ဦးကျော်မိုးထွန်းကိုသာ သံအမတ်အဖြစ် အသိအမှတ်ပြုရန် အရပ်ဘက်အဖွဲ့များတောင်းဆို

ကုလသမဂ္ဂဆိုင်ရာ မြန်မာသံအမတ်ကြီးအဖြစ် ဦးကျော်မိုးထွန်းကိုသာ ဆက်လက်အသိအမှတ်ပြုပေးရန် အရပ်ဘက်အဖွဲ့ ၃၅၀ ကျော်က တောင်းဆိုလိုက်သည်။

ဒီမိုကရေစီနှင့် လူ့အခွင့်အရေးလိုလားသည့် နိုင်ငံတကာနှင့် မြန်မာနိုင်ငံမှ အရပ်ဘက်အဖွဲ့များက စက်တင်ဘာလ ၁၀ ရက်တွင် နိုင်ငံအသီးသီး၏ ကုလသမဂ္ဂဆိုင်ရာ ကိုယ်စားလှယ်များထံ အိတ်ဖွင့်ပေးစာ တစောင်ပေးပို့ တောင်းဆိုခြင်း ဖြစ်သည်။

အဆိုပါစာတွင် ဦးကျော်မိုးထွန်းကို ဒီမိုကရေစီနည်းကျ ရွေးကောက်တင်မြှောက်ခံရသည့် အရပ်သားအစိုးရက ၂၀၁၆ ခုနှစ်တွင် သံအမတ်ကြီးအဖြစ်တာဝန်ပေးခဲ့ပြီး ယခုအခါတွင်လည်း ရွေးကောက်တင် မြှောက်ခံထားရသည့် အရပ်သားအစိုးရက ၎င်းကိုသာ ဆက်လက်တာဝန်ပေးထားကြောင်း ရေးသားထားသည်။

လက်ရှိမြန်မာနိုင်ငံတွင် စစ်တပ်က ၂၀၂၀ ရွေးကောက်ပွဲရလဒ်ကို ပစ်ပယ်ကာ အာဏာသိမ်းထားပြီး တိုင်းပြည်ကို ထိထိရောက်ရောက် မအုပ်ချုပ်နိုင်သလို အရပ်သားသေဆုံးမှုများအပါအဝင် ရာဇဝတ်မှုများကို အစဉ်တစိုက် ကျူးလွန်နေကြောင်း၊ တရားမဝင် စစ်အုပ်စုဘက်မှ အဆိုပြုလာသည့် ကိုယ်စားလှယ်များကို ပယ်ချရန် တိုက်တွန်းကြောင်း အိတ်ဖွင့်ပေးစာတွင် ပါရှိသည်။

ထို့အပြင် ကုလသမဂ္ဂ မြန်မာသံအမတ်နေရာကို မည်သူ့ကိုမှ မရွေးချယ်ဘဲ ရွှေ့ဆိုင်းလိုက်မည်ဆိုပါက စစ်အုပ်စု၏ အကြမ်းဖက်မှုနှင့် ဥပဒေမဲ့ အာဏာလုယူရန် ကြိုးပမ်းမှုကို အားပေးရာရောက်သွားနိုင်ကြောင်း အရပ်ဘက်အဖွဲ့များက သတိပေးသည်။

ကုလသမဂ္ဂကိုယ်စားလှယ် စီစစ်လက်ခံရေးကော်မတီ (UN Credential Committee) က စက်တင်ဘာလ ၁၄ ရက်တွင် နယူးယောက်မြို့ရှိ ကုလသမဂ္ဂအထွေထွေညီလာခံ၌ ကုလသမဂ္ဂဆိုင်ရာ မြန်မာသံတမန်နေရာကို ရွေးချယ်ဆုံးဖြတ်နိုင်ဖွယ် ရှိနေသည်။

ယင်းနေရာအတွက် သံအမတ်ကြီး ဦးကျော်မိုးထွန်းနှင့် စစ်ကောင်စီကိုယ်စားလှယ်ဖြစ်သူ ဗိုလ်မှူးကြီးအောင်သူရိန်တို့ အားပြိုင်နေရစဉ်တွင် အရပ်ဘက်အဖွဲ့များက ဦးကျော်မိုးထွန်းကိုသာ ဆက်လက်ရန် အသိအမှတ်ပြုပေးရန် တောင်းဆိုနေခြင်းဖြစ်သည်။

ဦးကျော်မိုးထွန်းကလည်း “ပြည်သူ့အင်အားနဲ့ အောင်မြင်ရပါမယ်။ သေချာတာတခုပြောနိုင်တာက ဒီလိုမျိုး မျက်နှာစာမှာ စစ်ကောင်စီရဲ့ ကိုယ်စားလှယ် မရှိရဘူးဆိုတာ ပြတ်ပြတ်သားသား ပြောလိုပါတယ်” ဟု တနင်္ဂနွေနေ့က နယူးရောက်မြို့ရှိ ကုလသမဂ္ဂရုံးရှေ့၌ ပြုလုပ်သည့် ၎င်းအား ထောက်ခံပွဲတွင် ပြောကြားသည်။

Original post.