အတိုက်အခံခေါင်းဆောင်တွေကိုခြေရာခံလိုက်ဖို့ မြန်မာစစ်တပ်က ငရဲခန်းတစ်မျှနှိပ်စက်မှုတွေကို ကျူးလွန်နေကြောင်း လွတ်မြောက်လာသူ ကမာရွတ်မီဒီယာအယ်ဒီတာချုပ်ဖွင့်ဟ

အတိုက်အခံအဖွဲ့ဝင်တွေနဲ့ တက်ကြွလှုပ်ရှားသူခေါင်းဆောင်တွေဘယ်မှာပုန်းရှောင်နေလဲဆိုတဲ့ သတင်းအချက်အလက်တွေရဖို့ မြန်မာစစ်အာဏာရှင်အစိုးရဟာ ဖမ်းဆီးထားသူတွေကိုနှိပ်စက်မှုတွေ ကျူးလွန်နေကြောင်း မကြာသေးမီကရန်ကုန်အင်းစိန်အကျဉ်းထောင်ကနေ လွတ်မြောက်လာခဲ့တဲ့ အမေရိကန်နိုင်ငံသားဂျာနယ်လစ်နဲ့ကမာရွတ်မီဒီယာအယ်ဒီတာချုပ်ကိုနေသန်မောင်က ဖွင့်ဟပြောကြားလိုက်ပါတယ်။

ဇွန်လ ၁၅ရက်နေ့က အမေရိကန်နိုင်ငံကိုပြန်မပို့ခံရခင် ကိုနေသန်မောင် ၄၄နှစ်ဟာ သုံးလလောက်မြန်မာနိုင်ငံမှာ ဖမ်းဆီးထိန်းသိမ်းခံခဲ့ရတာဖြစ်ပါတယ်။ အဲဒီအချိန်တုန်းက သူဟာ ရန်ကုန်မြို့ကစစ်ထောက်လှမ်းရေးစစ်ကြောရေးစင်တာတစ်ခုမှာ ရက်သတ္တပတ်နှစ်ပတ်လောက် နှိပ်စက်မှုတွေကိုခံစားခဲ့ရကြောင်း ပြောကြားခဲ့ပါတယ်။ ဗုဒ္ဓဟူးနေ့က ဝါရှင်တန်ဒီစီက CNN Business သတင်းဌာနနဲ့အင်တာဗျူးမှာ ကိုနေသန်မောင်က ဒီစစ်ကြောရေးစင်တာထဲမှာ ငရဲကျခံနေရသလို နေခဲ့ရကြောင်း စစ်သားတွေက သူ့ကိုသတ်လိမ့်မယ်လို့ယုံကြည်ပြီး သူ့ကိုယ်သူသေလူအဖြစ်သာပြင်ဆင်ထားခဲ့ကြောင်း ဖွင့်ဟဝန်ခံပြောကြားခဲ့ပါတယ်။

သတင်းစာဆရာ ကိုနေသန်မောင်

သူဟာ မြန်မာစစ်တပ်ကဖမ်းဆီးထိန်းသိမ်းခဲ့တဲ့ လူပေါင်း ၆၂၀၀ကျော်ထဲမှာ တစ်ယောက်အပါအဝင်ဖြစ်ပါတယ်။ စစ်ကြောရေးအတွင်းနှိပ်စက်မှုတွေရှိကြောင်း ဖမ်းဆီးခံရမှုကနေပြန်လွတ်မြောက်လာသူတွေ ရှေ့နေတွေနဲ့ ဖမ်းဆီးခံထားရဆဲသူတွေရဲ့မိသားစုတွေကလည်း CNN ကိုမကြာသေးမီတုန်းက ပြောကြားခဲ့ကြပါတယ်။ NLD ပါတီဝင်တွေအပါအဝင် တစ်ချို့ဆိုဒီလိုဖမ်းဆီးထိန်းသိမ်းခံရစဉ်အတွင်း သေဆုံးခဲ့ရကြောင်း သူတို့ရဲ့ရုပ်အလောင်းတွေမှာလည်း ရက်ရက်စက်စက်နှိပ်စက်ထားတဲ့ပုံတွေကို တွေ့ခဲ့ရပါတယ်။ ကိုနေသန်မောင်ဟာ မြန်မာအွန်လိုင်းမီဒီယာတစ်ခုဖြစ်တဲ့ ကမာရွတ်မီဒီယာရဲ့တွဲဖက်ထူထောင်သူနဲ့ အယ်ဒီတာချုပ်ဖြစ်ပါတယ်။ သူဟာ မတ်လ၉ရက်နေ့က မီဒီယာတွဲဖက်ထူထောင်သူနဲ့ သတင်းထုတ်ဝေသူ ကိုဟန်သာငြိမ်း ၃၉နှစ်နဲ့အတူ လုံခြုံရေးတပ်ဖွဲ့ဝင်တွေသူတို့ရုံးခန်းကိုဝင်ရောက်စီးနင်းစဉ်မှာ ဖမ်းဆီးခံခဲ့ရတာဖြစ်ပါတယ်။

လက်ရှိအမေရိကန်မှာနေထိုင်နေရပေမယ့် ကိုနေသန်မောင်က သူ မပျော်ရွှင်ကြောင်းပြောပါတယ်။ သူ့ရဲ့အမေရိကန်နိုင်ငံသားအခြေအနေကြောင့် လွတ်မြောက်လာခဲ့ပေမယ့် သူ့လုပ်ဖော်ကိုင်ဖက် ကိုဟန်သာငြိမ်းကတော့ ဆိုးရွားတဲ့အင်းစိန်အကျဉ်းထောင်ထဲကျန်နေခဲ့တဲ့အပေါ် အပြစ်ရှိသလိုခံစားနေရကြောင်း ပြောပါတယ်။ “ဒီငရဲကိုကျွန်တော်တို့အတူတကွဖြတ်သန်းခဲ့ရတာပါ။ ကျွန်တော်တို့အတူလွတ်မြောက်လာသင့်ပါတယ် ကျွန်တော်တို့သူ့ကိုမေ့သွားမှာမဟုတ်ဘူးဆိုတာ သူ့ကိုသိစေချင်ပါတယ်။ သူတစ်ယောက်တည်းမဟုတ်ပါဘူး” လို့ ကိုနေသန်မောင်ကပြောပါတယ်။

မေလ ၂၄ရက်နေ့က မြန်မာနိုင်ငံကနေထွက်ခွာဖို့စီစဉ်ထားခဲ့တဲ့ နောက်ထပ်အမေရိကန်ဂျာနယ်လစ် ဒန်နီဖက်စတာကတော့ အင်းစိန်အကျဉ်းထောင်မှာဖမ်းဆီးထိန်းသိမ်းခံထားရဆဲဖြစ်ပါတယ်။ စစ်သားတွေအပြည့်တင်လာတဲ့ စစ်တပ်ထရက်ကားယာဉ်တန်း ရန်ကုန်မြို့ ကမာရွတ်ရုံးအပြင်ကိုရောက်လာချိန်မှာ တစ်ခုခုမှားနေပြီဆိုတာ ကိုနေသန်မောင်ကသိလိုက်ပါတယ်။  လုံခြုံရေးတပ်ဖွဲ့တွေက သူတို့ရဲ့ရုံးခန်းတံခါးကိုချိုးဖျက်ပြီး ရုံးကပစ္စည်းကိရိယာတွေကိုသိမ်းယူခဲ့ကြသလို ကိုနေသန်မောင်နဲ့ ကိုဟန်သာငြိမ်းတို့ ကိုဖမ်းဆီးသွားခဲ့ပါတယ်။

“သူတို့ကကျွန်တော်တို့ကို မင်္ဂလာဒုံက စစ်ကြောရေးစခန်းဆီပို့ခဲ့ကြပါတယ်” လို့ကိုနေသန်မောင်က ပြောပါတယ်။ အဲဒီမှာသူတို့တွေရိုက်နှက်နှိပ်စက်ခံခဲ့ရပြီး ရေနှစ်ရက်လောက်မသောက်ခဲ့ရသလို အစားအစာလည်း သုံးရက်လောက်မစားခဲ့ကြောင်း အဲဒီမှာရှိနေစဉ်နှစ်ပတ်နီးပါး လက်ထိပ်ခံထားရပြီး မျက်နှာအဝတ်စည်းခံခဲ့ရကြောင်း သူကဆက်လက်ပြောကြားခဲ့ပါတယ်။ “သူတို့တွေကျွန်တော်တို့ကို လက်ထိပ်ခတ်ပြီး မျက်နှာအဝတ်စည်းခဲ့ကြပါတယ်။ ပြီးတော့မေးခွန်းတွေမေးကြတယ်။ တစ်ချိန်လုံး ကျွန်တော်တို့မျက်နှာ လက်တွေနဲ့ ပခုံးတွေကိုကန်ကျောက်ပါတယ်။ ကျွန်တော်တို့တစ်ခါဖြေတိုင်း ရိုက်နှက်ပါတယ်။ ကျွန်တော်တို့အဖြေမှန်မှန်မှားမှား သူတို့ကျွန်တော်တို့ကိုရိုက်နှက်ပါတယ်။ သုံးရက်ဆက်တိုက် ဒီလိုခံခဲ့ရပါတယ်” လို့သူကပြောကြားခဲ့ပါတယ်။

သူတို့ကိုဖမ်းဆီးထိန်းသိမ်းထားတဲ့ အဆောက်အဦးဝန်းမှာ နေအိမ်၅လုံးရှိပြီး ရုံးကြီးတစ်ခုရှိတယ်လို့ ပြောပါတယ်။ အဆောက်အဦးအတွင်းမှာ စစ်ကြောရေးအခန်း လေးခန်းရှိတယ်လို့ သူကပြောပါတယ်။ သူ့ကိုအဲဒီကနေခေါ်ထုတ်တဲ့နောက်ဆုံးနေ့မှာ မျက်နှာအဝတ်စည်းထားတာကို ဖယ်ရှားပေးခဲ့တာကြောင့် အခန်းနဲ့အဆောက်အဦးတွေကို မြင်တွေ့ခဲ့ရခြင်းဖြစ်ကြောင်း သူကပြောပါတယ်။ “အခန်းထဲမှာ စီစီတီဗွီကင်မရာတစ်လုံးရှိပါတယ်။ အိပ်ရာမရှိပါဘူး။ စားပွဲဝိုင်းလေးတစ်ခုနဲ့ ကုလားထိုင်လေးတစ်ခုပဲရှိပါတယ်။ အဲဒီမှာနေ့ကောညကောထိုင်နေရင်း အချိန်ကုန်ဆုံးခဲ့ရပါတယ်။ မျက်လုံးကိုအဝတ်စည်းထားတာကြောင့် အိပ်ဖို့အချိန်လည်းမရှိပါဘူး သူတို့ကအိပ်ခွင့်မပေးပါဘူး။ ရှေ့မှာလက်ထိပ်ခတ်ထားပြီး အဲဒီအတိုင်းပဲကြိုးစားအိပ်ရပါတယ်။ ဒါပေမယ့်၅မိနစ်တိုင်း သူတို့ပေါ်လာပြီးမေးခွန်းတွေမေးပါတယ်”လို့ ကိုနေသန်မောင်က အဖြစ်အပျက်ကိုပြန်လည်ပြောပြခဲ့ပါတယ်။

သတင်းစာဆရာများဖြစ်ကြတဲ့ ကိုနေသန်မောင် နှင့် ကိုဟန်သာငြိမ်း

၈ရက်လောက် ဒီနှိပ်စက်မှုဒဏ်တွေခံခဲ့ရပါတယ်။ အဲဒီအတောအတွင်းဖမ်းဆီးထိန်းသိမ်းခံရသူတွေဟာ အိမ်တွေနဲ့ အကျဉ်းခန်းတွေဆီရွှေ့ပြောင်းခံခဲ့ရပါတယ်။ သူ့လုပ်ဖော်ကိုင်ဖက် ဟန်သာငြိမ်းဆိုးဆိုးဝါးဝါးနှိပ်စက်ခံခဲ့ရကြောင်း နေသန်မောင်ကပြောပါတယ်။ “ဟန်သာဟာ မြန်မာနိုင်ငံသားဖြစ်တာကြောင့် ဆိုးဆိုးဝါးဝါးနှိပ်စက်ခံခဲ့ရပါတယ်။ နှစ်ရက်လောက်ဒူးထောက်ပြီး သူနေခဲ့ရပါတယ်။ သူ့အရေပြားကို စီးကရက်မီးနဲ့ထိုးခံခဲ့ရပါတယ်” လို့ သူကပြောပါတယ်။ စစ်သားတွေက ဟန်သာငြိမ်းကို သူ့ဖုန်းရဲ့လျှို့ဝှက်နံပါတ်ပေးဖို့ ဖိအားပေးနှိပ်စက်ခဲ့ကြတယ်လို့ ကိုနေသန်မောင်က ယုံကြည်နေပါတယ်။ ဒါမှသာ သူ့အဆက်အသွယ်ကနေ နာမည်ကြီးအတိုက်အခံခေါင်းဆောင်တွေနဲ့ တက်ကြွလှုပ်ရှားသူခေါင်းဆောင်ပိုင်းတွေနဲ့ ဖုန်းမှတ်တမ်းတွေ ဆက်သွယ်ပြောဆိုထားတာတွေကို ရနိုင်မှာဖြစ်ပါတယ် ။

“ရက်နဲ့ချီ လျှို့ဝှက်နံပါတ်မရအောင်ဟန်သာငြိမ်းက နံပါတ်အမှားတွေပြောပြီး သူ့ဖုန်းကိုအော်တိုလော့ကျအောင်လုပ်ပြီး ဘယ်သူမှမသုံးနိုင်အောင်လုပ်ဖို့ကြိုးစားခဲ့ပါတယ်။ ဒါပေမယ့် နောက်ဆုံးအစောင့်တွေက သူ့ကိုမုဒိန်းကျင့်မယ်လို့ခြိမ်းခြောက်လာခဲ့ပါတယ်။ ဟန်သာဒါကိုတောင့်မခံနိုင်တော့ပါဘူး ဒါကြောင့်သူ့လျှို့ဝှက်နံပါတ်ကိုပေးခဲ့ရပါတယ် နောက်တော့သူတို့တွေ သူတို့ကိုမရိုက်ကြတော့ဘူး” လို့ နေသန်မောင်ကပြောပါတယ်။ ဖမ်းဆီးခံရစဉ်အတွင်း နေသန်မောင်ရဲ့ဖုန်းပျက်ဆီးခဲ့ပါတယ်။ သူ့ကိုအမေရိကန်နိုင်ငံသားတစ်ယောက်မှန်းသိပြီးတဲ့နောက် စစ်သားတွေက လေးရက်မြောက်နေ့မှာ သူတို့ရိုက်နှက်တာတွေမလုပ်တော့ပါဘူး။

“သူတို့ကျွန်တော့်ကိုမရိုက်ကြတော့ဘူး။ ပြီးတော့ အမေရိကန်အစိုးရကကျွန်တော့်ကို ဘာကြောင့်လွှတ်ခဲ့တာလဲဆိုတာနဲ့ အမေရိကန်ကထောက်ပံ့ကြေးတွေပေးနေလားဆိုပြီး ကျွန်တော့်ကိုစမေးလာကြပါတယ်။ ကျွန်တော်ကစီအိုင်အေအတွက်အလုပ်လုပ်နေတာလားစတဲ့ မေးခွန်းတွေမေးခဲ့ကြပါတယ်။ ကျွန်တော်က ကျွန်တော်ကဂျာနယ်လစ်တစ်ဦးပါ ဘယ်သူမှပိုက်ဆံမပေးဘူးလို့ ပြောခဲ့ပါတယ်” လို့နေသန်မောင်က အဖြစ်အပျက်ကိုပြန်လည်ပြောပြခဲ့ပါတယ်။ ဒီစစ်ကြောရေးမှာ သူ့မီဒီယာကုမ္ပဏီကမာရွတ်မီဒီယာအကြောင်း အာရုံစိုက်စစ်မေးရမဲ့အစား စစ်သားတွေက သူ့ရဲ့ဘတ်ဂျက်တွေနဲ့ ငွေကြေးတွေအကြောင်းမေးခဲ့ကြတယ်လို့ သူကပြောပါတယ်။ “သူတို့ကရန်ပုံငွေလမ်းကြောင်းကိုလိုက်နေတာ ဒါမှမဟုတ် ဘယ်ကနေငွေတွေရလဲဆိုတာလိုက်နေတာ” လို့သူကပြောပါတယ်။

စစ်ကြောရေးအခန်းထဲမှာ သူသေသွားလိမ့်မယ်လို့ နေသန်မောင်ကယုံကြည်ခဲ့တာဖြစ်ပါတယ်။ “အစမှာနှစ်ရက်လောက်ကျွန်တော်တို့ အသက်ဆက်နိုင်မယ်ဆိုရင် ကျွန်တော်တို့အသက်ရှင်မယ်လို့ထင်ခဲ့တာ ဒါပေမယ့်နောက်တော့ မသိတော့ဘူး။ သူတို့သောက်ရေပြန်ပေးလာတဲ့အခါကျမှ ကျွန်တော်တို့မသေတော့ဘူး အသက်ရှင်မယ်လို့ တွေးမိခဲ့တာ” လို့ ကိုနေသန်မောင်ကပြောပါတယ်။ ၁၅ရက်ကြာပြီးနောက် နေသန်မောင်ကသူဟာ အင်းစိန်အကျဉ်းထောင်ကထိန်းသိမ်းရေးစင်တာဆီရွှေ့ပြောင်းခံခဲ့ရတယ်လို့ ပြောပါတယ်။ အဲဒီမှာအကျဉ်းသား၁သောင်းခန့်ရှိပြီး ဆိုးဝါးတဲ့အခြေအနေတွေနဲ့နေထိုင်နေကြရပါတယ်။ နှစ်ပတ်ကျော်လောက်သူဟာ တစ်ခြားလူ၈၀ခန့်နဲ့အတူ ကြီးမားတဲ့အကျဉ်းခန်းထဲမှာ နေခဲ့ရပါတယ်။ အားလုံးဟာ ကျောင်းသားတက်ကြွလှုပ်ရှားသူတွေ ဆန္ဒပြသူတွေနဲ့ NLD အဖွဲ့ဝင်တွေဖြစ်တယ်လို့ သူကဆိုပါတယ်။ နောက်တော့သူ့ကို တစ်ဦးတည်းသီးသန့်အကျဉ်းခန်းထဲရွှေ့ပြောင်းခံခဲ့ရပြီး သူ့ကိုပြန်လွှတ်ပေးခဲ့တဲ့ ဇွန်လ ၁၄ ရက်နေ့ထိ အဲဒီမှာနေခဲ့ရပါတယ်။

ကိုနေသန်မောင်နဲ့ ကိုဟန်သာငြိမ်းတို့ ဖမ်းဆီးထိန်းသိမ်းခံရစဉ်အတွင်းဆိုးရွားစွာဆက်ဆံခံရမှုတွေဟာ သီးခြားဖြစ်ရပ်တွေမဟုတ်ပါဘူး။ စစ်အာဏာသိမ်းပြီးကတည်းက စစ်တပ်ကဖမ်းဆီးထိန်းသိမ်းထားတဲ့ လူထောင်ပေါင်းများစွာဟာ နှိပ်စက်ခံရ ရိုက်နှက်ခံရမှုတွေနဲ့ တစ်ခြားဆိုးရွားတဲ့ဆက်ဆံမှုတွေခံခဲ့ရတယ်လို့ အင်္ဂါနေ့ကထုတ်ပြန်ခဲ့တဲ့ လူ့အခွင့်အရေးစောင့်ကြည့်လေ့လာရေးအဖွဲ့ရဲ့အစီရင်ခံစာထဲမှာ ဖော်ပြထားပါတယ်။ မြန်မာစစ်တပ်နဲ့ရဲတပ်ဖွဲ့တွေက ဖမ်းဆီးထားတဲ့သူတွေကို သက်တမ်းတိုးတာတွေ လူဦးရေထူထပ်တဲ့အခန်းတွေထဲပိတ်လှောင်တာ ကျန်းမာရေးနဲ့ညီညွတ်မှုမရှိတဲ့ စစ်ကြောရေးစခန်းတွေနဲ့ အကျဉ်းထောင်တွေဆီပို့တာတွေ မကြာခဏဆိုသလိုလုပ်ဆောင်ခဲ့ကြပါတယ်။ ဖမ်းဆီးခံထားရသူတွေဟာ ဆွေမျိုးတွေဆီဆက်သွယ်လို့မရသလို ဥပဒေရေးအရလည်း အကာအကွယ်မရရှိပါဘူး။ လို့HRW ရဲ့အစီရင်ခံစာထဲမှာရေးသားထားပါတယ်။ ဖမ်းဆီးခံထားရသူတွေဟာ ရိုက်နှက်နှိပ်စက်ခံရတာမျိုး စီးကရက်မီးနဲ့တို့ခံရတာမျိုး လိင်အခြေခံအကြမ်းဖက်ခံရတာမျိုးရှိနေကြောင်း အစီရင်ခံစာထဲမှာ ထပ်ဖြည့်ဖော်ပြထားပါတယ်။

သတင်းစာဆရာ ကိုနေသန်မောင်

စစ်တပ်ကသူ့ကိုရန်သူတစ်ယောက်လိုမြင်တာကြောင့် ဖမ်းဆီးခံခဲ့ရတာဖြစ်တယ်ယုံကြည်ထားကြောင်း ကိုနေသန်မောင်ကပြောပါတယ်။ သူဟာစစ်အာဏာသိမ်းပြီးကတည်းက မီဒီယာလွတ်လပ်ခွင့်အပေါ်ဖိနှိပ်မှုတွေလုပ်လာတဲ့အစိတ်အပိုင်းတစ်ရပ်အနေနဲ့ ဖမ်းဆီးခံခဲ့ရသူ ဂျာနယ်လစ် ၈၈ဦးထဲမှာတစ်ဦးအပါအဝင်ဖြစ်ခဲ့ပါတယ်။ မီဒီယာလုပ်သားအများအပြားဟာ ပြည်ပကိုထွက်ပြေးနေရ သို့မဟုတ် တိုင်းရင်းသားလက်နက်ကိုင်တပ်ဖွဲ့တွေထိန်းချုပ်ထားတဲ့ နယ်မြေတွေဆီ ထွက်ပြေးနေကြရပါတယ်။ မြို့တွေမှာကျန်ခဲ့သူတွေဟာလည်း ပုန်းရှောင်နေကြရပြီး ဖမ်းဆီးခံရမှာကိုရှောင်ရှားဖို့ တစ်နေရာထဲမှာနေလိုပမရပဲ ရွှေ့ပြောင်းနေနေကြရပါတယ်။ “ဒီမိုကရေစီ လူ့အခွင့်အရေးနဲ့ လွတ်လပ်စွာဖော်ထုတ်ပြောကြားခွင့်တွေအပေါ်မှာ ကျွန်တော့်ရဲ့ယုံကြည်ချက်ကြောင့် သူတို့ကျွန်တော့်ကိုနှိပ်စက်ခဲ့ကြပါတယ်” လို့ကိုနေသန်မောင်ကပြောပါတယ်။

“ပြည်တွင်းစစ်ကြီးလည်းယခုဖြစ်နေပါပြီ။ မြန်မာနိုင်ငံဟာလည်း ကျရှုံးနိုင်ငံဘဝကျရောက်နေပြီးဖြစ်ပါတယ်” လို့ ကိုနေသန်မောင်ကဆက်လက်ပြောကြားခဲ့ပါတယ်။ “ကျွန်တော်တို့စောင့်ကြည့်ဖို့ အချိန်မရှိပါဘူး။ နယ်စပ်ဒေသတွေဆီ ထွက်ပြေးနေကြတဲ့ဒုက္ခသည်ထောင်နဲ့ချီရှိနေပါပြီ။ လူသားချင်းစာနာထောက်ထားရေးအကျပ်အတည်းတွေလည်း ယခုဖြစ်နေပါပြီ” လို့သူကဆိုပါတယ်။ “တစ်ခါတစ်လေ ကျွန်တော်ဒီအကျဉ်းထောင်ထဲပြန်သွားချင်တယ်လို့ အိပ်မက်မက်မိပါတယ် ကျွန်တော့်ရဲ့ခန္ဓာကိုယ်ကဒီမှာရှိနေပေမယ့် ကျွန်တော့်စိတ်ဟာ ကျွန်တော့်သူငယ်ချင်းမိတ်ဆွေတွေ ကျွန်တော့်ရဲ့ဂျာနယ်လစ်တွေနဲ့ ကျွန်တော့်နိုင်ငံနဲ့အတူရှိနေပါတယ်။ ကျွန်တော့်ဘဝတစ်လျှောက်လုံး လွတ်လပ်တဲ့မြန်မာတစ်ဦး နိုင်ငံသားတစ်ဦး ဂျာနယ်လစ်တစ်ဦးအနေနဲ့ အလုပ်လုပ်နေခဲ့တာပါ။ ကျွန်တော်သေတဲ့ထိ ဒီအတွက်အလုပ်လုပ်သွားမှာပါ။ ကျွန်တော့်တို့ရဲ့လူတွေကိုစောင့်ရှောက်ရပါမယ်။ သူတို့တွေဟာ ဒီမိုကရေစီ လူ့အခွင့်အရေးနဲ့ထိုက်တန်ကြပါတယ်” လို့ ကိုနေသန်မောင်ကပြောကြားခဲ့ပါတယ်။

CNN သတင်းဌာနပါ Helen Regan, Anna Coren, Sandi Sidhu နဲ့ Salai TZ တို့ရေးသားသည့် “Released American journalist says Myanmar military using torture to hunt down opposition leaders” အမည်ဖြင့်ဖော်ပြထားသည့် သတင်းကိုညောင်နီရွက်(Myanmar Muslim Media) ကမြန်မာဘာသာသို့ဆီလျော်အောင်ပြန်ဆိုသည်။    

English version.

Original Post: Myanmar Muslim Media