ရက်ပ်သီချင်းတွေနဲ့ စစ်အာဏာရှင်စနစ်ဆန့်ကျင်နေသူ

စစ်ကောင်စီရဲ့ ပစ်ခတ်သတ်ဖြတ်မှုကြောင့် ဘယ်ခြေထောက်တစ်ဖက်ဆုံးရှုံးလိုက်ရတဲ့ ကူကီး ချင်းတိုင်းရင်းသား ကိုပေါင်မင်းလွန်ဟာ ဘဝကို အရှုံးမပေးဘဲ ရက်ပ်သီချင်းတွေ သီဆိုရင်း တော်လှန်ရေးအတွက် ကျရာနေရာက ဆက်ပါဝင်နေပါတယ်။ နိုင်ငံရပ်ခြားမှာသွားပြီး ဂီတပညာသင်ယူဖို့ အိပ်မက်တွေရှိခဲ့ပေမဲ့ အခုတော့ စစ်ကောင်စီကြောင့် သူ့ရဲ့မနက်ဖြန်ကို မတွေးဘဲ ဘဝဖြတ်သန်းနေတဲ့အကြောင်း RFA သတင်းထောက် စောဖိုးခွား တင်ပြထားပါတယ်။
—
လူငယ်တစ်ယောက်ရဲ့မကျေနပ်ချက်တွေက ပေါက်ကွဲသံစဉ်တွေအဖြစ် ထွက်ပေါ်လာပါတယ်။

အာဏာသိမ်းပြီးနောက် သေဆုံးသွားရတဲ့ အပြစ်မဲ့ပြည်သူတွေရဲ့ ဘဝတွေကို ပုံဖော်ရေးစပ်ထားတာပါ။

သီချင်း တချို့ကို ထောင်နံရံ နောက်ကွယ်မှာ ရေးခဲ့တာဖြစ်ပါတယ်။

“နိုင်ငံခြားထွက်ပြီး အလုပ်လုပ်မယ်၊ တစ်ဖက်က မြူးဇစ်နဲ့ပတ်သက်တဲ့ ကျောင်းတစ်ခုခုတက်မယ်ပေါ့ အဲဒီလိုရည်မှန်းထားတာ အများကြီးရှိတယ်။ ဒါပေမဲ့ အာဏာသိမ်းပြီးနောက် ခြေထောက်ကလည်း ဖြတ်လိုက်ရတော့ အဲ့ဒါတွေ အကုန်လုံး မဖြစ်နိုင်တော့ဘူးပေါ့”

စစ်အာဏာသိမ်းတာကို မကျေနပ်လို့ လမ်းမပေါ်ထွက်ဆန္ဒပြသူတွေထဲ အသက် ၂၂ နှစ်အရွယ် ကူကီးချင်းတိုင်းရင်းသား ကိုပေါင်မင်းလွန်လည်း ပါပါတယ်။

၂ဝ၂၁ ခုနှစ် မတ်လ ၁၇ ရက်နေ့က ကလေးမြို့ တာဟန်းခံတပ်အနီး ဆန္ဒပြသူတွေကို စစ်ကောင်စီတပ် ပစ်ခတ်ဖြိုခွဲချိန်မှာ သူ ခြေထောက်ကျည်ထိမှန်ပြီး ဖမ်းဆီးခံခဲ့ရတာပါ။

အဲဒီနောက် ဘယ်ခြေထောက် ဒူးအထက်ပိုင်းကနေ ဖြတ်ပစ်လိုက်ရသလို၊ နိုင်ငံတော်အကြည်ညိုပျက်စေမှုနဲ့ ထောင်ထဲမှာ ခြောက်လကျော် နေခဲ့ရပါတယ်။

“ကိုယ်က လက်နက်မဲ့ပြည်သူတစ်ယောက် ကိုယ်လိုချင်တဲ့ဟာတစ်ခုကိုတောင်းဆိုတယ်။ ဆန္ဒထုတ်ဖော်တယ်။ ဟိုဘက်က လက်နက်ကိုင်တဲ့စစ်သားတွေက ရက်ရက်စက်စက်ပစ်လိမ့်မယ်လို့ လုံးဝမထင်ထားဘူး။ ဟိုဘက်က တကယ်လည်းပစ်ရော ကျွန်တော်တို့ လုံးဝကမ္ဘာပျက်သလို ဖြစ်သွားတာပေါ့။ ဒါပေမဲ့ အဲဒီတုန်းက ကျွန်တော်လုပ်ခဲ့တာတွေအတွက် ဘယ်တော့မှ နောင်တမရဘူး”

အာဏာမသိမ်းခင်က ကိုပေါင်မင်းလွန်ဟာ ကလေးမြို့တက္ကသိုလ်ကျောင်းသားတစ်ယောက်၊ ဂီတပညာနဲ့ ရက်ပ်သီချင်းတွေကို ဝါသနာရင့်သန်သူပါ။
စစ်ကောင်စီကြောင့် ခြေထောက်တစ်ဖက်ဖြတ်လိုက်ရပေမဲ့ ဘဝကို အရှုံးမပေးဘဲ၊ သူချစ်တဲ့ ရက်ပ်သီချင်းတွေသီဆိုရင်း တော်လှန်ရေးအတွက် တစ်ထောင့်တစ်နေရာကနေ ဆက်ပါဝင်နေတယ်လို့လည်း ဆိုပါတယ်။

” ကျွန်တော့်ဒေသအတွက် အတတ်နိုင်ဆုံးရုန်းပေးတယ်။ ဒီသီချင်းတွေနဲ့ပဲ ငွေကြေးအကျိုးအမြတ်တွေရအောင်ရှာတယ်။ ဒီကငွေနဲ့ပဲ ဒေသကို ကျွန်တော်ပြန်ပြီးတော့ ထောက်တယ်”

” ကျွန်တော်ရဲ့အနာဂတ်အတွက်ဆိုပြီး မစဉ်းစားတာ သုံးနှစ်လောက်ရှိပြီ၊ ပစ္စုပ္ပန်ကိုပဲအာရုံစိုက်တယ်။ ကိုယ့်အနာဂတ်ကို မြင်ကြည့်ပြီး ကိုယ်ခြေထောက်ကိုပြန်ကြည့်ရင် စိတ်ကအဆင်မပြေဘူး။ အကောင်းဆုံးကတော့ အာရုံလွှဲတဲ့သဘောအနေနဲ့ အဲ့ဒါတွေမတွေးတော့ဘူး”

ကိုပေါင်မင်းလွန် ထောင်ကထွက်လာပြီး ရေးစပ်ထားတဲ့ Generation-L** နှလုံးသားအာဟာရ၊ အိုကမ္ဘာမြေစတဲ့ ရက်ပ်သီချင်းတွေဟာလည်း စစ်အာဏာရှင်ဆန့်ကျင်သူတွေကြားမှာ နာမည်ကြီးလာပါတယ်။

ခြေတစ်ဖက်ဆုံးရှုံးလိုက်ရပေမဲ့ ဘယ်တော့မှနောင်တမရသလို၊ သူခြေတစ်ဖက်ဆုံးရှုံးခဲ့ရတဲ့ ဒီစစ်အာဏာရှင် တော်လှန်ရေးတိုက်ပွဲကိုလည်း အောင်မြင်မယ်လို့ ကိုပေါင်မင်းလွန်က ယုံကြည်နေပါတယ်။

“ကိုယ်ရွေးထားတဲ့လမ်းပဲ၊ ကျွန်တော်ကိုယ်တိုင်လည်း ကျွန်တော်ရွေးထားတဲ့လမ်းဖြစ်တယ်။ အဲဒီအပေါ်မှာ ကောင်းတာဖြစ်ဖြစ် ဆိုးတာဖြစ်ဖြစ် ခံရမှာပဲ၊ ကျွန်တော်တို့သမိုင်းက ပေးအပ်တဲ့တာဝန်ဆိုတော့ လုပ်ရမှာပဲ”

“ဘယ်တော်လှန်ရေးမဆို ခဏနဲ့ပြီးသွားတယ်ဆိုတာတော့ သမိုင်းမှာမရှိပါဘူး။ ကျွန်တော်တို့လုပ်နေတာကို ကျေနပ်အားရလားဆို ကျေနပ်အားရတယ်။ ကျွန်တော်လည်း နိုင်တဲ့ဘက်ကပါနေတယ်။ ကျွန်တော်ထက်ပိုနစ်နာထားသူတွေ၊ ကျွန်တော်ထက်ပို အလုပ်လုပ်နေသူတွေလည်း အများကြီးရှိတယ်ဆိုတော့ (တော်လှန်ရေးအောင်မြင်မယ်လို့) ယုံကြည်နေပါတယ်”