မကွေးတိုင်းဝန်ကြီးချုပ်ကို‌ စစ်ကောင်စီက အမှုတစ်မှုထပ်တိုးစွဲဆို

December 18th, 2021  •  Author:   Dr. Aung Moe Nyo (Chief Minister of Magway Region)  •  1 minute read
Featured image

မကွေးတိုင်းဝန်ကြီးချုပ် ဒေါက်တာအောင်မိုးညို  

ထောင်ဒဏ် နှစ် ၉၀ ကျော်ချနိုင်သည့် အမှုများ ရင်ဆိုင်နေရသူ ဒေါက်တာအောင်မိုးညိုကို ဗိုလ်ချုပ်ကြီးများက ရွေးကောက်ပွဲ မလျော်သြဇာသုံးမှုဖြင့် ထပ်မံစွဲဆိုလိုက်သည်။

By Myanmar Now

မကွေးတိုင်းဝန်ကြီးချုပ် ဒေါက်တာအောင်မိုးညိုကို စစ်ကောင်စီက အမှုတစ်မှုထပ်တိုးစွဲဆိုထားသည်ဟု ရှေ့နေဦးမြင့်အောင်က Myanmar Now ကို အတည်ပြုပြောဆိုခဲ့သည်။

ရွေးကောက်ပွဲတွင် မလျော်သြဇာသုံးမှုဖြင့် ခရိုင်ရွေးကောက်ပွဲကော်မရှင် တာဝန်ရှိသူတစ်ဦးက တရားလိုပြုလုပ် စွဲဆိုခြင်းကို မကွေးမြို့နယ်တရားရုံးက လက်ခံစစ်ဆေးနေသည်ဟု ဆိုသည်။

“(ဒီဇင်ဘာ ၁၇) မနေ့က တရားရုံးမှာ စပြီး ရုံးထုတ်စစ်ဆေးတယ်။ ရာဇသတ်ကြီးပုဒ်မ ၁၇၁(စ)နဲ့ စွဲဆိုတာပေါ့”ဟု ရှေ့နေဖြစ်သူ ဦးမြင့်အောင်က ဆိုသည်။

အလုပ်ကြမ်းနှင့် ထောင်ဒဏ် ၂ နှစ်အထိ အမြင့်ဆုံးချမှတ်နိုင်သလို ငွေဒဏ်လည်း ချမှတ်နိုင်ကြောင်း ထိုပုဒ်မတွင် သတ်မှတ်ပြဋ္ဌာန်းထားသည်။

စွဲဆိုခံရသည့် အမှုနှင့် ပတ်သက်ပြီး အသက် ၆၄ နှစ်အရွယ် မကွေးဝန်ကြီးချုပ် ဒေါက်တာအောင်မိုးညိုက မည်သည့်မှတ်ချက်မှ မပေးကြောင်း တရားလွှတ်တော်ရှေ့နေ ဦးမြင့်အောင်က ဆိုသည်။

အမြင့်ဆုံး ထောင် ၁၅ နှစ်အထိ ချနိုင်သည့် အဂတိလိုက်စားမှုတိုက်ဖျက်ရေးဆိုင်ရာ ပုဒ်မ ၅၅ ဖြင့် အမှုပေါင်း ၆ မှုဖြင့် အာဏာသိမ်းစစ်ကောင်စီက စွဲဆိုထားသော်လည်း မကွေးတိုင်းဝန်ကြီးချုပ် ဒေါက်တာအောင်မိုးညိုက အပြစ်မရှိကြောင်း တုံ့ပြန်ထားသည်။

ဒေါက်တာအောင်မိုးညိုကို မကွေးပညာရေးကောလိပ်၊ မကွေးဒီဂရီကောလိပ်၊ ပခုက္ကူအစိုးရနည်းပညာအထက်တန်းကျောင်း တည်ဆောက်ရာတွင် နိုင်ငံ့ဘဏ္ဍာ ပိုမိုကုန်ကျစေသည်၊ လယ်ယာမြေ၌ Denko ဆီဆိုင်တည်ဆောက်ရန် ခွင့်ပြုရာတွင် ကျပ်သိန်း ၅၀၀ ရယူသည် စသဖြင့် စွပ်စွဲခဲ့သည်။

ထိုပြင် ပြည်ထောင်စုအစိုးရ ခွင့်ပြုချက်မရှိဘဲ ဒေသဖွံ့ဖြိုးရေးရန်ပုံငွေများ သုံးစွဲသည်၊ ဒေသတွင်း ဓာတ်အားပေးလုပ်ငန်းများကို လိုင်စင်သက်တမ်းတိုးမပေးသည့် အချိန်တွင် လုပ်ငန်းဆောင်ရွက်ခွင့် ပြုထားသဖြင့် မြေငှားရမ်းခငွေများ ဆုံးရှုံးသည်ဟုလည်း စစ်ကောင်စီက အကြောင်းပြထားသည်။

ထိုအကြောင်းအရာကိစ္စများနှင့် ပတ်သက်၍ ဘဏ္ဍာငွေလေလွှင့်ဆုံးရှုံးကြောင်း ဖော်ပြထားသည့် ပမာဏတွင် ကျပ်သိန်း ၅၀၀ သည်သာ အနည်းဆုံးဖြစ်ပြီး ကျပ် ၉ သန်းမှ သန်း ၃၀ ကျော်ထိ ရှိသည်ဟု ဒေါက်တာအောင်မိုးညို၏ ရှေ့နေက ပြောသည်။

အာဏာသိမ်းစစ်ကောင်စီ ဗိုလ်ချုပ်ကြီးများက ဒေါက်တာအောင်မိုးညိုကို နိုင်ငံတော်ဆူပူအောင်လှုံ့ဆော်မှု ရာဇသတ်ကြီးပုဒ်မ ၅၀၅ (ခ) နှင့် ဇွန်လအတွင်းက ထောင် ၂နှစ်ချခဲ့ပြီးဖြစ်သည်။

မဲစာရင်းမှားသည်ဟူသော အကြောင်းပြချက်နှင့် စစ်တပ်အာဏာသိမ်းသည့် ဖေဖော်ဝါရီ ၁ ရက်နေ့ နေအိမ်အကျယ်ချုပ်ဖြင့်သာ ရှိနေချိန်တွင် စစ်တပ်၏လုပ်ရပ်ကို လက်မခံနိုင်ဟု Facebook တွင် တိုက်ရိုက်ရုပ်သံလွှင့်တင်ပြီးနောက် ဒေါက်တာအောင်မိုးညိုကို စစ်ကောင်စီက အကျဉ်းထောင်သို့ ပို့ဆောင်ပြီး ပုဒ်မများ တစ်ခုပြီးတစ်ခုတပ်ကာ အမှုဖွင့်နေခြင်း ဖြစ်သည်။

လက်ရှိရင်ဆိုင်နေရဆဲဖြစ်သည့် ထိုအဂတိမှုများကို ဒီဇင်ဘာလကုန်ပိုင်းတွင် အပြီးသတ်အမိန့်ချလိမ့်မည်ဟု ဒေါက်တာအောင်မိုးညို၏ ရှေ့နေက မျှော်လင့်ထားသည်။

အုပ်ချုပ်ရေး၊ ဥပဒေပြုရေး၊ တရားစီရင်ရေး အာဏာသုံးရပ်စလုံးကို ချုပ်ကိုင်လိုက်ပြီဟု ကြေညာကာ အာဏာသိမ်းပြီးနောက်တွင် လူထုဆန္ဒမဲဖြင့် အုပ်ချုပ်နေသည့် ဒေါ်အောင်ဆန်းစုကြည်အပါအဝင် NLD အစိုးရအဖွဲ့ခေါင်းဆောင်များကို ကြီးလေးသည့် အဂတိမှုများအပါအဝင် ပုဒ်မမျိုးစုံတပ်ကာ စစ်ကောင်စီက တရားစွဲ၊ ထောင်ဒဏ်များချမှတ်နေသည်။

ကရင်ပြည်နယ်ဝန်ကြီးချုပ် ဒေါ်နန်းခင်ထွေးမြင့်ကို ဆူပူအောင်လှုံ့ဆော်မှုဖြင့် ၂ နှစ်၊ အဂတိလိုက်စားမှု အမှု ၅ မှုဖြင့် ထောင် ၇၅ နှစ် ချထားသည်။ သူ၏အစိုးရအဖွဲ့မှ ဝန်ကြီး ဦးသန်းနိုင်မှာ ထောင် ၉၂ နှစ် ချခံထားရသည်။

ထိုပုံစံအတိုင်း ဆက်လက်ပြုမူမည်ဆိုပါက စစ်ကောင်စီတရားရုံးက မကွေးတိုင်းဝန်ကြီးချုပ်ကို‌ အမှုအားလုံးအတွက် လတ်တလော အများဆုံးချနိုင်သည့် ထောင်ဒဏ်မှာ စုစုပေါင်း ၉၄ နှစ် ဖြစ်သည်။


Original Post: Myanmar Now