစ်ရပ် ချမှတ်ရန်လည်း အရပ်ဘက်အဖွဲ့အစည်းများက ကုလသမဂ္ဂလုံခြုံရေးကောင်စီကို တိုက်တွန်းခဲ့သည်။

လက်ရှိတွင် အိန္ဒိယနှင့် ရုရှားတို့ အပါအဝင် ကုလသမဂ္ဂ လုံခြုံရေးကောင်စီအဖွဲ့ဝင်များသည် အာဏာသိမ်း မြန်မာစစ်တပ်ထံ လက်နက်နှင့် စစ်ပစ္စည်းများကို လွှဲပြောင်းရောင်းချခဲ့ပြီး တရုတ်နိုင်ငံသည် အဓိက လက်နက်ထောက်ပံ့သူအဖြစ် စစ်တပ်နှင့် စီးပွားရေး ဆက်လက်လုပ်ကိုင်နေကြောင်း အရပ်ဘက်အဖွဲ့အစည်းများက ပြောသည်။

Progressive Voice မှ ဒေါ်ခင်ဥမ္မာက “ကုလလုံခြုံရေးကောင်စီရဲ့ ဆက်တိုက်လုပ်ဆောင်မှု အားနည်းတဲ့အတွက် အရမ်းစိတ်ပျက်မိပါတယ်။ ကမ္ဘာ့အမြင့်ဆုံး အာဏာပိုင်အဖွဲ့ရဲ့ ‘စိုးရိမ်မှု’ ဆိုတဲ့ စကားလုံးတွေနဲ့ ထုတ်ပြန်ချက်က အပြစ်မဲ့ ပြည်သူများကို လုံးဝ သတ်ဖြတ်နေတဲ့ စစ်အစိုးရကို လျစ်လျူရှုပြီး မြန်မာပြည်သူတွေအပေါ် အမှန်တကယ် ခြိမ်းခြောက်မှုတွေကို လျစ်လျူရှုထားတာပါ။ မြန်မာနိုင်ငံမှာ ပြင်းထန်တဲ့ အကြမ်းဖက်မှုတွေက နိုင်ငံတကာ ငြိမ်းချမ်းရေးနှင့် လုံခြုံရေးကို ထိန်းသိမ်းဖို့ ကုလသမဂ္ဂ လုံခြုံရေးကောင်စီကို စိန်ခေါ်မှုတစ်ရပ်ဖြစ်တဲ့အပြင် ကျရှုံးမှု သက်သေလည်းဖြစ်ပါတယ်။ လုံခြုံရေးကောင်စီရဲ့ လုပ်ဆောင်ချက်ကို ဆက်လက်ပိတ်ဆို့နေတဲ့ အဖွဲ့ဝင်နိုင်ငံတွေက မြန်မာ ပြည်သူတွေရဲ့ ဆင်းရဲဒုက္ခကို ပိုမိုဆိုးရွားစေပြီး ရက်စက်ကြမ်းကြုတ်တဲ့ ရာဇ၀တ်မှုတွေကို ထပ်မံကျူးလွန်ဖို့ စစ်အစိုးရကို တွန်းအားပေးနေတာပါ။ ဒီနိုင်ငံတွေက စစ်အစိုးရရဲ့ ကြီးလေးတဲ့ ရာဇ၀တ်မှုတွေကို ကျူးလွန်မှုတွေကို ထောက်ပံ့နေပြီး ဆက်နွယ်မှုတွေကိုလည်း သူတို့ တာဝန်ခံရမှာ ဖြစ်ပါတယ်။” ဟု သုံးသပ်ပြောဆိုသည်။

ချင်းလူ့အခွင့်အရေးအဖွဲ့မှ Salai Za Ukက “ကုလလုံခြုံရေးကောင်စီမှာ မြန်မာနိုင်ငံ အခြေအနေကို ဆွေးနွေးဖို့ ဆွေးနွေးနေချိန်မှာပဲ ထန်တလန်မှာ အိမ်တွေကို စစ်တပ်က မီးရှို့ဖျက်ဆီးခဲ့ပါတယ်။ ချင်းပြည်နယ်တွင် သြဂုတ်လမှစတင်၍ စစ်ကူများထပ်မံစေလွှတ်ခြင်းကြောင့် ခရစ်ယာန်ဘုရားကျောင်းများနှင့် ဘာသာရေးအဆောက်အအုံ ၂၂ လုံးထက်မနည်းကို မီးရှို့ဖျက်ဆီးကာ ဖျက်ဆီးခဲ့တယ်။ အကြိမ်ကြိမ် တောင်းဆိုနေသော်လည်း ပြည်သူများကို ကယ်တင်ရန် ထိရောက်မှု မရှိသော ခေါင်းဆောင်မှု ကြောင့် ကုလသမဂ္ဂ လုံခြုံရေး ကောင်စီကို ယုံကြည်မှု ပျောက်ဆုံးနေပါတယ်” ဟု ပြောဆိုသည်။

Women Peace Network မှ မဝေဝေနုက “ကုလလုံခြုံရေးကောင်စီရဲ့ အရေးယူဆောင်ရွက်မှု အားနည်းတာက ကြောက်စရာကောင်းတယ်။ ၂၀၁၇ ရိုဟင်ဂျာ လူမျိုးတုံးသတ်ဖြတ်မှု မတိုင်မီနှင့် အပြီးတွင် အရေးယူရန် ပျက်ကွက်ခဲ့ပြီး စစ်တပ်က လူသားမျိုးနွယ်အပေါ် ကျူးလွန်သည့် ရာဇ၀တ်မှုများကို လုံးဝ အပြစ်ပေးခံရခြင်းမရှိပါဘူး။ စစ်တပ်က ကြီးလေးတဲ့ ရာဇ၀တ်မှုတွေ ဆက်ကျူးလွန်နေတာကြောင့် ဒါက ကုလသမဂ္ဂရဲ့ ကျရှုံးမှုဖြစ်ပါတယ်။ ကုလသမဂ္ဂလုံခြုံရေးကောင်စီအနေနဲ့ အရေးယူမှုတွေ လုပ်ဆောင်ပြီး စစ်တပ်ရဲ့ ကျူးလွန်မှုတွေအတွက်တာဝန်ခံလာအောင် လုပ်ဆောင်ရမှာဖြစ်ပါတယ်” ဟု ပြောဆိုသည်။

ဖေဖေါ်ဝါရီလ ၁ ရက်နေ့ အာဏာသိမ်းရန် ကြိုးပမ်းသည့်အချိန်မှစ၍ မြန်မာစစ်တပ်သည် ပြည်သူ ၁၂၅၂ ဦးကို သတ်ဖြတ်ခဲ့ပြီး ပြည်သူ တစ်သောင်းနီးပါးကို ဥပဒေမဲ့ ဖမ်းဆီးထားကြောင်း သိရှိရသည်။

Original post.