Statement 92 Views

ထွယ်ဂျဲန်ဒါနှင့် ဖွံ့ဖြိုးရေးဖောင်ဒေးရှင်း နှင့် ကချင်ငြိမ်းချမ်းရေးကွန်ရက် ပဋိပက္ခဖြစ်စဉ်အတွင်း အမျိုးသမီးများအပေါ် လိင်ပိုင်းဆိုင်ရာ အကြမ်းဖက်မှုများ အပြီးသတ်ဖယ်ရှားရေး အပြည်ပြည်ဆိုင်ရာနေ့ အထိမ်းအမှတ် နေ့ (ဇွန်လ ၁၉ ရက်) သဘောထားထုတ်ပြန်ချက်

June 19th, 2017  •  Author: Htoi Gender and Development Foundation and Kachin Peace Network  •  1 minute read

(၁) ၂၁ ရာစုပင်လုံ ငြိမ်းချမ်းရေးညီလာခံ ဒုတိယအစည်းအဝေးကိုကျင်းပပြုလုပ်ပြီးသော်လည်း ကချင်ပြည်နယ်၏ အခြေအနေမှာ သာ၍ထူးခြားလာသော ငြိ်မ်းချမ်းသာယာမှုကို အမျိုးသမီးများ မရရှိ မခံစားရပါ။ ကချင်ဒေသတွင်ရှိသော လက်နက်ကိုင်အဖွဲ့အစည်းဖြစ်သည့် KIO အဖွဲ့သည် တနိုင်ငံလုံး ပစ်ခတ်တိုက်ခိုက်မှု ရပ်စဲရေးစာချုပ် (NCA) ကို လက်မှတ်ထိုးထားမှု မရှိဟူသော အကြောင်းပြချက်ကြောင့် ငြိမ်းချမ်းရေးလုပ်ငန်းစဉ်တွင် ပါဝင်ဆွေးနွေးခွင့် မရရှိပေ။ ဒေါ်အောင်ဆန်းစုကြည်၏ အထူးဧည့်သည်အဖြစ် ဖိတ်ကြားချက်အရ KIO သည် မြောက်ပိုင်းမဟာမိတ်အဖွဲ့ဝင်များနှင့်အတူ ၂၁ ရာစုပင်လုံ ငြိမ်းချမ်းရေးညီလာခံ ဒုတိယအစည်းအဝေး ဖွင့်ပွဲတွင် တက်ရောက်ခဲ့ပါသော်လည်း အစည်းအဝေးတက်ရောက်သော ကိုယ်စားလှယ်အဖြစ် တရားဝင် ဆွေးနွေးခွင့် မရခဲ့သောကြောင့်၊ အစည်းအဝေးရလာဒ်သည် လက်တွေ့တွင် သာ၍ကောင်းသောသမိုင်းကြောင်း အရွှေ့တခုသို့တွန်းပို့စေသည်ဟု သတ်မှတ်ရန်ခက်ခဲ နေပါသည်။

(၂) ကချင်ပြည်နယ် တနိုင်းဒေသတွင် မြန်မာ့တပ်မတော်မှ ပယင်းတူးဖော်ခြင်းသည် သဘာဝပတ်ဝန်းကျင်နှင့် ဂေဟစနစ် ထိန်းသိမ်းရန်ကြောင်းပြကာ အင်ဂါးဂါးကျေးရွာ၊ နမ်ဗြူကျေးရွာ နှင့် ကချင်ရွာ ပေါင်း (၉) ရွာမှ ပြည်သူများကို ဇွန်လ(၁၅) ရက်နေ့ နောက်ဆုံးထား၍ ရွှေ့ပြောင်းရန်နှင့် မရွေ့ပြောင်းပါက လက်နက်ကိုင် သောင်းကျန်း သူများအဖြစ်သတ်မှတ်မည် ဟူသော စာကို ရဟတ်ယာဉ်ဖြင့် ဖြန့်ဝေခဲ့ပါသည်။

ထို့နောက် မြန်မာ့တပ်မတော်၏ထိုးစစ်ဆင်မှု ကြောင့်စစ်ပွဲများ ပြင်းထန်လာသောကြောင့် ဒေသခံများနှင့် ရွှေ့ပြောင်းအလုပ်သမားများမှာ ထောင်သောင်းချီကာ တနိုင်းမြို့သို့စစ်ဘေးရှောင် ရွှေ့ပြောင်းခိုလှုံ နေထိုင်ကြရသည်။ ထိုတိုက်ပွဲများနှင့် ရုတ်တရက်ရွှေ့ပြောင်းရမှုများကြောင့် ဒေသအတွင်းမူလနေနိုင်သူများနှင့် ပယင်းမှော်များတွင် အသက်မွေးဝမ်းကျောင်းအတွက် မြန်မာနိုင်ငံ ဒေသ အသီးသီးမှ လာရောက်နေထိုင်သူ အမျိုးသမီးများ၊ နို့စို့မိခင်များ၊ ကိုယ်ဝန်ဆောင်မိခင်များ၊ သက်ကြီးရွယ်အိုများ အသက်ဘေးနှင့် ရင်း၍ ပြင်းထန်သော ရာသီဥတုတွင် ဒုက္ခဆင်းရဲ ခံစားနေရပါသည်။ မိသားစုအတွက် ဆက်လက် ထောက်ပံ့ရန် အခက်အခဲကြုံရခြင်း၊ အထူးသဖြင့် ၂၀၁၇-၁၈ ခုနှစ် စာသင်နှစ်၏အစတွင် ကလေးများ အတွက် ကျောင်းအပ်ရန် အခက်အခဲနှင့် ကျောင်းစိမ်း၊ ကျောင်းဖြူ၊ ထီး၊ဖိနပ်၊ လွယ်အိတ်၊ ဗလာစာအုပ်၊ လွယ်အိတ်၊ ကျူရှင်ကြေး၊ အဆောင်ကြေးများကို စီစဉ်ပေးရမည့် အချိန်ကာလဖြစ်လေရာ အမျိုးသမီးများ၊ မိခင်များအတွက် ခန္တာ၊ စိတ်၊ နှလုံးသုံးပါး လုံခြုံမှုမရှိဘဲ များစွာဆင်းရဲဒုက္ခ ရောက်လျက်ရှိကြပါသည်။

(၃) ကချင်ဒေသတွင် ပဋိပက္ခပြန်လည်စတင်ခဲ့သည့် ၂၀၁၁ ဇွန်လ မှ တိုင်းရင်းသူ ကချင်အမျိုးသမီးများကို လိင်ပိုင်း ဆိုင်ရာ အကြမ်းဖက်မှုများမှ အမှုတခုကိုမှ တရားမျှတမှုကိုမရရှိပေ။ ၂၀၁၁ ခုနှစ် အောက်တိုဘာလ ၂၈ ရက်နေ့တွင် ခမရ ၃၂၁ မှ ဖမ်းဆီးခံရ၍ ယနေ့ထက်တိုင် ပျောက်ဆုံးလျက်ရှိသော ဆွမ်လွတ်ရွယ်ဂျား ၏ အမှုနှင့်၊ ၂၀၁၅ ခုနှစ် ဧပြီလ ၁၃ ရက်နေ့တွင် မိုးမောက်မြို့နယ်၊ နွမ်လန်းကျေးရွာ မှ အသက် ၇၃နှစ်အရွယ် အဖွားအို အား တပ်သားဇော်မျိုးအေးမှ မုဒိန်းကျင့်ရန် ကြိုးစားအားထုတ်ခဲ့သော အမှုကိစ္စများ အပါအ၀င် စစ်မြေပြင်နှင့် ထိစပ်ရာ ဒေသများအနီး အမျိုးသမီးများအပေါ် အကြမ်းဖက်မှု ကျူးလွန်သူများတွင် မြန်မာ့တပ်မတော်သားများ ပါဝင်ပတ်သက်နေသည့်အပြင် တရားမျှတစွာအရေးယူ စီရင်ပေးမှု မရှိသေးပေ။ ၂၀၁၅ ခုနှစ် ဇန္န၀ါရီလ ၁၉ ရက်နေ့တွင် ရှမ်းပြည်နယ် ရှဗုတ်ကောင်းခါး ကျေးရွာတွင် အကြမ်းဖက် သတ်ဖြတ်ခံရသော စေတနာ ဆရာမလေးများဖြစ်သည့် မရန်လုရာနှင့် တန်ဘောင်ခေါန်နန်စင် တို့၏ အမှုအပါအ၀င် အလားတူ မှုခင်းများတွင်လည်း တရားခံများကိုထုတ်ဖော်နိုင်မှု မရှိသေးပါ။ အခြားသော အသက်သေဆုံးမှု မရှိသည့် လိင်ဘက်ဆိုင်ရာ ကျူးလွန်မှုများတွင် နစ်နာသူများ၏ ဘ၀လုံခြုံမှုရရှိရေး၊ နစ်နာမှုများကို လျော်ကြေး ပေးရေး၊ ကုစားပေးရေး၊ ပွင့်လင်းမြင်သာမှု ရှိသောတရားစီရင်မှု ရရှိရေးနှင့်၊ တရားမျှတမှု ရရှိရေးတို့ မရရှိခြင်းများ ဆက်လက်ဖြစ်နေပြီး ပဋိပက္ခဒသတွင် အမျိုးသမီးများကို လိင်ပိုင်းဆိုင်ရာအကြမ်းဖက်မှု ဆက်လက်ကျူးလွန်ခံရ ရန် အကြောင်းဖြစ်လာနေပါသည်။

(၄) ပြည်ထောင်စုမြန်မာနိုင်ငံတော် အစိုးရသည် ကမ္ဘာ့ကုလသမဂ္ဂတွင် အဖွဲ့ဝင်နိုင်ငံ ဖြစ်သည့်အားလျော်စွာ ကုလသမဂ္ဂလုံခြုံရေးကောင်စီ ဆုံးဖြတ်ချက်အမှတ် ၁၃၂၅ နှင့် ၁၈၂၀ အရ လိင်ပိုင်းဆိုင်ရာ အကြမ်းဖက် ကျူးလွန်သူကို အရေးယူခံရခြင်းမှ ကင်းလွှတ်ခွင့် လုံးဝမပေးဘဲ ထိရောက်စွာ အရေးယူ ဆောင်ရွက်ပေးရမည်ဖြစ်သည်။

(၅) ကချင်ဒေသ အပါအ၀င် ပဋိပက္ခဖြစ်ပွားရာ ဒေသအတွင်းရှိ အမျိုးသမီးများအပေါ် လိင်ပိုင်းဆိုင်ရာ အကြမ်းဖက်မှုများ အပြီးသတ်ဖယ်ရှားရေးအတွက် ကြိုတင်ကာကွယ်ခြင်း ဆိုင်ရာလုပ်ငန်းများ အဖြစ် အမျိုးသမီးများ၏လုံခြုံရေးကို တိုးမြှင့်ပေးမည့် သီးသန့်မူဝါဒများနှင့် ဥပဒေများ ချမှတ်ခြင်း၊ တရားဥပဒေစိုးမိုးရေးကဏ္ဍနှင့် လုံခြုံရေးကဏ္ဍပြုပြင်ပြောင်းလဲမှုများ တွင် ထည့်သွင်း ခြင်း၊ အထူးစီမံကိန်းများ ချမှတ်ခြင်း၊ နိုင်ငံတော်မှ ဘတ်ဂျက်များ ချမှတ်ပေးခြင်း၊ ပြည်တွင်းပြည်ပကျွမ်းကျင်သူများ၊ အရပ်ဘက်အဖွဲ့အစည်းများနှင့် ပူးပေါင်းချိတ်ဆက်၍ အကောင်အထည်ဖော်ခြင်းများ လိုအပ်ပါသည်။

(၆) ပဋိပက္ခဖြစ်ပွားရာ ဒေသအတွင်းရှိ အမျိုးသမီးများအပေါ် လိင်ပိုင်းဆိုင်ရာ အကြမ်းဖက်မှုများ ဖြစ်ပွားသောအခါ အရေးယူခြင်း နှင့် ပတ်သက်၍ တပ်မတော်သားများ အပါအ၀င် မည်သည့်ကျူးလွန်သူများကိုမဆို အမြန်ဆုံး စုံစမ်းစစ်ဆေးဖော်ထုတ်ကာ တရားမျှတမှုရှိအောင် ချက်ချင်းကိုင်တွယ်ဖြေရှင်းပေးခြင်းဆောင်ရွက်ရန် လိုအပ်ပါသည်။ အရေးပေါ်အခြေအနေများအတွက် အကူအညီ အကာအကွယ် ပေးနိုင်ရန် ဖုန်းဖြင့်သော်လည်းကောင်း၊ လူကိုယ် တိုင်သော်လည်းကောင်း အမြန်ဆုံးဆက်သွယ် တိုင်ကြားနိုင်သော အခြေအနေကို ဖန်တီး ပေးရန်လိုအပ်သည်။
ဆက်သွယ်ရန်

၁။ ဒေါ်နန်ပူ – ၀၉ ၇၃၁ ၉၃၂ ၈၈ (ထွယ်ဂျဲန်ဒါနှင့် ဖွံ့ဖြိုးရေးဖောင်ဒေးရှင်း)
၂။ ဒေါ်ခွန်ဂျာ – ၀၉၄၂၅၂၈၈၈၉၉ (ကချင်ငြိမ်းချမ်းရေးကွန်ရက်)

ထုတ်ပြန်ကြေညာချက်ကို ဤနေရာတွင် ဖတ်ရှုနိုင်သည်။

Send this to a friend