ဒီပဲယင်းက ကလေး ၉ဦး ကို စစ်တပ်က ရေဦး၌သင်္ဂြိုဟ်ကာ အလောင်းဖျောက်

September 18th, 2022  •  Author:   Arbitrary Killings by Military Junta (Tabayin Township)  •  1 minute read
Featured image

လေကြောင်းမှ တိုက်ခိုက်ခံရသည့် လက်ယက်ကုန်းရွာ ဘုန်းကြီးကျောင်းအား တွေ့ရစဉ် / CJ  

By The Irrawaddy

စစ်ကိုင်းတိုင်း ဒီပဲယင်းမြို့နယ်ရှိ လက်ယက်ကုန်းရွာကို လေကြောင်းတိုက်ခိုက်မှုတွင် သေဆုံးသွားသည့် ကလေးများ ၏ အလောင်းကို စစ်ကောင်စီက ၇မိုင်ဝေးသည့် ရေဦးမြို့နယ်သို့ သယ်ကာ သင်္ဂြိုဟ်၍ အလောင်းဖျောက်လိုက်ကြောင်း ဒေသသတင်းရင်းမြစ်များထံမှ သိရသည်။

ဖြစ်စဉ်မှာ စက်တင်ဘာ ၁၆ ရက် မွန်းလွဲ ၁ နာရီခန့်က လက်ယက်ကုန်းကျေးရွာ ဘုန်းတော်ကြီးသင် စာသင်ကျောင်း ကို တိုက်ခိုက်ရေး ရဟတ်ယာဉ် Mi 35 ၂ စီးနှင့် ပစ်ခတ်ရာ ကလေး ၇ဦး ပွဲချင်းပြီး သေဆုံးသွားသလို ၁၇ဦး ဒဏ်ရာ ရရှိကြောင်း၊ အလားတူ မြေပြင်စစ်ကြောင်းကလည်း ရွာအတွင်း ဝင်တိုက်ခိုက်ရာ နောက်ထပ် ကလေး ၂ဦးအပါအဝင် ၇ ဦးသေဆုံးသွားခဲ့သည်။

ဘုန်းတော်ကြီးသင်စာသင်ကျောင်းတိုက်ခိုက်မှုအတွင်း သေဆုံးခဲ့ရသည့် ကလေး ၇ဦး၏ အလောင်းများနှင့် ဒဏ်ရာ ရသူများကို စစ်တပ်က ရေဦးမြို့နယ် တိုင်းရင်းဆေးရုံသို့ ညတွင်းချင်းသယ်လာပြီး စက်တင်ဘာ ၁၇ရက် နံနက် ၆နာရီ တွင် ကလေး ၇ဦး၏ အလောင်းကို ရေဦးသုဿန်တွင် သင်္ဂြိုဟ်လိုက်ကြောင်း၊ ထိုနေ့ ညနေ ၄ နာရီခန့် တွင် နောက် ထပ် ကလေး ၂ ဦး၏ အလောင်းကို ယူလာကာ ထပ်မံသင်္ဂြိုဟ်ကြောင်း၊ ယင်း ၂ ဦးသည် ရေဦးတိုင်းရင်းဆေးရုံတွင် ထား သည့် ဒဏ်ရာရ ကလေးများထဲက ဖြစ်နိုင်ကြောင်း ဒေသခံများက ကောက်ချက်ချကြသည်။

“ကားပေါ်တင်သွားတာ ခါးပြတ်၊ လက်ပြတ်တဲ့ ကလေးတွေ ပါတယ်။ ကလေးတယောက်က ဆိုရင် ပါဆယ်ထုပ်ပြီးကို ခြင်းကျားထဲကို ထည့်ပြီး ယူသွား တာ။ ကျောင်းထဲမှာ သွေးစတွေကို ပုံနေတာ။ အသားစတွေက ပန်ကာတွေမှာရော၊ နံရံတွေမှာရော၊ မျက်နှာကြက် မှာရော ကပ်နေတာ။ ကျောင်းဝင်းအတွင်းထဲမှာတော့ အသားစတွေက နေရာအနှံ့ကို ပြန့်ကျဲနေတာ” ဟု ဘုန်ကြီးကျောင်းဝင်းအတွင်း သွားရောက်ကြည့်ရှုခဲ့သည့် မျက်မြင် ဒေသခံတဦးက ပြောသည်။

သေဆုံးကလေးများ၏ ရုပ်အလောင်းများ ပြန်မရသည့်အတွက် မိဘများအနေဖြင့် နာရေး ပြုလုပ်နိုင်ခြင်း မရှိသေး ကြောင်းလည်း သိရသည်။

လက်ယက်ကုန်းရွာခံ တဦးက “ကျောင်းသား မိဘ ၂ ယောက် သူတို့ကလေးတွေ ပျောက်လို့ဆိုပြီး လာရှာတာ။ အင်္ကျီစနဲ့ ဘောင်းဘီစ အစုတ်ကလေးတွေပဲ တွေ့တော့ အဲဒါလေးတွေနဲ့ လိပ်ပြာ ခေါ်မလို့ ဆိုပြီး ပြန်ယူသွားတယ်။ ကျနော်တို့မှာ ယူကြုံးမရ ဖြစ်နေရတာ။ အပိုင်းအစပဲ ကျန်တာကိုတောင် ခွေးတွေက မထားခဲ့ဘူး။ မိဘတွေကို သဂြိုဟ်ခွင့် မပေးဘူး။ အကုန်သယ် သွားတာ” ဟု ဆိုသည်။

ရေဦးမြို့နယ် မီးသင်္ဂြိုဟ်စက်တွင် စက်တင်ဘာ ၁၇ ရက် နံနက် ၆ နာရီခန့်က ယောက်ျားလေး ၄ ယောက် ၊ မိန်း ကလေး ၂ ယောက်အပြင် ကျား/မ မခွဲခြားနိုင်တော့သည့် ကိုယ်အင်္ဂါ အစိတ်အပိုင်းများကို ပီနံအိတ်ဖြင့် ထည့်သူ ၁ ဦး ကို မီးသင်္ဂြိုဟ်ခဲ့ပြီး ညနေ ၄ နာရီခန့်တွင် ယောက်ျားလေး ၂ ယောက်ကို ထပ်မံ သင်္ဂြိုဟ်ခဲ့ကြောင်း ရေဦးမြို့နယ် ပြည် သူ့ ကာကွယ်ရေး အဖွဲ့ထံမှ သိရသည်။

လေကြောင်းမှ တိုက်ခိုက်ခံရသည့် လက်ယက်ကုန်းရွာ ဘုန်းကြီးကျောင်းအား တွေ့ရစဉ် (ဓာတ်ပုံ- CJ)  

ပစ်ခတ်မှုများ ပြုလုပ်ခဲ့သည့် စက်တင်ဘာ ၁၆ ရက် ညနေပိုင်းကတည်းက စစ်ကောင်စီတပ်သည် လက်ယက်ကုန်း ရွာမှ ကားနှင့် ရွာခံကို အဓမ္မစေခိုင်းပြီး သေဆုံးကလေးများနှင့် ဒဏ်ရာရထားသူ ဆရာ၊ ဆရာမ ၃ ဦးအပြင် ကလေး ၁၇ ဦးကို ဆေးကုသမည် ဟုဆိုကာ ရေဦးသို့ မောင်းနှင်ရန် ခေါ်ဆောင်သွားကြောင်း ဒေသခံများထံမှ သိရသည်။

အဆိုပါ ဖြစ်စဉ်ကို ကြားသိရသော ရေဦးဒေသခံ တဦးက “ရွာကနေ ဖမ်းလာတဲ့ ကား ၁ စီးပေါ်မှာ သေသွားတဲ့ ကလေးတွေရော မသေသေးတဲ့ ကလေးတွေရော ကားနဲ့ စုပြုံတင်လာပြီးတော့ စစ်ကြောင်းက ရေဦးကို ပြန်ဝင်တာ။ ညတွင်းချင်း မီးသင်္ဂြိုဟ်ဖို့ကို လုပ်တာ။ ကားသမားကလည်း စစ်သား အလောင်းတွေကိုပဲ သယ်ခိုင်းတယ်ထင်လို့ အိတ်တွေကို ဖွင့်ကြည့်တော့ ကလေးတွေ ဖြစ်နေတယ်။ လာပို့တဲ့လူ ကိုယ်တိုင်က ရှော့ခ်ရသွားတာ” ဟု ပြောသည်။

ထို့ပြင် ဒဏ်ရာရထားသည့် ကလေးများအပါ ၁၇ ဦးကို ရေဦးမြို့ပေါ်ရှိ စစ်ကောင်စီ တပ်စွဲထားသည့် တိုင်းရင်းဆေးရုံ အတွင်း၌ထားရှိ ထားပြီး ကလေးအချို့သည် ကိုယ်လက်အင်္ဂါ မစုံတော့သည်အထိ ဒဏ်ရာပြင်းထန်စွာ ရရှိထား ကြောင်း ရေဦးဒေသခံများထံမှ စုံစမ်းသိရှိရသည်။

ထိုကဲ့သည့် ပြစ်မှုကို ကျူးလွန်ခဲ့သည့် စစ်ကောင်စီတပ်မှာ မည်သည့် တပ်မ၊ တပ်ရင်း ဆိုသည်ကို မသိရသေးသော် လည်း ဒေသကာကွယ်ရေးတပ်များကမူ ရန်ကုန်တိုင်း စစ်ဌာနချုပ် လက်အောက်ခံ မှော်ဘီ အခြေ စိုက် ခမရ ၇၀၁ နှင့် စစ်ကိုင်းတိုင်း စစ်ကိုင်းမြို့တွင် အခြေစိုက်သည့် တပ်မ ၃၃ တို့က တပ်ဖွဲ့ဝင်များ ဖြစ်သည်ဟု ကာကွယ်ရေး တပ်ဖွဲ့ဝင်များက ယူဆထားကြသည်။

ကလေးများအပြင် ဒေသခံ ၇ ဦးဖြစ်သည့် ဦးကျော်ထွန်း (၄၉ နှစ်)၊ ဦးအောင်စောထွေး (၃၄ နှစ်)၊ မယု (၃၇ နှစ်)၊ ဦးတင်စိုးခိုင် (၃၁ နှစ်)၊ မောင်အောင်ချစ်မိုး (၂၂ နှစ်)၊ မောင်အောင်အောင်ဦး (၁၆ နှစ်) နှင့် မောင်စောမင်းဦး (၁၃ နှစ်) တို့ကိုလည်း စစ်ကောင်စီ တပ်ဖွဲ့ဝင်များက သတ်ဖြတ်ခဲ့ကြောင်း သိရသည်။

လေကြောင်းမှ တိုက်ခိုက်ခံရသည့် လက်ယက်ကုန်းရွာ ဘုန်းကြီးကျောင်းအား တွေ့ရစဉ် (ဓာတ်ပုံ- CJ)  

စစ်ကောင်စီတပ်သည် လက်ယက်ကုန်းရွာက ဘုန်းကြီးကျောင်းတွင် ကာကွယ်ရေး တပ်ဖွဲ့ဝင်များ ရှိသည်ဆိုသော သတင်းဖြင့် လေကြောင်းတိုက်ခိုက်ခြင်းကို ပြုလုပ်ခဲ့ခြင်း ဖြစ်ကြောင်း ဒေသခံများက ဆိုသည်။

ရေဦးမြို့နယ် ပြည်သူ့ကာကွယ်ရေး တပ်ဖွဲ့ဝင် တဦးက “သတင်းအမှားတွေကိုပဲ ယုံပြီးတော့ လေကြောင်းကနေ ပစ် ခတ်ပြီး ရွာခံတွေနဲ့ ကလေးတွေကိုပဲ သတ်ဖြတ်နေတဲ့ လူမျိုးတုံး သတ်ဖြတ်မှုတွေပဲ ဆက်တိုက် ကျူးလွန်နေတာ။ အပြစ်မဲ့ ကလေးတွေမှန်း သိပါလျက်နဲ့ လေသူရဲတွေ ပစ်နိုင်တာကိုလည်း ကျနော်တို့ တော်တော်လေး အော့နှလုံး နာတယ်။ စစ်ရေးကို ယောက်ျား စစ်သားပီပီ မြေပြင်ကနေ စစ်ချီ စမ်းပါ။ သူတို့ ဝေဟင်ကနေပဲ လုပ်တတ်တော့တာ” ဟု ပြောသည်။

စစ်ကောင်စီ၏ မြဝတီရုပ်သံကမူ လက်ယက်ကုန်းရွာမှတဆင့် ကချင်လွတ်မြောက်ရေးတပ်မတော် (KIA) နှင့် PDF တို့က လက်နက်ခဲယမ်းများ သယ်ယူပို့ဆောင်မည် ဖြစ်ကြောင်းနှင့် ရွာဘုန်းကြီးကျောင်းတွင် အမျိုးသားဒီမိုကရေစီ အဖွဲ့ချုပ် (NLD) ပါတီ ထောက်ခံသူများ၊ PDF များ ခိုအောင်းနေထိုင်လျက် ရှိပြီး ဒေသခံများနှင့် ခရီးသွား ပြည်သူများကို အဓမ္မဆက်ကြေး တောင်းခံခြင်းများ ပြုလုပ်နေကြောင်း သတင်းပေး တိုင်ကြားချက်ကြောင့် ဝင်ရောက် စစ်ဆေးခဲ့ခြင်း ဖြစ်ကြောင်း စက်တင်ဘာ ၁၇ ရက်ညပိုင်း သတင်းတွင် ကြေညာခဲ့သည်။

ထိုသို့ စစ်ဆေးစဉ် ပြည်သူများကို လူသားဒိုင်းအနေဖြင့် အကာအကွယ်ယူပြီး KIA နှင့် PDF တို့က တိုက်ခိုက်ခဲ့သည့် အတွက် အပြန်အလှန် ထိတွေ့မှု ဖြစ်ပွားခြင်းကြောင့် ဒေသခံများ သေဆုံးမှု ရှိခဲ့ကြောင်း သတင်းတွင် ကြေညာခဲ့ သော်လည်း မြေပြင်တွင် ထိတွေ့တိုက်ပွဲမျိုး ဖြစ်ပွားခြင်း မဟုတ်ဘဲ စစ်တပ်ကသာ အကြမ်းဖက် တိုက်ခိုက်ခဲ့ခြင်း ဖြစ် ကြောင်း ဒေသခံများက ဆိုထားသည်။

အာဏာသိမ်း စစ်တပ်၏ သတ်ဖြတ်မှုကြောင့် ကလေးငယ်များ သေဆုံးသည့် အလားတူဖြစ်စဉ်များ စက်တင်ဘာ ၁၅ နှင့် ၁၇ ရက်တွင် ထပ်မံ ဖြစ်ပွားခဲ့သည်။

စက်တင်ဘာ ၁၅ ရက် ညပိုင်းက ရှမ်း- ကယား နယ်စပ်ရှိ မိုးဗြဲမြို့ကို စစ်ကောင်စီတပ်က ပစ်ခတ်ခဲ့သည့် လက်နက်ကြီး မွေတော်ဘုရားဘုန်းကြီးကျောင်းတွင် ကျရောက် ပေါက်ကွဲရာ စစ်ရှောင်များထဲမှ အသက် ၇ နှစ်နှင့် ၁၂ နှစ်အရွယ် ညီအစ်မနှစ်ဦး သေဆုံးခဲ့ပြီး၊ စက်တင်ဘာ ၁၇ ရက်က စစ်ကိုင်းတိုင်း၊ ကန့်ဘလူမြို့နယ်၊ ချပ်ကုန်းရွာမှ စစ်ကောင်စီ တပ်က ပစ်ခတ်မှုကြောင့် မိဿလင်ကုန်းကျေးရွာနေ အသက် ၅ နှစ် အရွယ် ယောက်ျားလေး ၁ ဦး ရင်အုံထိမှန် သေဆုံးခဲ့ကြောင်း သိရသည်။


Original Post: The Irrawaddy