မင်းအောင်လှိုင်နှင့် အကြမ်းဖက်စစ်ရာဇဝတ်ဂိုဏ်းကို တော်လှန်ရေးမျက်နှာစာ အသီးသီးတွင် ရွပ်ရွပ်ချွံချွံ ချေမှုန်းအနိုင်ယူနေကြသည့် တော်လှန်ရေးအင်အားစုများကို အရပ်ဘက်အဖွဲ့အစည်းများမှ ဂုဏ်ပြုကြောင်း ထုတ်ပြန်ချက်
07 August 2024
ငြိမ်းချမ်းစွာဆန္ဒဖော်ထုတ်ကြသည့် အရပ်သားပြည်သူများအပေါ် စစ်အင်အားအလွန်အကျွံသုံး အကြမ်းဖက်နှိမ်နင်းမှုများကြောင့် လက်နက်ကိုင်တော်လှန်ရေးနည်းလမ်းကို ရွေးချယ်ခဲ့ကြသည့် တော်လှန်ရေးအင်အားစု အသီးသီးကိုလည်း တိုင်းရင်းသားလက်နက်ကိုင်တော်လှန်ရေး အင်အားစုများက ရသည့်နည်းလမ်း၊ ရှိသည့်ရင်းမြစ်များဖြင့် တစိုက်မတ်မတ် ပံ့ပိုးနေကြသည်ကို အသိအမှတ်ပြု ကျေးဇူးတင်ရှိပါသည်။
ညီနောင်မဟာမိတ် (၃) ဖွဲ့ MNDAA, TNLA, AA ၏ ၁၀၂၇စစ်ဆင်ရေးနှင့်ဟန်ချက်ညီ ကရင်နီ တော်လှန်ရေး အင်အားစုများ၏ ၁၁၁၁ စစ်ဆင်ရေး၊ KNU/KNLA နှင့် မဟာမိတ်များ၏ဒေသအလိုက် ပူးပေါင်းစစ်ဆင်ရေးများ၊ ကချင်လွတ်မြောက်ရေးတပ်မတော်(KIA) နှင့် ပူးပေါင်းမဟာမိတ်များ၏ ၀၃၀၇ စစ်ဆင်ရေး၊ အာရက္ခဒေသနှင့် တအာန်းဒေသစစ်အုပ်စုကင်းစင်ရေး စစ်ဆင်ရေးများ၊ ဒေသအလိုက် ခုခံတော်လှန်လျက်ရှိသည့် LPDF/PDF များ၏ စစ်ဆင်ရေးများ စသည့်ဟန်ချက်ညီ ရဲဝံ့စွန့်စား စစ်ဆင်ရေးများကြောင့် အကြမ်းဖက်စစ်အုပ်စု၏ စစ်စခန်းပေါင်းများစွာကို ချေမှုန်း သိမ်းပိုက်နိုင်ခဲ့ပြီး၊ မင်းအောင်လှိုင်၏ အကြမ်းဖက်စစ်အုပ်စုအန္တရာယ်မှ ကင်းဝေးသော လွတ်မြောက် နယ်မြေများအဖြစ် ထူထောင်နိုင်ခဲ့ကြသည့် သမိုင်းမော်ကွန်းသစ်များအပေါ် ဂုဏ်ပြုအပ်ပါသည်။
မင်းအောင်လှိုင်၏ အကြမ်းဖက်စစ်ရာဇဝတ်ဂိုဏ်း၏ အမိန့်ပေးစနစ်အောက်မှ ၅၈ နှစ် သက်တမ်းရှိ အရှေ့မြောက်ပိုင်းတိုင်းစစ်ဌာနချုပ်ကို မြောက်ပိုင်းမဟာမိတ်နှင့် ပူးပေါင်းအင်အားစုများက ချေမှုန်း သိမ်းပိုက်နိုင်ခြင်းနှင့် ဗျူဟာမြောက် မြို့သိမ်းတိုက်ပွဲများသည် ဖက်ဒရယ်ဒီမိုကရေစီအင်အားစုများ၏ပူးပေါင်းစွမ်းအားဖြင့် စစ်အာဏာရှင်အဆက်ဆက်ကတိုင်းရင်းသားလူမျိုးစုများကို အကြမ်းဖက် ဖိနှိပ်ရန် အသုံးချနေသည့် စစ်ယန္တရားအစိတ်အပိုင်းများကို ချေမှုန်းဖြိုဖျက်နိုင်သည့်မှတ်ကျောက်အဖြစ် သမိုင်းတွင်သော အောင်ပွဲအဖြစ် မှတ်တမ်းတင်အပ်ပါသည်။
မဟာမိတ် အင်အားစုများ၏ စစ်ဆင်ရေးများတွင် အကြမ်းဖက်မင်းအောင်လှိုင်၏ စစ်ရာဇဝတ်ဂိုဏ်းက အမိန့်ပေးအသုံးချစေခိုင်းနေသည့် အရာရှိ၊ အရာခံ၊ အကြပ်တပ်သားများကိုနိုင်ငံတကာ စစ်စည်းကမ်း များအတိုင်း လိုက်နာဆက်ဆံသည့် နမူနာကောင်းများ ပြသနိုင်ခဲ့ခြင်းကိုလည်း အသိအမှတ်ပြု ကြိုဆိုပါသည်။
အကြမ်းဖက်စစ်ရာဇဝတ်ဂိုဏ်းကို ချေမှုန်းရန် ဆင်နွှဲရသည့် ခါးသည်းဖွယ်ရာ စစ်ပွဲများအောင်နိုင်ရေး အတွက် အရပ်ဖက်လူထုလူတန်းစား အင်အားစုအသီးသီး၏ ရဲဝံ့စွန်းစားသည့် အာဏာဖီဆန် လှုပ်ရှားမှုများ၊ ရင်းမြစ်များရှာဖွေ စုစည်းပံ့ပိုးထောက်ပံ့ကြသည့် အင်အားစုများ၊ စစ်ရာဇဝတ်ဂိုဏ်း၏ ကြည်း၊ ရေ၊ လေအကြမ်းဖက်စစ်ဆင်ရေးများကြောင့် ထိခိုက်ဆုံးရှုံးကြရသည့်နေရပ်စွန့်ခွာ စစ်ရှောင်ပြည်သူများကို ကာကွယ်စောင့်ရှောက်ကြသည့် အင်အားစုများ၊ အခြေခံကျန်းမာရေး၊ ပညာရေးဝန်ဆောင်မှုများ ပံ့ပိုးကြသည့်အင်အားစုများ၊ သတင်းအချက်အလက်များ လုံခြုံစွာ စုစည်း စီမံခန့်ခွဲ ဆက်သွယ်ပေးကြသည့် အင်အားစုများ၊ အရေးကြီး၊အရေးပါသည့်တော်လှန်ရေးမျက်နှာစာ အသီးသီးမှ အင်အားစုအသီးသီးကိုထပ်တူ ကျေးဇူးတင် ဂုဏ်ပြုပါသည်။
တော်လှန်ရေးမျက်နှာစာအသီးသီးတွင် အောင်ပွဲများရရှိလာမှုနှင့်အတူ သိမ်းပိုက်နယ်မြေများတွင် ပဋိပက္ခအနည်းဆုံးဖြစ်စေရေးနှင့် တော်လှန်ရေးတခုလုံး၏ အန္တိမရည်မှန်းချက်ဖြစ်သောလူ့အခွင့်အရေး၊ အမျိုးသမီးနှင့် ကလေးသူငယ်များအခွင့်အရေး၊ အလုပ်သမားအခွင့်အရေး၊ လူမှုစီးပွား အခွင့်အရေးများ အပါအဝင် ပြည်သူများ၏ အသက်အိုးအိမ်စည်းစိမ်ကာကွယ်စောင့်ရှောက်ရေး ဆိုင်ရာမူဝါဒများနှင့် ကိုးကွယ်ယုံကြည်မှု၊ ဘာသာစကားနှင့် ယဉ်ကျေးမှုဆိုင်ရာအခွင့်အရေးများ အပါအဝင် ဒေသခံလူမျိုးပေါင်းစုံ၏ အခွင့်အရေးများကိုတန်းတူထား လေးစားဆက်ဆံ၍ အာမခံချက်ပေးရေးကိုဒေသခံပြည်သူများနှင့် အတူတကွ အလေးထားဖော်ဆောင်ရန်မိမိတို့က အလေးအနက်ပြု တိုက်တွန်း အပ်ပါသည်။
အထူးအားဖြင့် တော်လှန်ရေးအင်အားစုများ၏ ပင်မတာဝန်ဖြစ်သည့် စစ်ပွဲများကြောင့် အသက် အိုးအိမ်များ၊ သားသမီးမိဘ၊မောင်နှမ၊ မိတ်ဆွေသူငယ်ချင်းများ ဆုံးရှုံးပျက်စီးကြရသည့်မိဘပြည်သူများအတွက် တရားမျှတမှုများ ပြန်လည်ဖော်ဆောင်ဖြည့်ဆည်းပေးကြရမည့် တာဝန်များကို မပျက်မကွက် တာဝန်ယူတာဝန်ခံ ဆောင်ရွက်နိုင်ကြရန် လေးနက်စွာ ဆန္ဒပြုတောင်းဆိုအပ်ပါသည်။
တိုင်းရင်းသား လူမျိုးစုအသီးသီးက နှစ်နှစ်ကာကာ လိုလားတောင့်တနေကြသော စစ်အာဏာရှင်စနစ် ချုပ်ငြိမ်းရေး၊ လူမျိုးကြီးဝါဒနှင့် မဟာဖိုဝါဒ ချုပ်ငြိမ်းရေး၊ ဖက်ဒရယ် ဒီမိုကရေစီပြည်ထောင်စု တည်ဆောက်ရေးများဖြင့် ပြည်သူများ၏ မူလအခွင့်အရေးများ ပြည့်ဝစေလျက် တရားမျှတ၍ လွတ်လပ်ငြိမ်းချမ်းသည့် လူမှုစီးပွားဘဝများကို အာမခံသည့်ရည်မှန်းချက်များကို အမြန်ဆုံး အကောင်အထည်ဖော်နိုင်ပါစေကြောင်း မိမိတို့အရပ်ဘက်အဖွဲ့အစည်းများမှ လှိုက်လှိုက်လှဲလှဲဆန္ဒပြုလျက် ဂုဏ်ပြုသဝဏ်လွှာကို ပေးပို့အပ်ပါသည်။
အရပ်ဘက်အဖွဲ့အစည်းများ
အထက်ပါထုတ်ပြန်ချက်နှင့် ပတ်သက်၍ ထပ်မံမေးမြန်းလိုသည်များ ရှိပါက အောက်ဖော်ပြပါ အီးမေးလိပ်စာ သို့ဆက်သွယ်မေးမြန်းနိုင်ပါသည်။
ဆက်သွယ်ရန် ။ ။ [email protected]
Announcements
28 February 2025
Asian NGO Network on National Human Rights Institutions , CSO Working Group on Independent National Human Rights Institution (Burma/Myanmar)
Open letter: Removal of the membership of the dis-accredited Myanmar National Human Rights Commission from the Southeast Asia National Human Rights Institution Forum
Progressive Voice is a participatory rights-based policy research and advocacy organization rooted in civil society, that maintains strong networks and relationships with grassroots organizations and community-based organizations throughout Myanmar. It acts as a bridge to the international community and international policymakers by amplifying voices from the ground, and advocating for a rights-based policy narrative.