၂၀၂၁ ခုနှစ် ဇွန်လ ၂၁ ရက်

အကြောင်းအရာ။  ။ မြန်မာနိုင်ငံအတွက် အဓိပ္ပါယ်ရှိသော နောက်ထပ်ကိုင်တွယ်ဆောင်ရွက်မှုများ လိုအပ်ပါသည်။

လေးစားရပါသော လူကြီးမင်းများ ရှင်/ခင်ဗျား

တစ်ကမ္ဘာလုံးနှင့်သက်ဆိုင်သော အရေးကိစ္စများအပေါ် ဂျီဆဲဗင်းနိုင်ငံများ၏ ခေါင်းဆောင်မှုကို မြန်မာနိုင်ငံ အရပ်ဘက်လူထုအဖွဲ့အစည်း ၃၉၇ ဖွဲ့က ကြိုဆိုလိုက်သည်။ ကမ္ဘာလုံးဆိုင်ရာ စိန်ခေါ်မှုများဖြစ်သော ကပ်ရောဂါဘေး အဆုံးသတ်ရေး၊ ကမ္ဘာမြေအား ကာကွယ်စောင့်ရှောက်ရေး၊ ပျက်စီးသွားသော စီးပွားရေးများအား ပြန်လည်တည်ဆောက်ရေး တို့တွင် အချိန်မဆိုင်းဘဲ ထိရောက်လေးနက်စွာ ဖြေရှင်းရမည်ဟူသော ခေါင်းဆောင်များ၏ အမြင်ကို သဘောတူပါသည်။ ထိုအရေးကိစ္စများကို ဖေဖော်ဝါရီလ ၁ ရက်နေ့မတိုင်မီကလည်း ထောက်ခံရပ်တည်မှုများ လုပ်ဆောင်ခဲ့ပြီး လက်ရှိနှင့် နောင်အနာဂတ်တွင်လည်း မိမိတို့ ဆက်လက်ဆောင်ရွက်သွားလိုပါသည်။

မိမိတို့မြန်မာနိုင်ငံတွင် ဖြစ်ပွားနေသည့် ကိစ္စရပ်နှင့်ပတ်သက်၍ အာရုံစိုက်မှုပေးသည့်အတွက် ဝမ်းမြောက်ကြိုဆိုပြီး ဂျီဆဲဗင်းနိုင်ငံများအစည်းအဝေး နောက်ဆုံးထုတ်ပြန်ကြေညာချက်၏ စာပိုဒ် ၅၉ တွင် မြန်မာနိုင်ငံအကြောင်း ဖော်ပြထားသည့် အတွက်လည်း ဝမ်းမြောက်ကြိုဆိုပါသည်။ လူကြီးမင်းတို့၏ နိုင်ငံများနှင့် တစ်ကမ္ဘာလုံးရှိ ပြည်သူများအနေဖြင့် လမ်းဆုံလမ်းခွကို ရောက်နေပြီဟူသော အခြေအနေဖော်ပြချက်ကို မိမိတို့မှ သဘောတူပါသည်။ မြန်မာပြည်သူများမှာလည်း အရေးကြီးသော လမ်းဆုံလမ်းခွကို ရောက်နေသဖြင့် ဂျီဆဲဗင်းနိုင်ငံများအား အရေးတကြီး ချဉ်းကပ်ရခြင်း ဖြစ်ပါသည်။

လူကြီးမင်းတို့၏ နောက်ဆုံးထုတ်ပြန်ကြေညာချက်ကို ဂရုတစိုက် ဖတ်ကြည့်ရာတွင် မြန်မာနိုင်ငံ၌ ဖြစ်ပေါ်နေသည့် အကြပ်အတည်းအပေါ် အာဆီယံအနေဖြင့် အဓိကနေရာမှ ချဉ်းကပ်လုပ်ဆောင်ရန်ဟူသော အချက်မှာ အလွန်ပင်ဆိုးရွားသော မှားယွင်းမှုဟု ယုံကြည်သည်။ အာဆီယံသည် “လျင်မြန်စွာ” လုပ်ကိုင်ဆောင်ရွက်လိမ့်မည် မဟုတ်ပါ။ မြန်မာနိုင်ငံ၏ အကြပ်အတည်းအပေါ် တုံ့ပြန်ရန်အတွက် အထူးကိုယ်စားလှယ် ခန့်အပ်ရေး၊ မြန်မာနိုင်ငံအတွင်း ပဋိပက္ခ ပြေလည်ရေးအား ကူညီပံ့ပို့းမည့်အဖွဲ့ ဖွဲ့စည်း‌ရေးနှင့် ကိုင်တွယ်ဖြေရှင်းရေး လုပ်ဆောင်ရန်အတွက်ပင် ၎င်းတို့ အဖွဲ့တွင်း သဘောတူညီမှု မရနိုင်ခြင်းကြောင့် အာဆီယံ၏လှုပ်ရှားမှု ရပ်တန့်နေသည်မှာ ကြာမြင့်နေပြီး ဖြစ်သည်။

မြန်မာနိုင်ငံ၏အကြပ်အတည်း ပြေလည်ရေးအတွက် အာဆီယံ၏ သဘောတူညီချက် ၅ ချက် အပေါ်တွင်လည်း မိမိတို့အနေဖြင့် လုံးဝယုံကြည်မှု မရှိသည်ကို ထုတ်ဖော်ပြောကြားလိုပါသည်။ ယင်း သဘောတူညီချက်ကို ရေးဆွဲရာတွင် နိုင်ငံအတွင်း ပဋိပက္ခ ဖန်တီးသည့်သူ တစ်ဖက်တည်းကိုသာ ခေါ်ယူရေးဆွဲခဲ့သည်။ ယင်းမှာ အာဆီယံသည် စည်းလုံးညီညွတ်ပြီး မြန်မာနိုင်ငံ၏ အကြပ်အတည်းအပေါ် ငြိမ်းချမ်းစွာဖြေရှင်းရေး ဖော်ဆောင်ရာတွင် အဓိကနေရာမှ ပါဝင်နိုင်သည်ဟူသော လွဲမှားယုံကြည်မှုဖြင့် ရေးဆွဲထားခြင်းဖြစ်ပြီး ၎င်း သဘောတူညီချက်များထဲတွင် မြန်မာနိုင်ငံအကြပ်အတည်းနှင့်ပတ်သက်၍ အဓိပ္ပါယ်ရှိသောကိုင်တွယ်ဖြေရှင်းမှုကို ထည့်သွင်းဖော်ပြထားခြင်း မရှိပါ။ အမှန်စင်စစ် ထိုသဘောတူညီချက်ထဲတွင် အချိန်ဇယားသတ်မှတ်ချက်ပင် မပါရှိဘဲ အာဆီယံနိုင်ငံအားလုံး သဘောတူထားသည့် လက်တွေ့လုပ်ကိုင်ဆောင်ရွက်နိုင်ရေး ကိစ္စရပ်များနှင့် အားထုတ်မှုများ ကင်းမဲ့နေသည်မှာလည်း အလွန်မြင်သာပါသည်။

သို့ရာတွင် အာဆီယံသဘောတူညီချက်သည် စစ်အာဏာရှင်အပေါ် မြင့်တက်လာနေသည့် နိုင်ငံတကာဖိအားများမှ ကာကွယ်ပေးရန် ဖြစ်နေသည်။ အာဆီယံသည် မင်းအောင်လှိုင်မှ အာဏာကို အမိအရ ချုပ်ကိုင်နိုင်စေရန်၊ နှင့်  အာဆီယံ၏ “အပြုသဘောဆောင်သော တွေ့ဆုံဆွေးနွေးမှုစားပွဲဝိုင်း” တွင် ပါဝင်သင့်သည့်သူများအား အကြမ်းဖက်ခြင်း၊ ဖမ်းဆီးချုပ်နှောင် ခြင်းနှင့် လုပ်ကြံ တရားစွဲဆိုခြင်းများ လုပ်ဆောင်နိုင်ရန် အချိန်ပေးနေခြင်း ဖြစ်သည်။ ဤတွေ့ဆုံဆွေးနွေးမှုသည် “ပါဝင်သက်ဆိုင်သူအားလုံးမှ ပြည်သူလူထု၏ အကျိုးစီးပွားအတွက် ငြိမ်းချမ်းစွာ အဖြေရှာနိုင်ရန်” ရည်ရွယ်ထားခြင်း ဖြစ်ပါသည်။

ယခုအချိန်တွင် တွေ့ဆုံဆွေးနွေးမှုတွင် ပါဝင်ရမည့်သူများမှာ ၎င်းတို့၏ အသက်များအတွက် ပုန်းရှောင်နေကြရခြင်း၊ ၎င်းတို့ကျူးလွန်ထားခြင်းမရှိသော ပြစ်မှုများအတွက် အကျဉ်းကျခံနေရခြင်းနှင့် တချို့မှာ အသက် သေဆုံးသည်အထိ နှိပ်စက်ညှင်းပန်းခံရခြင်းများကြောင့် လက်ရှိအခြေအနေတွင် အပြုသဘောဆောင်သော တွေ့ဆုံဆွေးနွေးမှု လုပ်ဆောင်ရန် မဖြစ်နိုင်ပါ။ တစ်ဘက်က တစ်နိုင်ငံလုံးနှင့် စစ်ပွဲဆင်နွှဲနေပြီး နှိပ်စက်ညှင်းပန်းမှုနှင့် သတ်ဖြတ်မှုများ ကျူးလွန်နေချိန်တွင် အာဆီယံက ထိတွေ့ဆက်ဆံမှုများလုပ်ဆောင်ရန် တိုက်တွန်းထားသည့် တခြားတစ်ဘက်မှ သူများမှာမူ ပြည်ပ၌ ပုန်း​ရှောင်နေရခြင်း၊ လျှို့ဝှက်လှုပ်ရှားနေရခြင်းနှင့် မတရား ဖမ်းဆီးခံရခြင်းများ ရင်ဆိုင်နေသည့်အခြေအနေတွင် အပြုသဘောဆောင်သော တွေ့ဆုံဆွေးနွေးမှုကို မြင်ယောင်ကြည့်နိုင်ရန်မှာ အမှန်တကယ်ပင် ခက်ခဲပါသည်။

အာဆီယံ၏ စကားလုံးများ မည်သည့်သက်ရောက်မှုမျှ မရှိသည်ကို သိသည့်အတွက် အာဆီယံ ထိပ်သီးအစည်းအဝေး ပြုလုပ်နေချိန်ကာလနှင့် နောက်ပိုင်းတွင် စစ်အုပ်စု၏ အကြမ်းဖက်မှုများ ရပ်တန့်မသွားပါ။ အမှန်တကယ်တွင် စစ်အုပ်စုသည် ၎င်းတို့ကိုယ်ပိုင် လမ်းပြမြေပုံ ၅ ချက်ကို တွန်းနေသည့်အတွက် အာဆီယံသဘောတူညီချက် ၅ ချက်နှင့် အာဆီယံ လုပ်ငန်းစဉ်ကို ကျော်နင်းသွားပြီး ဖြစ်ပါသည်။ အာဆီယံသဘောတူညီချက်ကို စစ်ကောင်စီက အကောင်အထည် မဖော်သဖြင့် စိတ်ပျက်ကြောင်း သီးခြားလွတ်လပ်စွာ ဖော်ပြသည့်နိုင်ငံများ ရှိသော်လည်း အာဆီယံ အတွင်းရေးမှူးအဖွဲ့မှ ဖျက်လိုက်သော ထုတ်ပြန်ကြေညာချက်တွင် မင်းအောင်လှိုင်အား နိုင်ငံတော်စီမံအုပ်ချုပ်ရေးကောင်စီ ဥက္ကဌအဖြစ် အသိအမှတ်ပြုထားပြီး အာဆီယံ အထွေထွေအတွင်းရေးမှူး၏ မြန်မာနိုင်ငံခရီးစဉ် အောင်မြင်သည်ဟု အကျဉ်းချုပ် ဖော်ပြထားပါသည်။ အာဆီယံနိုင်ငံ အချင်းချင်းကြား ညီညွတ်မှု မရှိသည့် အနေအထားတွင် မိမိတို့နိုင်ငံ၏ ငြိမ်းချမ်းရေးဖော်ဆောင်မည့် ခြေလှမ်းများကို ၎င်းတို့မှ ဦးဆောင် အကောင်အထည်ဖော်ရန်မှာ မဖြစ်နိုင်ပါ။

ထိုအကြောင်းကြောင့် ဂျီဆဲဗင်းနိုင်ငံများက နှောင့်နှေးမှုမရှိဘဲ နောက်ထပ်ခြေလှမ်းများ မလှမ်းလျှင် တွေ့ဆုံဆွေးနွေးမှု (အပြုသဘောဆောင်သည်ဖြစ်စေ၊ မဆောင်သည်ဖြစ်စေ) သို့မဟုတ် ငြိမ်းချမ်းသည့် အဖြေရှာမှုလည်း မဖြစ်နိုင်ပါ။ ယခုအချိန်တွင် ဂျီဆဲဗင်းနိုင်ငံများသည် ထုတ်ပြန်ကြေညာချက်များဖြင့်သာ အားပေးနေပြီး မိမိတို့အနေဖြင့် လိုအပ်နေသည်မှာ လက်တွေ့ အထောက့်အပံ့နှင့် လက်တွေ့ဆောင်ရွက်မှုများပင် ဖြစ်ပါသည်။

အာဆီယံ၏ ဦးဆောင်မှုကို မှီခိုနေမည့်အစား အဓိပ္ပာယ်ရှိသော နောက်ထပ်ခြေလှမ်းများနှင့် ရှေ့ဆောင် လှုပ်ရှားမှု ရှိသော သံတမန်ရေး အားထုတ်မှုများကို ဂျီဆဲဗင်းနိုင်ငံများက ဆောင်ရွက်ပေးရန် အကြွင်းမဲ့ လိုအပ်နေသည်။

အကယ်၍ ဒေသတွင်းနိုင်ငံများနှင့် အခြား နိုင်ငံတကာသက်ဆိုင်သူများက မင်းအောင်လှိုင် အောင်မြင်သွားစေရန် ခွင့်ပြုလိုက်လျှင် ၎င်းသည် ပြည်သူကို စစ်ခင်းမည့် အာဏာရှင်စနစ်ကို တည်ဆောက်မည် ဖြစ်သည်။ အတိတ်ကာလတွင်  စစ်အာဏာရှင်စနစ်အောက်၌ ကြာမြင့်စွာနေခဲ့ရသော အတွေ့အကြုံရှိနေသည့် မိမိတို့သည် ယခု အာဏာလုစစ်ကောင်စီမှ ပြည်သူများအပေါ် အကြမ်းဖက်ခြင်းဖြင့် ပြိုပျက်နေသော စီးပွားရေးအပေါ်တွင်ထိုင်၍ တိုင်းပြည်သယံဇာတများကို ထုခွဲရောင်းချပြီး စစ်လက်နက်နှင့် ထောက်လှမ်းရေးပစ္စည်းများ ဝယ်ယူခြင်းနှင့် ကိုယ်ပိုင်စည်းစိမ်ခံဘဝများတွင် နေထိုင်ကြမည်ကို သိနေကြသည်။ အောက်ခြေမှ စစ်သား၊ ရဲသားများမှာလည်း ပြည်သူများထံမှ စားနပ်ရိက္ခာနှင့် ငွေကြေးများကို ယခု ကာလကဲ့သို့ပင် လုယက်စားသောက် ကြပါလိမ့်မည်။ ဒီမိုကရေစီ အရေးနိမ့်သွားသော တိုင်းပြည်အဖြစ် မတည်မငြိမ်ဖြစ်ကာ ဒေသတွင်းနှင့် ကမ္ဘာတစ်ဝှမ်းအပေါ်လည်း ရိုက်ခတ်လာပါလိမ့်မည်။

ယခုအချိန်အထိ မြန်မာပြည်သူများ၏ သတ္တိ၊ စွန့်လွှတ်မှုနှင့် သန္နိဋ္ဌာန်ပြင်းပြသော ခုခံဆန့်ကျင်မှုကြောင့် မင်းအောင်လှိုင်၏ အာဏာချုပ်ကိုင်ရေး ကြံစည်မှု မအောင်မြင်သေးပါ။ သို့ရာတွင် ဒေသတွင်းနှင့် နိုင်ငံတကာ၏ ပံ့ပိုးကူညီမှုများမရှိဘဲ မိမိတို့ ရှေ့ဆက်နိုင်မည် မဟုတ်ပါ။ လက်နက်အပြည့် တပ်ဆင်ထားသော စစ်အုပ်စုနှင့် လက်နက်မဲ့ ပြည်သူအကြား ကွာဟမှုမှာ ကြီးမားလှပါသည်။

ယခုအချိန်သည် မိမိတို့နိုင်ငံ၏ ဒီမိုကရေစီ အင်အားကို အရေးတကြီး စမ်းသပ်ခံနေရသော အနေအထားတွင် ရောက်ရှိနေပါသည်။ ဒီမိုကရေစီသည် စစ်အာဏာရှင်စနစ်ကို ကျော်လွှားအောင်မြင်မည်ဟူသည်ကို လက်တွေ့ပြနိုင်ရန် လူကြီးမင်းတို့၏ သံတမန်ရေး ဦးဆောင်မှုများ ပိုမိုလိုအပ်လျက် ရှိပါသည်။

မိမိတို့အနေဖြင့် မေတ္တာရပ်ခံလိုသည်မှာ –

• မြန်မာနိုင်ငံသို့ စေလွှတ်ရန် ဂျီဆဲဗင်းနိုင်ငံများမှ အထူးကိုယ်စားလှယ်တစ်ဦး ချက်ချင်းခန့်အပ်ရန်၊
• ကုလသမဂ္ဂ၏ အထူးကိုယ်စားလှယ်နှင့်အတူ ဂျီဆဲဗင်း၏ အထူးကိုယ်စားလှယ်တို့က ဒေသတွင်းရှိ အဓိကနိုင်ငံများနှင့် သံတမန်ရေးအရ ဆွေးနွေးမှုများ လုပ်ဆာင်ကာ မြန်မာနိုင်ငံ၏ အကြပ်အတည်း ဖြေရှင်းရေးအတွက် ပူးပေါင်းညှိနှိုင်းဆောင်ရွက်မှုရှိသည့် အစီအစဉ်တစ်ခု ဆောင်ရွက်ရန်၊
• ဂျီဆဲဗင်း၏ အထူးကိုယ်စားလှယ်နှင့် ကုလသမဂ္ဂ၏ အထူးကိုယ်စားလှယ်တို့အနေဖြင့် စစ်အုပ်စုနှင့်သာမက မြန်မာနိုင်ငံ၏ သက်ဆိုင်သူများဖြစ်သည့် အမျိုးသားညီညွတ်ရေးအစိုးရ၊ တိုင်းရင်းသားလက်နက်ကိုင် တော်လှန်ရေးအဖွဲ့အစည်းများ၊ လူထု အာဏာဖီဆန်ရေးလှုပ်ရှားမှု (CDM)၊ အရပ်ဘက်လူထုအဖွဲ့အစည်းများနှင့် အကြမ်းမဖက်လှုပ်ရှားမှုကို ရှေ့တန်းက ဦးဆောင်နေခဲ့ကြသည့် လူငယ်များနှင့်လည်း ဆွေးနွေးညှိနှိုင်းမှုများ လုပ်ဆောင်ရန်၊
• ဂျီဆဲဗင်း၏ အထူးကိုယ်စားလှယ်က မြန်မာနိုင်ငံ၏ အိမ်နီးချင်းနိုင်ငံများ (ထိုင်း၊ အန္ဒိယ၊ တရုတ်) နှင့် တိုင်းရင်းသား လူထုအခြေပြုအရပ်ဘက်အဖွဲ့အစည်းများတို့နှင့် ပူးပေါင်းညှိနှိုင်းပြီး ပဋိပက္ခကြောင့် ထိခိုက်ခံစားရသော နယ်စပ်ဒေသများသို့ လူသားချင်းစာနာထောက်ထားမှုဆိုင်ရာ အကူအညီ ပေးပို့ရန်၊ နှင့် ပဋိပက္ခဒဏ်ခံရသော မြန်မာနိုင်ငံအလယ်ပိုင်းသို့ အကူအညီများ လုံခြုံစွာ ပေးပို့နိုင်ရေးအတွက် စစ်အုပ်စုနှင့် ဆွေးနွေးရန်။

လေးစားစွာဖြင့်

• ခင်ဥမ္မာ၊ [email protected]
• စိုင်းဆမ်ခမ်း၊ [email protected]
• စောအဲလက်စ်၊ [email protected]

မြန်မာ အရပ်ဘက်လူထုအဖွဲ့အစည်း ၃၉၇ ဖွဲ့ ကိုယ်စား

မှတ်ချက် – လုံခြုံရေးစိုးရိမ်ပူပန်ရမှုကြောင့် ဤအိတ်ဖွင့်ပေးစာကို လက်မှတ်ရေးထိုးထားသည့် ဒေသခံ အရပ်ဘက်လူထု အဖွဲ့အစည်းများ၏ အမည်များကို မဖော်ပြထားပါ။ ယခုလက်မှတ်ရေးထိုးထားသော အဖွဲ့အစည်းများသည် မြန်မာနိုင်ငံအတွင်းရှိ လူသားချင်းစာနာထောက်ထားမှုဆိုင်ရာ၊ လူ့အခွင့်အရေးကာကွယ်စောင့်ရှောက်မှုနှင့် အခွင့်အရေးအခြေပြု ကိစ္စရပ်များကို လုပ်ဆောင်နေသည့် အရပ်ဘက်လူထုအဖွဲ့အစည်းများ ဖြစ်သည်။

English version

PDF ဖိုင်ရယူရန် မြန်မာဘာသာ I အင်္ဂလိပ်ဘာသာ