ဟုမ္မလင်းမြို့တွင် CDM ကျောင်းဆရာမ ပစ်သတ်ခံရ

ပစ်ခတ်ခံခဲ့ရပြီး သေဆုံးခဲ့သည့် CDM ကျောင်းဆရာမ ဒေါ်မေနှင်းအေးကို သားငယ်နှင့်အတူ တွေ့ရစဉ်။ (ဓာတ်ပုံ-ပေးပို့)

စစ်ကိုင်းတိုင်း၊ ဟုမ္မလင်းမြို့မှ ဒလန်ဟု သတင်းကြီးသူ လုပ်ကြံခံရသည့်နေ့တွင် သေနတ်သမား ၃ ဦးက ဆန္ဒပြခေါင်းဆောင်တစ်ဦး၏ နေအိမ်သို့ သွားရောက်ပြီး ပစ်ခတ်ခဲ့သည်။

By Myanmar Now

စစ်ကိုင်းတိုင်း၊ ဟုမ္မလင်းမြို့ ဆန္ဒပြပွဲဦးဆောင်သူတစ်ဦးဖြစ်သည့် ကိုကျော်ဝင်းစိန်က သူ၏ နေအိမ်ကို ယမန်နေ့ (အောက်တိုဘာ ၂၄) ညနေပိုင်းတွင် သေနတ်သမား ၃ ဦး ရောက်လာပြီး ပစ်ခတ်ရာ မရီးဖြစ်သူ ကျောင်းဆရာမ သေဆုံးသွားသည်ဟု ပြောသည်။

အာဏာဖီဆန်ရေးလှုပ်ရှားမှု (CDM) တွင် ပါဝင်သူ အသက် ၃၀ ဝန်းကျင် ဆရာမ ဒေါ်မေနှင်းအေးမှာ ဝရန်တာ၌ ထိုင်နေစဉ် ခြေထောက်၊ လက်နှင့် ရင်ဘတ်တို့တွင် ကျည်ထိမှန်သဖြင့် ပွဲချင်းပြီး သေဆုံးသွားခဲ့ခြင်းဖြစ်သည်ဟု ဆိုသည်။

အဆိုပါနေအိမ်တွင် မိဘနှစ်ဦး၊ အစ်ကိုဖြစ်သူတို့လင်မယားနှင့် ၎င်းတို့၏ တစ်နှစ်အရွယ် သားငယ်တစ်ဦးတို့ နေထိုင်ကြခြင်း ဖြစ်သည်။

ညနေ ၆ နာရီခွဲခန့်က အဖြူရောင်ကားဖြင့် ရောက်လာသော အမျိုးသား ၃ ဦးက အဆက်မပြတ်ပစ်ခတ်ပြီး အိမ်ထဲသို့ ဝင်လာကာ ထွက်ပြေးသူများကို လိုက်လံပစ်ခတ်ခဲ့သေးသည်ဟု သိရကြောင်း ကိုကျော်ဝင်းစိန်က ပြောသည်။

လာရောက်ပစ်ခတ်သူများသည် သေနတ်ကို စနစ်တကျပစ်ခတ်ခဲ့သည်ဟု ကြားသိရပြီး အရပ်ဝတ်စစ်သားများဖြစ်နိုင်သည်ဟု ၎င်းက ယူဆနေသည်။

“အာဏာသိမ်းမှု ဆန့်ကျင်တဲ့ ဟုမ္မလင်းမြို့ပေါ်က ဆန္ဒပြမှုတွေမှာ ကျွန်တော့်ကို ဦးဆောင်သူတစ်ယောက်အနေနဲ့ သူတို့က သိထားကြတာ၊ ဒီဖြစ်စဉ်မတိုင်ခင်ကလည်း မိသားစုအပေါ်မှာ ခြိမ်းခြောက်မှုတွေ လုပ်ခဲ့တယ်။ မိသားစုပိုင် စီးပွားရေးဖြစ်တဲ့ ဈေးဆိုင်ကိုလည်း မီးရှို့တာတွေ ရှိခဲ့တယ်။ အခုလည်း အဲ့ဒီအတွက်ကြောင့် အခုလိုလုပ်တယ်လို့ ထင်တယ်”ဟု ၎င်းက ပြောသည်။

တိမ်းရှောင်နေသည့် ကိုကျော်ဝင်းစိန်သည် ၎င်းတို့နှင့် မသက်ဆိုင်တော့ကြောင်း၊ အမွေပြတ်စွန့်လွှတ်ကြောင်း သြဂုတ်လတွင် မိဘများက ကြေညာခဲ့သည်။

သို့သော်လည်း မိသားစုမှာ ခြိမ်းခြောက်မှုများကို ဆက်လက်ကြုံတွေ့နေရပြီး၊ ဟုမ္မလင်းဈေးအတွင်းရှိ မိသားစုပိုင် ဈေးဆိုင်လည်း အောက်တိုဘာ ၁၈ တွင် မီးရှို့ခံခဲ့ရသည်။

ဒေါ်မေနှင်းအေး၏ ရုပ်အလောင်းကို နေအိမ်၌ ပြင်ဆင်ထားသည်ကို အောက်တိုဘာ ၂၅ တွင် တွေ့ရစဉ်။ (ဓာတ်ပုံ-ပေးပို့)

ယမန်နေ့ (အောက်တိုဘာ ၂၄) မနက်တွင် ဟုမ္မလင်းမြို့၌ စစ်တပ်သတင်းပေးဟု စွပ်စွဲခံရသူ မောင်မော့ ပစ်ခတ်လုပ်ကြံခံရပြီးနောက် ညနေပိုင်းတွင် ကိုကျော်ဝင်းစိန်၏ မိသားစုနေအိမ်ကို သေနတ်သမားတို့က ဝင်ရောက်တိုက်ခိုက်ခြင်း ဖြစ်သည်။

“အဲ့ဒီသတင်းပေးဒလန် ပစ်ခံရတာနဲ့ ပတ်သက်ပြီး ကျွန်တော့်မိသားစုကို မဲတယ်လို့ ထင်ပါတယ်။ ခက်တာက ကျွန်တော်က အဲ့ဒီလူကို သိလည်းမသိဘူး။ လူမှုကွန်ရက်မှာ ဒလန်ဆိုပြီး ပြန့်နေနေတဲ့ဓာတ်ပုံ မြင်ဖူးတာပဲ ရှိတယ်။ အိမ်ကလည်း ကျွန်တော်နဲ့ မပတ်သက်တော့တဲ့ကြားထဲက အခုလို ယုတ်မာတာက စစ်ကောင်စီရဲ့ လူမဆန်မှုကို ပိုမြင်ရတာပါပဲ ” ဟု ကိုကျော်ဝင်းစိန်က ဆိုသည်။

ယမန်နေ့ ပစ်ခတ်မှုများနှင့် ပတ်သက်ပြီး ဟုမ္မလင်းမြို့မရဲစခန်းကို ဆက်သွယ်မေးမြန်းသော်လည်း တာဝန်ကျ ရဲဝန်ထမ်းတစ်ဦးက ဖြေဆိုရန် ငြင်းဆန်သည်။

လက်ရှိအချိန်တွင် စစ်ကိုင်းတိုင်းအတွင်းရှိ တန့်ဆည်၊ ရေဦး၊ ကနီ၊ ထီးချိုင့်၊ ကသာတို့ကဲ့သို့သော ဒေသများတွင် ပြည်သူ့ကာကွယ်ရေးတပ်ဖွဲ့များက စစ်ကောင်စီကို လက်နက်ကိုင်ခုခံနေသည့်အတွက် တိုက်ပွဲများ အပြင်းအထန်ဖြစ်ပွားနေသည်။

​​ဟုမ္မလင်းသည် မြို့ဧရိယာကျဉ်းမြောင်းသော်လည်း မြို့ပေါ်နှင့် မြို့ပတ်လည်တွင် ခလရ တပ်ရင်း ၂၂၂၊ ခမရ တပ်ရင်း ၃၆၉၊ ၃၇၀၊ ဟုမ္မလင်းလေတပ်စခန်းဌာနချုပ်တို့ အခြေစိုက်ထားသည့်မြို့ဖြစ်သည်။

English version.

Original Post: Myanmar Now