မြေမြုပ်မိုင်းအန္တရာယ်သတိပြုကြရန် တအာင်းဒေသပြည်သူလူထုအား တိုက်တွန်းနှိုးဆော်ခြင်း

မိမိတို့ တအာင်းနယ်မြေဒေသအတွင်း ငါးနှစ်တိုင်တိုင် ထိုးစစ်ဆင်တိုက်ခိုက်နေသော မြန်မာ့တပ်မတော်သည် ရောက်ရှိရာနေရာဒေသများတွင် ဒေသခံပြည်သူလူထုများအန္တရာယ်ပြုစေမည့် မြေမြုပ်မိုင်းများ၊ စွန့်လွှတ်မိုင်းများ အမြောက်အများခင်းကျင်းမြုပ်နှံသည့် နင်းမိုင်းဗျူဟာကို ၂၀၁၇ ခုနှစ်အတွင်းပိုမိုပြုလုပ်လာပါသည်။ ထိုကြောင့် ဒေသခံ ပြည်သူလူထုတို့၏ နေ့စဉ်ဘဝလုပ်ကိုင်စားသောက်မှုအတွက် သွားလာရုန်းကန်လှုပ်ရှားရာတွင် မြေမြုပ်မိုင်းအန္တရာယ် ရှောင်ရှားနိုင်ရေးအတွက် အထူးဂရုပြုကြပါရန် အလေးအနက်တိုက်တွန်းနှိုးဆော်အပ်ပါသည်။

ပလောင်ပြည်နယ်လွတ်မြောက်ရေးတပ်ဦး P.S.L.F/T.N.L.A သည် Geneva Call’s Deeds of Commitment မြေမြုပ်မိုင်းဆန့်ကျင်တားဆီးရေးသဘောတူစာချုပ်ကို ၂၀၀၇ ခုနှစ် ကတည်းကပင် နိုင်ငံတကာရှေ့မှောက်တွင် လက်မှတ်ရေးထိုးထားသည့် အဖွဲ့အစည်းဖြစ်သဖြင့် ပြည်သူလူထုကိုအန္တရာယ်ပြုစေမည့် မြေမြုပ်မိုင်းများ၊ စွန့်လွတ်မိုင်း များကို လုံးဝအသုံးမပြုပါ။

မြန်မာ့တပ်မတော်၏ ပြင်းထန်သည့်ထိုးစစ်ကို ခုခံကာကွယ်နိုင်ရန်အတွက် အဝေးထိန်းခလုတ်ဖြင့် ထိန်းချုပ် ခိုင်းစေသည့်မိုင်းနှင့် သတ်မှတ်သက်တမ်းကာလအတွင်း ထိန်းချုပ်ခိုင်းစေအသုံးပြုသည့်မိုင်းများကိုသာ မိမိတို့ တအာင်းတပ်မတော်က လိုအပ်ချက်အရအသုံးပြုပါသည်။

အချိန်ကာလရှည်ကြာစွာအသက်ဝင်သည့် မြေမြုပ်မိုင်းအမျိုးမျိုးအသုံးပြုသော မြန်မာ့တပ်မတော်နှင့် တောင်ပိုင်း ရှမ်းပြည်တပ်မတော် RCSS/SSA တို့သည် NCA အပစ်ရပ်စာချုပ်ပါ မိုင်းရှင်းလင်းရေးစီမံချက်အရ ယင်းတို့နှစ်ဖွဲ့ ထောင်ထားသည့်မိုင်းများကို ဟန်ပြရှင်းလင်းကာ မိမိတို့တအာင်းဒေသအတွင်း အင်အားတိုးချဲ့ဝင်ရောက် လှုပ်ရှားလာ ပါသည်။

မြန်မာ့တပ်မတော်နှင့် တောင်ပိုင်း-ရှမ်းပြည်တပ်မတော် RCSS/SSA တို့က ဒေသခံပြည်သူလူထုတို့ သွားလာ သည့်လမ်းများ၊ လုပ်ကိုင်စားသောက်သည့် လုပ်ငန်းခွင်လယ်ယာခြံမြေများတွင်ပါ မြေမြုပ်မိုင်းများ၊ စွန့်လွှတ်မိုင်းများကို မြုပ်နှံအသုံးပြုနေကြပါသည်။ ထိုကြောင့် မြန်မာ့တပ်မတော်နှင့် ရှမ်းပြည်တပ်မတော် RCSS/SSA ဝင်ရောက်လာသည့် နေရာဒေသများတွင် မြေမြုပ်မိုင်းအန္တရာယ်ကင်းရှင်းနိုင်ရေးအတွက် ရှောင်ရှားသွားလာကြပါရန်နှင့် အထူးဂရုပြုသွားလာ လှုပ်ရှားကြပါရန် ဒေသခံပြည်သူလူထုများအား တိုက်တွန်းနှိုးဆော်လိုက်ပါသည်။

“ဘ်ုပ်ဘိူန် ကုင်တအာင်း”

ဗဟိုအလုပ်အမှုဆောင်ကော်မတီ
ပလောင်ပြည်နယ်လွတ်မြောက်ရေးတပ်ဦး (P.S.L.F)
တအာင်းအမျိုးသားလွတ်မြောက်ရေးတပ်မတော် (T.N.L.A)

Related Posts:

Send this to a friend