စစ်ကြောရေးတွင် သေပြီသတင်းထွက်သော ဆရာဝန် အိုးဘိုထောင်ရောက်နေ
10 June 2022
မန္တလေးမြို့ရှိ ဒေါက်တာအောင်အောင်ထွန်းပိုင် သူရိယဆေးခန်းတစ်ခုကို ဧပြီ ၂၈ ရက်က စစ်ကောင်စီအဖွဲ့ဝင်များ လာရောက်ချိပ်ပိတ်စဉ်။ ဓာတ်ပုံ-ပေးပို့
မန္တလေးမြို့ နေအိမ်တွင် ရိုက်နှက်ဖမ်းဆီးခံရပြီးနောက် တစ်လကျော်ကြာ သတင်းပျောက်နေသည့် ဒေါက်တာအောင်အောင်ထွန်းမှာ ထောင်တစ်သက်ချနိုင်သည့် ပုဒ်မဖြင့် ရင်ဆိုင်နေရသည်။
By Myanmar Now
ဧပြီလကုန်ပိုင်းတွင် မန္တလေးမြို့ နေအိမ်၌ စစ်ကောင်စီတပ်ဖွဲ့ ရိုက်နှက်ဖမ်းဆီးသွားပြီး စစ်ကြောရေးတွင် သေပြီဟု သတင်းထွက်နေသော သူရိယဆေးခန်းပိုင်ရှင် ဒေါက်တာအောင်အောင်ထွန်း အိုးဘိုအကျဉ်းထောင်ရောက်နေသည်ဟု မိသားစုနှင့် နီးစပ်သူက ပြောသည်။
အာဏာဖီဆန်ရေးလှုပ်ရှားမှု (CDM) တွင် ပါဝင်သည့် ဆရာဝန်များကို လက်ခံထားသည်ဆိုသော စွပ်စွဲချက်ဖြင့် ဧပြီ ၂၆ ရက်က အသက် ၂၈ နှစ်အရွယ် ဒေါက်တာအောင်အောင်ထွန်းနှင့် မိသားစုဝင်သုံးဦးကို စစ်ကောင်စီက ဖမ်းသွားခြင်းဖြစ်ကာ ၎င်းပိုင်သည့် ဆေးခန်းသုံးခုနှင့် နေအိမ်ကိုပါ စစ်ကောင်စီက ချိပ်ပိတ်ထားသည်။
ထို့နောက် တစ်လကျော်ကြာ သတင်းပျောက်နေပြီးနောက် ဖခင်နှင့် အခြားမိသားစုဝင်တစ်ဦး ပြန်လည်လွတ်မြောက်လာကြောင်း၊ အမဖြစ်သူနှင့်အတူ ဆက်လက် ဖမ်းဆီးခံထားရသည့် ဒေါက်တာအောင်အောင်ထွန်းကို ထောင်တစ်သက်ချနိုင်သည့် အကြမ်းဖက်တိုက်ဖျက်ရေးဥပဒေပါ ထောက်ပံ့မှုဆိုင်ရာ ပုဒ်မ ၅၀ (ည) ဖြင့် တရားစွဲကာ အိုးဘိုထောင်သို့ ပို့ထားကြောင်း အထက်ပါ သတင်းရင်းမြစ်က ပြောသည်။
“သူ့ရဲ့ အဖေရယ်၊ အမရယ်၊ နောက်တစ်ဦးရယ်၊ သူအပါအဝင် လေးဦးဖမ်းခံရတာပေါ့။ ဒါပေမဲ့ နှစ်ဦးက လွတ်လာပြီ ကြားတယ်။ သူရယ် သူ့အမရယ်ပဲ ဆက်ဖမ်းခံထားရတယ် ကြားတယ်”
ဒေါက်တာမောင်မောင်ထွန်းနှင့်အတူ ဖမ်းဆီးခံထားရဆဲဖြစ်သည့် အမဖြစ်သူနှင့် ပြန်လည်လွတ်မြောက်လာသူတို့၏ အသေးစိတ်အချက်အလက်များ၊ တရားစွဲဆိုမှုနှင့် အကျဉ်းထောင်သို့ ရောက်ရှိသည့် ရက်စွဲ၊ ဖမ်းဆီးခံရသူတို့၏ ကျန်းမာရေးအခြေအနေတို့ကိုမူ သီးခြားအတည်ပြုနိုင်ခြင်း မရှိသေးပေ။
ဒေါက်တာအောင်အောင်ထွန်းသည် လူနာများအပေါ် စိတ်ရှည်၍ စေတနာအပြည့်ထားသူ၊ ပရဟိတစိတ်ထက်သန်၍ ကူညီတတ်သူဖြစ်သောကြောင့် ၎င်းဖမ်းဆီးခံရခြင်းမှာ ကျန်းမာရေးကဏ္ဍအတွက် များစွာနစ်နာကြောင်း လုံခြုံရေးအရ အမည်မဖော်လိုသည့် မန္တလေးမြို့ခံ ဆရာဝန်အချို့က မှတ်ချက်ပြုသည်။
မတ် ၁၂ရက် တွင် စစ်ကောင်စီက မန္တလေးမြို့မှ CDM အထူးကုဆရာဝန်ကြီး ၁၄ ဦးကို ဆေးကုသခွင့် ရုပ်သိမ်းကာ ပုဂ္ဂလိကဆေးရုံဆေးခန်းများ၌ CDM တွင် ပါဝင်သူများကို လက်မခံထားရန်၊ ရပ်ကွက်ဆေးခန်းများပါမကျန် လူနာစာရင်း နေ့စဉ်ပေးရန် ဖိအားပေးထားသည်။
ထို့နောက် မန္တလေးမြို့ရှိ မန္တလာ၊ ညိမ်းနှင့် မင်္ဂလာဆေးရုံများအပါအဝင် ပုဂ္ဂလိကဆေးရုံအချို့သည် CDM ကျန်းမာရေးဝန်ထမ်းများကို အလုပ်ထုတ်ခဲ့ကြကြောင်း သတင်းများထွက်ပေါ်နေသည်။
၂၀၂၁ ဖေဖော်ဝါရီ ၁ ရက်တွင် အရပ်သားအစိုးရကို ဖြုတ်ချကာ အာဏာသိမ်းပြီးနောက်တွင် ဆန္ဒပြလျှင်ပင် ပစ်သတ်နေသည့် စစ်ကောင်စီ၏ အုပ်ချုပ်မှုကို ပြင်းပြင်းထန်ထန်ဆန့်ကျင်သူများထဲတွင် မန္တလေးမြို့မှ ဆရာဝန်နှင့် ကျန်းမာရေးဝန်ထမ်းများ ထိပ်ဆုံးမှ ပါဝင်ခဲ့သည်။
မန္တလေးမြို့ရှိ ဒေါက်တာအောင်အောင်ထွန်းပိုင် သူရိယဆေးခန်းတစ်ခုကို ဧပြီ ၂၈ ရက်က စစ်ကောင်စီအဖွဲ့ဝင်များ လာရောက်ချိပ်ပိတ်စဉ်။ ဓာတ်ပုံ-ပေးပို့
ဆေးလောကမှ ကောက်ယူထားသည့် CDM ဝန်ထမ်းများ၏စာရင်းအရ မန္တလေးတိုင်းရှိ ကျန်းမာရေးဝန်ထမ်း ၈၀ရာခိုင်နှုန်း ပါဝင်သည်ဟု သိရသည်။
ကျန်းမာရေးကဏ္ဍအတွင်းမှ အာဏာဖီဆန်သည့် ဆရာဝန်များကို စစ်ကောင်စီကလည်း အပြင်းအထန်နှိပ်ကွက်ပြီး မန္တလေးမြို့ခံ ဒေါက်တာမောင်မောင်ငြိမ်းထွန်း၊ ဒေါက်တာသီဟတင်ထွန်းတို့ သေဆုံးသည့် ဖြစ်စဉ်များမှာ ထင်ရှားသည်။
အာဏာသိမ်းပြီးနောက် ကမ္ဘာ့ရန်ပုံငွေ ပြန်အပ်သည့် အမျိုးသားဒီမိုကရေစီအဖွဲ့ချုပ် (NLD) အစိုးရလက်ထက် ကိုဗစ်ကာကွယ်ဆေးထိုးနှံရေးအဖွဲ့ခေါင်းဆောင် ဒေါက်တာထားထားလင်းကို အဂတိမှုဖြင့် ဧပြီ ၂၀ တွင် ထောင် ၃ နှစ်ချသည့် ကိစ္စမှာလည်း လူသိများသည်။
“ပြသနာအားလုံးရဲ့ သော့ချက်ကတော့ ဒီစစ်ကောင်စီ ပြုတ်ကျမှပဲ ဒီကြုံတွေ့နေရတဲ့ဒုက္ခတွေ ပြီးဆုံးသွားမှာဖြစ်ပါတယ်။” ဟု မန္တလေးမှ ထင်ရှားသည့် CDM ဆရာဝန် ဒေါက်တာစိုးသူရဇော်က မတ်လအတွင်း မှတ်ချက်ပြုထားဖူးသည်။
စစ်ကောင်စီကို ပြည်တွင်းနှင့် နိုင်ငံတကာတွင် အုပ်ချုပ်ရေး၊ သံတမန်ရေး၊ စစ်ရေး၊ ဥပဒေပြုရေး အားပြိုင်နေသည့် အမျိုးသားညီညွတ်ရေးအစိုးရ (NUG) ၏ စာရင်းများအရ CDM ကျန်းမာရေးဝန်ထမ်း ၃၅,၀၀၀ ခန့်ရှိကြောင်း သိရသည်။
လက်ရှိတွင် တာဝန်ထမ်းဆောင်နေသည့် ဆရာဝန် တစ်သောင်းကျော်သာရှိသည်ဟု ၂၀၂၁ နှစ်ကုန်တွင် စစ်ကောင်စီဥက္ကဋ္ဌက ပြောထားဖူးသည်။
ထိုအခြေအနေတွင် စစ်ဘက်ဆိုင်ရာ ဆရာဝန်နှင့် သူနာပြု စုစုပေါင်း ၂၀၀ နီးပါးကို အရပ်ဘက်ကျန်းမာရေးကဏ္ဍသို့ ဖေဖော်ဝါရီနှင့် မတ်လအတွင်း ရွှေ့ထားသည်ဟု နေပြည်တော်ကျန်းမာရေးဝန်ကြီးဌာနတွင် တာဝန်ထမ်းဆောင်နေဆဲ အရာရှိတစ်ဦးက အတည်ပြုထားသည်။
အထက်ပါ ဖြစ်စဉ်များနှင့် ပတ်သက်၍ စစ်ကောင်စီထံ မေး၍ မရသေးပေ။
Original Post: Myanmar Now
Announcements
28 February 2025
Asian NGO Network on National Human Rights Institutions , CSO Working Group on Independent National Human Rights Institution (Burma/Myanmar)
Open letter: Removal of the membership of the dis-accredited Myanmar National Human Rights Commission from the Southeast Asia National Human Rights Institution Forum
Progressive Voice is a participatory rights-based policy research and advocacy organization rooted in civil society, that maintains strong networks and relationships with grassroots organizations and community-based organizations throughout Myanmar. It acts as a bridge to the international community and international policymakers by amplifying voices from the ground, and advocating for a rights-based policy narrative.