ဖမ်းဆီးထောင်ချခံထားရတဲ့ မုံရွာ သပိတ်ကော်မတီ ခေါင်းဆောင် တစ်ယောက်ဖြစ်သူ ကိုဝေမိုးနိုင်ကို သေဒဏ် အထိ အပြစ်ပေးနိုင်တဲ့ ပုဒ်မ တစ်ခု ထပ်တိုးပြီး စစ်ကောင်စီက တရားစွဲလိုက်ပါတယ်။

နိုင်ငံတော် သစ္စာဖောက်ဖျက် ပုန်ကန်မှု ဆိုတဲ့ ပုဒ်မ ၁၂၂ နဲ့ ပြီးခဲ့တဲ့ သြဂုတ်လ ၂၆ ရက်နေ့က နောက်ထပ် တရားစွဲဆိုလိုက်တာဖြစ်တယ်လို့ ကိုဝေမိုးနိုင်ရဲ့ မိခင်က ဘီဘီစီကို ပြောပါတယ်။

အဲဒီအမှုအတွက် ပြီးခဲ့တဲ့ စက်တင်ဘာလ ၈ ရက်နေ့က ထောင်တွင်းမှာပဲ ရုံးထုတ်ခဲ့ပြီး စက်တင်ဘာလ ၂၂ ရက်ကို နောက်ထပ် ရုံးချိန်း ပေးလိုက်တယ်လို့ ဆိုပါတယ်။

မုံရွာတက္ကသိုလ်ကျောင်းသားများ သမဂ္ဂ ဥက္ကဋ္ဌဟောင်း ကိုဝေမိုးနိုင်ဟာ ပုဒ်မ ၅၀၅-က နဲ့ စွဲဆိုခံထားရတဲ့ အမှု ၅ မှု အတွက် တစ်မှုကို ၂ နှစ်စီနဲ့ စုစုပေါင်း ထောင်ဒဏ် ၁၀ နှစ် ပြီးခဲ့တဲ့ သြဂုတ်လကပဲ ချမှတ်ခံထားရပြီးဖြစ်ပါတယ်။

အခုနောက်ဆုံး ထပ်တိုးလိုက်တဲ့ နိုင်ငံတော် သစ္စာဖောက်ဖျက် ပုန်ကန်မှု ပုဒ်မ ၁၂၂ နဲ့ပါဆိုရင် ကိုဝေမိုးနိုင် ဆက်လက်ရင်ဆိုင်ရမယ့် အမှုပေါင်း ၅ မှုကျန်ရှိပါသေးတယ်။

ပုဒ်မ ၅၀၅ အမှု၊ သဘာဝဘေးအန္တရာယ် စီမံခန့်ခွဲမှု ပုဒ်မ ၂၅၊ လူသတ်မှု အပါအဝင် ရင်ဆိုင်နေရဆဲ အမှု ၄ မှုအပြင် အခု တစ်မှု ထပ်တိုး လာတာဖြစ်ပါတယ်။

ကိုဝေမိုးနိုင်ကို ရုံးထုတ်ရာမှာ ထောင်ဝတ်စုံ အပြာဝတ်ဆင်စေပြီး လက်ထိတ် ခတ်တဲ့အပြင် သံခြေကျင်းလည်း ခတ်ပြီး ရုံးထုတ်တယ်လို့ အကျဉ်းထောင် အသိုင်းအဝိုင်းနဲ့ နီးစပ်သူတွေက ဘီဘီစီကို ပြောပါတာယ်။

သူ့ကို စွဲဆိုထားတဲ့ အမှုတွေထဲက လူသတ်မှု အတွက် ရုံးထုတ်ပြီဆိုရင်  သေနတ်ကိုင် ရဲအင်အား ၂၀ လောက်၊ ဒိုင်းကာ၊ နံပါတ်တုတ်၊ ဦးထုပ်နဲ့ လျှပ်စစ် ကျင်စက် တို့စက်တွေကိုင်ဆောင်ထားတဲ့ ဝတ်စုံပြည့် ဝတ်ဆင်ထားတဲ့ ထောင်ဝန်ထမ်း အယောက် ၂၀ လောက်က သူနေတဲ့ တိုက်ဆောင်အထိ သွားခေါပြီး  ရုံးထုတ်လာတယ်လို့ ပြောပါတယ်။

အကျဉ်းထောင်အတွင်းမှာပဲ ကြားနာတဲ့ တရားခွင်ထဲ ရောက်ပြီဆိုရင် ရဲတွေက လက်နက်တွေ ကိုင်ပြီး အတွင်းက စောင့်နေချိန်မှာ ထောင်ဝန်ထမ်းတွေက တရားခွင်အပြင်ဘက်မှာ စောင့်ကြတယ်လို့ ဆိုပါတယ်။

ပုံမှန်အားဖြင့်ဆိုရင် ထောင်တွင်းရုံးထုတ်ရာမှာ ရဲတွေက သေနတ်ကိုင်လေ့ မရှိသလို ထောင်ဝန်ထမ်း တွေကလည်း လက်နက်တွေ မကိုင်ကြဘူးလို့ ထောင်တွင်း အထူးတရားရုံးတွေမှာ ရုံးထုတ်မှုတွေကို သိရှိသူက ပြောပါတယ်။

ထောင်ပြင်ပမှာ ဆိုရင်လည်း ကိုဝေမိုးနိုင်ကို လူသတ်မှု အတွက် ရုံးထုတ်တဲ့ နေ့ဆိုရင် ရုံးတွေပဲ ရှိတဲ့ ထောင်ရှေ့က လမ်းမမှာ ကားတွေ၊ ဆိုင်ကယ်တွေ ဖြတ်သန်းသွားလာခွင့် မပြုဘဲ လမ်းပိတ်ထားတယ်လို့ အဲဒီလိုနေ့မှာ ထောင်ဝင်စာသွားပို့ဖူးသူတွေက ပြန်ပြောပြပါတယ်။

Original Post: BBC Burmese