ဒီဇင်ဘာ ၂၈ က ပခုက္ကူသုသာန်တွင် ပြုလုပ်ခဲ့သော ဦးမျိုးနိုင်၏ နာရေးဈာပန။ (ဓာတ်ပုံ-ပေးပို့)

ရောဂါအခံကြောင့် သေဆုံးသည်ဟု အကျဉ်းဦးစီးဌာနက အကြောင်းကြားသော်လည်း ရောဂါအခံရှိသည်၊ ဆေးရုံဆေးခန်းတက်ရသည်ဟု မကြားဖူးကြောင်း မိသားစုနှင့် နီးစပ်သူက ပြောသည်။

By Myanmar Now

ပြည်သူ့ကာကွယ်ရေးအဖွဲ့ (PDF) နှင့် ဆက်စပ်မှုရှိသည်ဆိုကာ စွပ်စွဲဖမ်းဆီးခံခဲ့ရသည့် မကွေးတိုင်း ပခုက္ကူမြို့မှ အမျိုးသားတစ်ဦးမှာ ဒီဇင်ဘာ ၂၇ ရက်တွင် အကျဉ်းထောင်၌ သေဆုံးသွားသည်ဟု မိသားစုနှင့် နီးစပ်သူတစ်ဦးနှင့် မြို့ခံတစ်ဦးထံမှ သိရသည်။

အသက် ၄၃ နှစ်အရွယ် ဦးမျိုးနိုင်ဆိုသူမှာ PDF ကို ငွေကြေးထောက်ပံ့သည်ဟူသော သံသယဖြင့် အောက်တိုဘာလလယ်ပိုင်းက ဖမ်းဆီးခံရခြင်းဖြစ်ကာ အကြမ်းဖက်မှုတိုက်ဖျက်ရေးဥပဒေပါ ပုဒ်မ ၃ ခုဖြင့် စစ်ကောင်စီ၏ တရားစွဲဆိုခံရပြီးနောက် အကျဉ်းထောင်အပို့ခံရခြင်းဖြစ်သည်ဟု ဆိုသည်။​

ဒီဇင်ဘာ ၁၅ ရက်တွင် ပခုက္ကူအကျဉ်းထောင်သို့ ရောက်ရှိခဲ့ပြီးနောက် ဒီဇင်ဘာ ၂၇ ရက်က သေဆုံးခဲ့ခြင်းဖြစ်ကြောင်း ဦးမျိုးနိုင်၏ မိသားစုနှင့် နီးစပ်သူတစ်ဦးက Myanmar Now ကို ပြောသည်။

“ဘယ်ဘက်ရင်ဘတ်ခြမ်းက အောင့်တယ်ဆိုပြီး ထောင်ထဲမှာ မူးလဲသွားတယ်တဲ့။ ထောင်ထဲကနေမှ ပြင်ပလူနာဌာနကို လှမ်းပို့တာ။ လမ်းမှာ သတိရတစ်ချက်၊ မရတစ်ချက်လို့ ပြောတယ်။ ဆေးရုံရောက်ပြီး ၁၅ မိနစ်လောက်အထိ အသက်ပါသေးတယ်” ဟု ပခုက္ကူမြို့ခံ ထိုအမျိုးသားက ဆိုသည်။

ရောဂါအခံကြောင့် သေဆုံးသည်ဟု အကျဉ်းဦးစီးဌာနက မိသားစုဝင်များကို ဆက်သွယ်အကြောင်းကြားခဲ့သည်ဟုလည်း ထိုသူက ပြောသည်။

“အရင်ရောဂါအခံ ရှိတယ်ဆိုပြီး ပြောတယ်တဲ့။ ဒါပေမဲ့ သိရသလောက်က သူသည် အရင်က ဆေးရုံဆေးခန်းတက်ခဲ့တာလဲ မရှိခဲ့ဘူး။ ရောဂါအခံဆိုတာမျိုး တစ်ခါမှ မရှိခဲ့ဘူး” ဟု ၎င်းက ပြောသည်။

သို့သော် သေဆုံးစဉ်က ခန္ဓာကိုယ်ပြင်ပဒဏ်ရာများ မတွေ့ရကြောင်း ဒီဇင် ဘာ ၂၈ က ပြုလုပ်သော ဦးမျိုးနိုင်၏နာရေး၌ အကျဉ်းဦးစီးဌာနတာဝန်ရှိသူက အမိန့်စာ လာပြန်ခဲ့သည်ဟု ထိုအမျိုးသားက ဆက်ပြောသည်။

“အမိန့်ပြန်တမ်းမှာတော့ လက်နက်မှုတွေ ဘာညာ ပြောသွားတယ်။ အမှုသုံးခုလောက်ပါတယ်။ မိသားစုကလည်း ဂဃဏနမသိဘူး” ဟု ၎င်းက ဆက်ပြောသည်။

စစ်ကောင်စီကို ခုခံတော်လှန်နေသာ PDF ကို ငွေကြေးထောက်ပံ့သည်ဆိုသော သံသယဖြင့် ဖမ်းဆီးခံရပြီး ပုဒ်မသုံးခုဖြင့် အမှုရင်ဆိုင်နေချိန် အကျဉ်းထောင်၌ သေဆုံးခဲ့သူ ပခုက္ကူမြို့မှ ဦးမျိုးနိုင်၏ မိသားစုဝင်များကို ဆက်သွယ်မေးမြန်းနိုင်ခြင်း မရှိပေ။

ဦးမျိုးနိုင်သေဆုံးမှုနှင့် ပတ်သတ်၍ စစ်ကြောရေးတွင် နှိပ်စက်ခံရပြီး အကျဉ်းထောင်၌ သေဆုံးရခြင်းအပေါ် စစ်ကောင်စီ တာဝန်ယူဖြေရှင်းရမည်ဟု ပခုက္ကူမြို့မှ စစ်အာဏာရှင်ဆန့်ကျင်ရေး လူထုတိုက်ပွဲကော်မတီက ယမန်နေ့တွင် ကြေညာချက်ထုတ်ပြန်သည်။

ဦးမျိုးနိုင်မှာ အောက်တိုဘာလအတွင်း လက်ဖက်ရည်ဆိုင်ထိုင်နေစဉ် စစ်ကောင်စီ၏ အရပ်ဝတ်လက်နက်ကိုင်များက လာရောက်ဖမ်းဆီးခဲ့ခြင်းဖြစ်ကြောင်း၊ ဒီဇင်ဘာလမှသာ အကျဉ်းထောင်ထဲ ရောက်နေပြီး ကျန်းမာရေးဆိုးရွားနေကြောင်း ကြားသိခဲ့ရသည်ဟု ပခုက္ကူလူထုတိုက်ပွဲကော်မတီ တာဝန်ခံဖြစ်သူက ပြောသည်။

“အဖမ်းခံရပြီး နှစ်ပတ်၊ သုံးပတ်လောက်ထိ ရဲစခန်းတွေ လိုက်ကြည့်တော့ မရှိဘူး။ ဘယ်မှ မေးမရဘူး။ အဲဒီတော့ စစ်ကြောရေးရောက်နေတယ်လို့ပဲ ခန့်မှန်းကြတာပေါ့” ဟု ၎င်းတာဝန်ခံက ပြောသည်။

ပခုက္ကူလူထုတိုက်ပွဲကော်မတီအဖွဲ့ဝင် အခြားသူတစ်ဦးကလည်း “ထောင်ထဲက ပြန်ကြားတာ။ သူ ကျန်းမာရေးမကောင်းဘူး။ အောက်ပိုင်းအခြေအနေ တော်တော်ဆိုးတယ်လို့ ကြားတယ်” ဟု ပြောသည်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (AAPP) ၏ ထုတ်ပြန်ချက်အရ ဖေဖော်ဝါရီ ၁ မှ ဒီဇင်ဘာ ၃၀ အထိ စစ်ကြောရေးတွင်း သတ်ဖြတ်ခံရသူများအပါအဝင်က စစ်ကောင်စီက ဖမ်းဆီးသတ်ဖြတ်ခဲ့သူများ ၁၃၈၂ ဦးရှိသည်။

Original Post: Myanmar Now