ဦးကိုနီလုပ်ကြံခံရမှုအပေါ်တိုင်းရင်းသားခေါင်းဆောင် တချို့ရဲ့အမြင်များ

ကျမတို့နိုင်ငံရဲ့ နိုင်ငံရေးအခြေအနေက စနစ်ဟောင်းကိုဆက်ဆုပ်ကိုင်ပြီး ဒီစံနစ်ဟောင်းပေါ်ကနေ ဆက်ပြီးအကျိုးအမြတ် ထုတ်ချင်တဲ့သူတွေနဲ့ စနစ်သစ်ကိုပြောင်းဖို့ ကြိုးစားနေတဲ့သူတွေကြားထဲက လွန်ဆွဲပွဲက ကြီးပါတယ်။ ၂၀၁၅ ရွေးကောက်ပွဲမှာ လူတွေ NLD ကို မဲပေးကြတယ်ဆိုတာကလည်း ဒေါ်အောင်ဆန်းစုကြည်ရဲ့ဦးဆောင်မှု ပြောင်းလဲချိန်တန်ပြီဆိုတဲ့ ဒီသတင်းစကားကြောင့် လူတွေက ပြောင်းလဲချင်လို့ကို မဲပေးခဲ့ကြတယ်။ ဘာတွေ ပြောင်းလဲချင်ကြတာလဲဆိုရင် အဓိကကတော့ စစ်အာဏာရှင်စနစ်ကို ဒီမိုကရေစီစနစ်နဲ့ ပြောင်းဖို့ ကြိုးစားနေကြတုန်းပေါ့။

ဆရာဦးကိုနီက အင်မတန်ဗျူဟာမြောက်တဲ့ ဥပဒေပညာရှင်၊ တိုက်စစ်မှူးကောင်းတယောက်လို့ ကျမဒီလိုမြင်တယ်။ ကျမတို့နိုင်ငံရဲ့ အပြောင်းအလဲဟာ ၂၀၀၈ ဖွဲ့စည်းပုံ မပြောင်းလို့ရှိရင် ဘယ်လိုမှမပြောင်းဘူးဆိုတာ သူသိတယ်။ ဥပဒေ ပညာရှင်တယောက် ဖြစ်တဲ့အတွက်ကြောင့်မို့ ဒီဖွဲ့စည်းပုံမှာ ဟိုနားတစ၊ ဒီနားတစ၊ ဟိုတပိုင်း၊ ဒီတပိုင်း လိုက်ပြောင်းလို့ ပြောင်းသွားမှာ မဟုတ်ဘူး။ ဒါကြောင့်မို့လို့ ဒီဖွဲ့စည်းပုံဟာ ဘယ်လိုမှ ဆက်သွားလို့မရဘဲနဲ့ ဖွဲ့စည်းပုံ အသစ်တခု ကျမတို့ နိုင်ငံမှာရှိမှ ဒီမိုကရေစီအုတ်မြစ် ချလို့ရမယ်ဆိုတာကို ရှင်းရှင်းလင်းလင်းမြင်တဲ့ ဥပဒေပညာရှင်တယောက် ဖြစ်တယ်။

ဒါကြောင့်မို့လို့ သူကဒီအပေါ်မှာ ပြည်သူတွေကို တောက်လျှောက်ပညာပေးတယ်။ အသိပေးတယ်။ မျက်စိဖွင့် ပေးတယ်။ တချိန်တည်းမှာပဲ NLD ၂၀၁၅ ရွေးကောက်ပွဲ နိုင်ရေးတခုတည်း မဟုတ်ဘဲနဲ့ အထူးသဖြင့် စစ်အာဏာရှင်ကနေ ချပေးထားတဲ့ ၂၀၀၈ ဖွဲ့စည်းပုံကို သုံးပြီးတော့မှ ဒေါ်အောင်ဆန်းစုကြည်ကို နိုင်ငံတော်အတိုင်ပင်ခံပုဂ္ဂိုလ်ဆိုတဲ့ နေရာကို သူတို့ကြိုးနဲ့ သူတို့ကိုပြန်ချည်ပြီး သူတို့ရေးဆွဲခဲ့တဲ့စာအုပ်ထဲကနေ ဟာကွက်ယိုကွက်တွေရှာပြီး ဒီဥပဒေတွေကို ဆွဲထုတ်လာတာ။ ကျမတို့နိုင်ငံမှာ ဒီလောက်ဗျူဟာမြောက်တော်တဲ့ ဥပဒေပညာရှင်ဆိုတာ မရှိဘူး။

စစ်အာဏာရှင်ရဲ့ ယန္တရားကိုတပ်မက်ပြီး ဆက်ထိန်းထားချင်တဲ့ သူတွေဘက်က ကြည့်မယ်ဆိုလို့ရှိရင် သူတို့ရဲ့ပစ်မှတ်က သူတို့ရဲ့အာဏာကို ထိပါးမယ့်သူဆိုရင် ဆရာဦးကိုနီလိုလူမျိုးက ထိပ်ဆုံးကပါတယ်ဆိုတာကို ဒီလိုပဲသုံးသပ်ရပါတယ်။ အခုလိုအချိန်မှာ အထူးသဖြင့် ကျမတို့နိုင်ငံရဲ့ လုံခြုံရေးပိုင်းဆိုင်ရာမှာ တကယ်တမ်း တိုင်းပြည်ရဲ့ကဏ္ဍအသီးသီးမှာ ဦးဆောင်နေရတဲ့သူတွေရဲ့လုံခြုံရေးဟာ ဘယ်လောက်အထိ အရေးကြီးလဲဆိုတာ ဦးကိုနီလုပ်ကြံခံရတာက သက်သေပဲ။ ဒီမိုကရေစီပြောင်းလဲဖို့လုပ်တဲ့ အခုလိုအသွင်ကူးပြောင်းရေးကာလမျိုးမှာ အမှုမှန်ပေါ်ပေါက်ရေး တရားရေး ဆိုတာတွေကို တာဝန်ရှိနေတဲ့ ပြည်သူ့အစိုးရအနေနဲ့ သေသေချာချာဖော်ထုတ်ပေးဖို့ လိုလိမ့်မယ်။

မူရင်းသတင်း အပြည့်အစုံကို ဤနေရာတွင် ဖတ်ရှုနိုင်ပါသည်။

Related Posts:

  • No Related Posts